US Fed rate cut: ಫೆಡ್‌ ದೊಡ್ಡ ನಿರ್ಧಾರ...ಉದ್ಯೋಗ ಕುಸಿತದ ನಡುವೆ ಅಮೆರಿಕಾ ಬಡ್ಡಿದರ 3.5–3.75%ಕ್ಕೆ ಇಳಿಕೆ!

ಅಮೆರಿಕದ ಫೆಡರಲ್‌ ರಿಸರ್ವ್‌ನ ಫೆಡರಲ್‌ ಓಪನ್‌ ಮಾರ್ಕೆಟ್‌ ಕಮಿಟಿ (FOMC) ಬುಧವಾರ ಮತ್ತೆ ಬಡ್ಡಿದರ ಕಡಿತ ಮಾಡಿದೆ. ಫೆಡ್‌ ಅಧ್ಯಕ್ಷ ಜೆರೋಮ್‌ ಪಾವೆಲ್‌ ನೇತೃತ್ವದ ಸಭೆಯಲ್ಲಿ ಪ್ರಮುಖ ಬಡ್ಡಿದರವನ್ನು 25 ಬೇಸಿಸ್‌ ಪಾಯಿಂಟ್‌ ಕಡಿತಗೊಳಿಸಿದ್ದು, ಹೊಸ ದರವನ್ನು 3.5% ರಿಂದ 3.75% ನಡುವಿನ ಮಟ್ಟದಲ್ಲಿ ನಿಗದಿ ಮಾಡಲಾಗಿದೆ. ಸುಮಾರು ಮೂರು ವರ್ಷಗಳಲ್ಲಿ ಕಂಡ ಕಡಿಮೆ ಮಟ್ಟ ಇದಾಗಿದೆ. ಫೆಡ್‌ ಪ್ರಕಟಣೆಯ ಪ್ರಕಾರ, ಆರ್ಥಿಕ ಸ್ಥಿತಿಗತಿ ಮತ್ತು ಅಪಾಯಗಳ ತೂಕಮಾಪನವನ್ನು ಗಮನದಲ್ಲಿಟ್ಟು, ಫೆಡರಲ್‌ ಫಂಡ್ಸ್‌ ರೇಟ್‌ನ ಗುರಿ ವ್ಯಾಪ್ತಿಯನ್ನು 1/4 ಶೇಕಡಾ ಇಳಿಸಲಾಗಿದೆ ಎಂದು ತಿಳಿಸಿದೆ.

ಆರ್ಥಿಕ ಬೆಳವಣಿಗೆ ನಿಧಾನ:

ಲಭ್ಯವಿರುವ ಮಾಹಿತಿಗಳ ಪ್ರಕಾರ, ಅಮೆರಿಕದ ಆರ್ಥಿಕ ಚಟುವಟಿಕೆ ಮಧ್ಯಮ ವೇಗದಲ್ಲಿ ಸಾಗುತ್ತಿದೆ. ಈ ವರ್ಷ ಉದ್ಯೋಗ ಸೃಷ್ಟಿಯಲ್ಲಿ ಕುಸಿತ ಕಂಡಿದ್ದು, ನಿರುದ್ಯೋಗ ಪ್ರಮಾಣವೂ ಸೆಪ್ಟೆಂಬರ್‌ವರೆಗೆ ಸ್ವಲ್ಪ ಏರಿಕೆಯಾಗಿದೆ. ಇತ್ತೀಚಿನ ವರದಿಗಳೂ ಇದೇ ಪ್ರವೃತ್ತಿಯನ್ನು ತೋರಿಸುತ್ತಿವೆ. ದರ ಏರಿಕೆ (ಇನ್ಫ್ಲೇಶನ್‌) ವರ್ಷ ಆರಂಭದಿಗಿಂತ ಹೆಚ್ಚಾಗಿದ್ದು, ಇನ್ನೂ ಸ್ವಲ್ಪ ಮಟ್ಟಿಗೆ ಉನ್ನತ ಮಟ್ಟದಲ್ಲಿ ಉಳಿದಿದೆ.

ಟ್ರಂಪ್‌ ಸರ್ಕಾರದ ಸುಂಕ ನೀತಿಗಳ ಪ್ರಭಾವ:

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವಿಧಿಸಿರುವ ವಿವಿಧ ಸುಂಕಗಳು ಸರಬರಾಜು ಸರಪಳಿಗಳ ಮೇಲೆ ಪರಿಣಾಮ ಬೀರಿದ್ದು, ದರ ಏರಿಕೆಯ ಒತ್ತಡವನ್ನು ಹೆಚ್ಚಿಸಿದೆ. ಇದೇ ಸಂದರ್ಭದಲ್ಲಿ ಉದ್ಯೋಗ ಮಾರುಕಟ್ಟೆ ದುರ್ಬಲವಾಗುತ್ತಿರುವುದರಿಂದ, ಬಡ್ಡಿದರ ಕಡಿತವು ಆರ್ಥಿಕತೆಗೆ ಬೆಂಬಲ ನೀಡಲಿದೆ ಎಂದು ತಜ್ಞರು ಹೇಳುತ್ತಾರೆ.

ಫೆಡ್‌ನ ಒಳಗಿನ ಚರ್ಚೆ ಗಟ್ಟಿಗೊಂಡಿದೆ:

ಇದು ಫೆಡ್‌ನ ಸತತ ಮೂರನೇ ಬಾರಿಗೆ ಬಡ್ಡಿದರ ಕಡಿತವಾಗಿದೆ. ಆದರೆ ಈ ಬಾರಿ ಕಮಿಟಿಯೊಳಗೆ ಅಭಿಪ್ರಾಯ ಭೇದ ಹೆಚ್ಚಾಗಿದೆ. "ಇತ್ತೀಚಿನ ಕಾಲದಲ್ಲಿ ಇಷ್ಟು ಸಮಾನವಾಗಿ ವಿಭಜಿಸಲ್ಪಟ್ಟ FOMC ತೆಗೆದುಕೊಂಡ ನಿರ್ಧಾರ ಕಂಡುಬಂದಿದೆ" ಎಂದು ಆರ್ಥಿಕ ತಜ್ಞ ಮೈಕಲ್‌ ಪಿಯರ್ಸ್‌ ಅಭಿಪ್ರಾಯಪಟ್ಟಿದ್ದಾರೆ. ದರ ಏರಿಕೆ ಇನ್ನೂ ಜಾಸ್ತಿಯಿರುವ ಕಾರಣ ಕೆಲವು ಅಧಿಕಾರಿಗಳು ಜಾಗರೂಕತೆ ಬೇಡಿಕೆಯಿಡುತ್ತಾರೆ. ಆದರೆ ಉದ್ಯೋಗ ಕುಸಿತವನ್ನು ನೋಡಿದಾಗ ಕಡಿಮೆ ಬಡ್ಡಿದರದ ಅಗತ್ಯವಿದೆ ಎಂಬುದಾಗಿ ಮತ್ತೊಬ್ಬ ವಲಯ ವಾದಿಸುತ್ತದೆ.

ಸರ್ಕಾರದ ಶಟ್‌ಡೌನ್:

ಅಕ್ಟೋಬರ್‌-ನವೆಂಬರ್‌ನಲ್ಲಿ ನಡೆದ ಸರ್ಕಾರದ ಶಟ್‌ಡೌನ್‌ನಿಂದಾಗಿ ಹಲವು ಅಧಿಕೃತ ಉದ್ಯೋಗ ಅಂಕಿಅಂಶಗಳು ಪ್ರಕಟವಾಗಿಲ್ಲ. ಇದರ ಪರಿಣಾಮವಾಗಿ ಫೆಡ್‌ಗೆ ನವೀನ ಡೇಟಾ ಲಭ್ಯವಾಗದೇ, ನಿರ್ಧಾರ ಮಾಡುವಲ್ಲಿ ಸವಾಲು ಉದ್ಭವಿಸಿತು.

FOMC ಹೇಗೆ ಕೆಲಸ ಮಾಡುತ್ತದೆ?

ಫೆಡರಲ್‌ ರಿಸರ್ವ್‌ ನೀತಿಗಳನ್ನು ನಿರ್ಧರಿಸುವ ಈ ಕಮಿಟಿಯಲ್ಲಿ ಒಟ್ಟು 12 ಮಂದಿ ಮತದಾರ ಸದಸ್ಯರಿದ್ದು, ಏಳು ಗವರ್ನರ್‌ಗಳು, ನ್ಯೂಯಾರ್ಕ್‌ ಫೆಡ್‌ ಅಧ್ಯಕ್ಷ ಮತ್ತು ಇತರೆ ಫೆಡ್‌ ಬ್ಯಾಂಕ್‌ಗಳ ಅಧ್ಯಕ್ಷರು ಪರ್ಯಾಯವಾಗಿ ಮತ ಚಲಾಯಿಸುತ್ತಾರೆ. ಇವರ ಮುಖ್ಯ ಎರಡು ಗುರಿಗಳು:

• ಗರಿಷ್ಠ ಉದ್ಯೋಗ ಒದಗಿಸುವುದು
• ಬೆಲೆ ಸ್ಥಿರತೆಯನ್ನು ಕಾಪಾಡುವುದು

ಈ ಗುರಿಗಳು ಕೆಲವೊಮ್ಮೆ ಪರಸ್ಪರ ವಿರುದ್ಧವಾಗಬಹುದು - ಬಡ್ಡಿದರ ಕಡಿತವು ಆರ್ಥಿಕ ಚಟುವಟಿಕೆಯನ್ನು ಹೆಚ್ಚಿಸಬಹುದು, ಆದರೆ ದರ ಏರಿಕೆಯನ್ನು ಹೆಚ್ಚಿಸುವ ಸಾಧ್ಯತೆಯೂ ಇರುತ್ತದೆ. ಅದೇ ರೀತಿ, ಬಡ್ಡಿದರ ಹೆಚ್ಚಿಸಿದರೆ ಇನ್ಫ್ಲೇಶನ್‌ ನಿಯಂತ್ರಣಕ್ಕೆ ಸಹಾಯವಾಗುತ್ತದೆ, ಆದರೆ ಆರ್ಥಿಕ ಬೆಳವಣಿಗೆ ನಿಧಾನವಾಗುತ್ತದೆ.

ಲಭ್ಯವಿರುವ ಅಂಕಿಅಂಶಗಳು ಉದ್ಯೋಗ ಮಾರುಕಟ್ಟೆಯಲ್ಲಿ ನಿಧಾನಗತಿಯನ್ನು ತೋರಿಸುತ್ತಿವೆ. ಈ ಹಿನ್ನೆಲೆಯಲ್ಲಿ ಫೆಡ್‌ ತೆಗೆದುಕೊಂಡಿರುವ ಇತ್ತೀಚಿನ ಬಡ್ಡಿದರ ಕಡಿತವು ಅಮೆರಿಕದ ಆರ್ಥಿಕತೆಯನ್ನು ಸಮತೋಲನದಲ್ಲಿ ಇರಿಸಲು ಸಹಾಯ ಮಾಡಲಿದೆ ಎಂದು ತಜ್ಞರು ನಂಬಿದ್ದಾರೆ.