'ವರ್ತೂರು ಫ್ಲೈಓವರ್ ಬೇಡ'..₹488 ಕೋಟಿ ವೆಚ್ಚದ ಈ ಯೋಜನೆಗೆ ವಿರೋಧ..! ಬೇರೆ ಯೋಜನೆಗೆ ಡಿಮ್ಯಾಂಡ್! ಯಾವುದು ಆ ಯೋಜನೆ?

ಬೆಂಗಳೂರು ನಗರದ ಅಭಿವೃದ್ಧಿ ಮೇಲೇರುತ್ತಿದೆ. ನಗರದ ಪೂರ್ವ ಭಾಗದಲ್ಲಿರುವ ವರ್ತೂರಿನಲ್ಲಿ ಬೃಹತ್ ವೆಚ್ಚದ ಫ್ಲೈಓವರ್ ನಿರ್ಮಿಸಬೇಕೆಂಬ ಯೋಜನೆ ಬಂದಿದೆ. ಈ ಯೋಜನೆಯಡಿ ಅಲ್ಲಿ ₹488 ಕೋಟಿ ವೆಚ್ಚದ ಫ್ಲೈಓವರ್ ನಿರ್ಮಿಸಲಾಗುತ್ತದೆ. ಆದರೆ ಅಲ್ಲಿನ ಜನರು ಈ ಯೋಜನೆಗೆ ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ.

ಹೌದು, ವರ್ತೂರು ನಾಗರಿಕ ಹಿತ ರಕ್ಷಣಾ ವೇದಿಕೆ ಎಂಬ ಸ್ಥಳೀಯ ನಿವಾಸಿಗಳ ಸಂಘಟನೆ ಈ ಯೋಜನೆ ವಿರುದ್ಧ ತಿರುಗಿಬಿದ್ದಿದೆ. ₹488 ಕೋಟಿ ವೆಚ್ಚದ ಯೋಜನೆ ನಮಗೇ ಬೇಡವೇ ಬೇಡ ಎಂದು ಪಟ್ಟು ಹಿಡಿದಿದೆ. ಈ ಯೋಜನೆ ಬೇಡ ಎಂದು ಹೇಳುವುದಕ್ಕೂ ಕಾರಣ ಇದೆ. ಈ ಬಹು ವೆಚ್ಚದ ಮೇಲ್ಸೇತುವೆ ಬದಲು ಬೇರೆ ಒಂದು ಯೋಜನೆಗೆ ಡಿಮ್ಯಾಂಡ್ ಮಾಡುತ್ತಿದೆ. ಈ ಫ್ಲೈಓವರ್ ಯೋಜನೆಯ ವಿರುದ್ಧವಾಗಿ, ರಾಜ್ಯದ ಮುಖ್ಯ ಕಾರ್ಯದರ್ಶಿ ಡಾ. ಶಾಲಿನಿ ರಜನೀಶ್ ಅವರಿಗೆ ಬಹುಪಟು ಹಾಗೂ ಪರಿಪೂರ್ಣ ಜ್ಞಾಪಕ ಪತ್ರವನ್ನು ಸಲ್ಲಿಸಿದೆ.

ಅಸಂವಿಧಾನಿಕ ಯೋಜನೆ ಎಂಬ ಆರೋಪ:

ಮೂಲತಃ ₹187 ಕೋಟಿ ವೆಚ್ಚದಲ್ಲಿ ರೂಪಿಸಲಾಗಿದ್ದ ಈ ಯೋಜನೆಯು ಯಾವುದೇ ಸಾರ್ವಜನಿಕ ವಿವರಣೆ ಇಲ್ಲದೆ ₹488 ಕೋಟಿಗೆ ಏರಿಕೆಗೊಂಡಿರುವುದು ವೇದಿಕೆಯ ಆಕ್ರೋಶಕ್ಕೆ ಕಾರಣವಾಗಿದೆ. ನಾಗರಿಕರ ಪ್ರಕಾರ, ಈ ಯೋಜನೆಯು ಕರ್ನಾಟಕ ಪಟ್ಟಣ ಮತ್ತು ಗ್ರಾಮಾಂತರ ಯೋಜನೆ ಕಾಯ್ದೆಯ ಪ್ರಕಾರ ಕಡ್ಡಾಯವಾಗಿರುವ ಸಾರ್ವಜನಿಕ ಸಮಾಲೋಚನೆ, ವೆಚ್ಚದ ಪಾರದರ್ಶಕತೆ ಮತ್ತು ಸೂಕ್ತ ಆಡಳಿತ ಅನುಮೋದನೆಗಳಿಲ್ಲದೆ ಮುಂದುವರಿಯುತ್ತಿದೆ.

ಮೆಟ್ರೋ ಮಾದರಿ ಪರ್ಯಾಯಕ್ಕೆ ಒತ್ತಾಯ:

ಈ ಯೋಜನೆಗೆ ಪ್ರಮುಖ ಕಾರಣ ಎಂದರೆ ನಾಗರಿಕರಿಗೆ ಫ್ಲೈಓವರ್ ಬದಲಿಗೆ, ಮೆಟ್ರೋ ಸೇವೆ ಬೇಕಾಗಿದೆ. ಏರಿಕೆಯಾಗಿ ಬೆಳೆಯುತ್ತಿರುವ ಪೂರ್ವ ಬೆಂಗಳೂರು ಕಾರಿಡಾರ್‌ಗಾಗಿ ಕಾರು ಆಧಾರಿತ ಫ್ಲೈಓವರ್ ಬದಲಿಗೆ ಜಿಗಣಿ, ಕಾಡುಗೋಡಿ, ವರ್ತೂರು ಮಾರ್ಗವಾಗಿ ಮೆಟ್ರೋ ಸಂಪರ್ಕದ ಅಗತ್ಯವಿದೆ ಎಂದು ವೇದಿಕೆ ಒತ್ತಾಯಿಸುತ್ತಿದೆ. ಇದು ನಿರಂತರ ಜನಸಂಚಾರಕ್ಕೆ ಹೆಚ್ಚು ಸಹಕಾರಿಯಾಗುತ್ತವೆ ಎಂಬ ದೃಷ್ಟಿಕೋಣ ಅವರದ್ದು.

ಹೆಚ್ಚುತ್ತಿರುವ ಪರಿಸರ ಆತಂಕಗಳು:

ಈ ಯೋಜನೆ ವರ್ತೂರು ಸರೋವರದ ಬಫರ್ ವಲಯದಲ್ಲಿ ಬರಲಿದೆ ಎಂಬುದು ಪರಿಸರ ಸಂರಕ್ಷಣಾ ನಿಯಮಗಳ ನೇರ ಉಲ್ಲಂಘನೆ ಎಂದು ವೇದಿಕೆ ಎತ್ತಿಹಿಡಿದಿದೆ. ಕರ್ನಾಟಕ ಹೈಕೋರ್ಟ್ ತೀರ್ಪು ಪ್ರಕಾರ, ಸರೋವರದ ಗಡಿಯಿಂದ 30 ಮೀಟರ್ ಒಳಗೆ ಯಾವುದೇ ನಿರ್ವಹಣಾ ಕಾಮಗಾರಿ ನಡೆಯಬಾರದು. ಈ ಮೇಲ್ಸೇತುವೆಯು ಪ್ರವಾಹದ ಅಪಾಯ, ಅಂತರ್ಜಲ ಕುಸಿತ ಮತ್ತು ಹವಾಮಾನ ಬದಲಾವಣೆಯ ಹಿನ್ನಲೆಯಲ್ಲಿ ನಗರ ಉಷ್ಣ ದ್ವೀಪ ಪರಿಣಾಮಗಳನ್ನು ಹೆಚ್ಚಿಸಬಹುದು ಎಂದು ನಾಗರಿಕರು ಎಚ್ಚರಿಕೆ ನೀಡಿದ್ದಾರೆ.

ಸಾಂಸ್ಕೃತಿಕ ಪರಂಪರೆಗೂ ಅಂಕಿತದ ಹಾನಿ:

ಪ್ರಸ್ತಾವಿತ ಫ್ಲೈಓವರ್ ನಂತಹ ಯೋಜನೆಗಳು ಶತಮಾನಗಳಷ್ಟು ಹಳೆಯ ಮರಗಳು ಹಾಗೂ ಚನ್ನರಾಯಸ್ವಾಮಿ ಮತ್ತು ಕಾಶಿವಿಶ್ವನಾಥಸ್ವಾಮಿ ದೇವಾಲಯಗಳ ಪರಿಸರವನ್ನು ಹಾನಿಗೊಳಿಸುವ ಸಾಧ್ಯತೆ ಇದೆ. 16ನೇ ಶತಮಾನದಿಂದ ಸಾಂಸ್ಕೃತಿಕವಾಗಿ ಬೆಳೆದ ಈ ಪ್ರದೇಶಕ್ಕೆ ಶಾಶ್ವತ ಹಾನಿ ಉಂಟಾಗುವ ಸಾಧ್ಯತೆಯಿದೆ. ಈ ಯೋಜನೆಗೆ ವೃಕ್ಷ ಮಂಡಳಿಯಿಂದ ಅನುಮತಿ ಇಲ್ಲದಿರುವುದೂ ಬೆಳಕಿಗೆ ಬಂದಿದೆ.

ಆಧುನಿಕ ನಗರ ಯೋಜನೆಯ ಪರಿಕಲ್ಪನೆಗೆ ವಿರುದ್ಧ:

ಸೆಯೋಲ್, ಮ್ಯಾಡ್ರಿಡ್, ಸ್ಯಾನ್ ಫ್ರಾನ್ಸಿಸ್ಕೋಗಳು ಈಗ ಫ್ಲೈಓವರ್‌ಗಳನ್ನು ಕೆಡವುತ್ತಿದ್ದಾರೆ, ಆದರೆ ನಾವು ಇನ್ನೂ ಹೊಸದಾಗಿ ನಿರ್ಮಿಸುತ್ತಿದ್ದೇವೆ" ಎಂಬ ಘೋಷಣೆಯೊಂದಿಗೆ ವೇದಿಕೆ, ಬದಲಾಗಿ ಮೆಟ್ರೋ ಮತ್ತು ಪಾದಚಾರಿ ಆಧಾರಿತ ಮೂಲಸೌಕರ್ಯಗಳ ದಿಕ್ಕಿನಲ್ಲಿ ಮುನ್ನಡೆಯುವಂತೆ ಸರ್ಕಾರವನ್ನು ಒತ್ತಾಯಿಸುತ್ತಿದೆ. ವೇದಿಕೆಯ ಪ್ರಕಾರ, ಈ ಯೋಜನೆ ಮಹಾನಗರ ಯೋಜನಾ ಸಮಿತಿ (MPC) ಮತ್ತು ರಾಜ್ಯ ಹಣಕಾಸು ಆಯೋಗದ ಸಮೀಕ್ಷೆ ಇಲ್ಲದೆ ಜಾರಿಯಾಗುತ್ತಿದೆ ಎಂಬುದು ತೀವ್ರವಾಗಿ ಚಿಂತಾಜನಕ.

ನಗರ ಯೋಜನೆಗಳಲ್ಲಿ ನಾಗರಿಕ ಪಾಲ್ಗೊಳ್ಳುವಿಕೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಈ ಕ್ರಮವು ಮಾದರಿಯಾಗಿದೆ. ವರ್ತೂರು ನಾಗರಿಕರ ಆಕ್ರೋಶ ಮತ್ತು ಬಹಿರಂಗ ಚಿಂತನೆಗಳು ಬೆಂಗಳೂರಿನ ಮುಂಬರುವ ಯೋಜನೆಗಳಿಗೆ ದಿಕ್ಕು ತೋರಿಸುವಂತೆ ಕಾಣುತ್ತಿವೆ. ಪಾರದರ್ಶಕತೆ, ಹೊಣೆಗಾರಿಕೆ ಮತ್ತು ಶಾಶ್ವತತೆಯ ಆಧಾರಿತ ಯೋಜನೆಗಳು ಮಾತ್ರ ಮುಂದಿನ ಪೀಳಿಗೆಗೆ ತಕ್ಕ ರಾಜಧಾನಿ ರೂಪಿಸಲು ಸಹಕಾರಿಯಾಗುತ್ತವೆ.