ಬೆಂಗಳೂರಿನ ಟೆಕ್ನಾಲಜಿ ಮತ್ತು ಇನ್ನೋವೇಶನ್ ಸೆಂಟರ್‌ನಲ್ಲಿ 50% ಸಿಬ್ಬಂದಿ ವಜಾಗೊಳಿಸಿದ ಝೀ

ಬೆಂಗಳೂರು, ಮಾರ್ಚ್‌ 30: ಝೀ ಎಂಟರ್‌ಟೈನ್‌ಮೆಂಟ್ ಬೆಂಗಳೂರಿನ ತಂತ್ರಜ್ಞಾನ ಮತ್ತು ನಾವೀನ್ಯತೆ ಕೇಂದ್ರವನ್ನು (ಟಿಐಸಿ) ವಿಶೇಷ ಸಮಿತಿಯ ಮಾರ್ಗದರ್ಶನದ ನಂತರ ಸುಮಾರು 50 ಪ್ರತಿಶತದಷ್ಟು ಉದ್ಯೋಗಿಗಳನ್ನು ವಜಾ ಮಾಡಿದೆ ಎಂದು ಹೇಳಿದೆ.

ಕಂಪೆನಿಯ ಎಂಡಿ ಮತ್ತು ಸಿಇಒ ನಿರ್ವಹಣಾ ವೆಚ್ಚ ಕಡಿತಗೊಳಿಸಲು ಟಿಐಸಿ ಸಿಬ್ಬಂದಿಯನ್ನು ಶೇಕಡಾ 50 ರಷ್ಟು ಕಡಿತಗೊಳಿಸಿದ್ದಾರೆ. ಟೆಕ್ನಿಕಲ್‌ ಸೆಲ್ಯೂಷನ್‌ಗಳನ್ನು ಒದಗಿಸುವ ಕಂಪನಿಯ ಬೆಂಗಳೂರು ಮೂಲದ ಪ್ರಮುಖ ಕೇಂದ್ರವಾಗಿದೆ ಎಂದು ಝೀ ಎಂಟರ್‌ಟೈನ್ಮೆಂಟ್‌ ಎಂಟರ್‌ಪ್ರೈಸಸ್‌ ಲಿಮಿಟೆಡ್ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದೆ.

ಝೀ ಕಂಪನಿಯು ಈ ಕ್ರಮದಿಂದ ಕೆಲಸ ಕಳೆದುಕೊಂಡ ಉದ್ಯೋಗಿಗಳ ನಿಖರ ಸಂಖ್ಯೆಯನ್ನು ಹಂಚಿಕೊಂಡಿಲ್ಲವಾದರೂ ತನ್ನ ಇತ್ತೀಚಿನ ವಾರ್ಷಿಕ ವರದಿಯಲ್ಲಿ ಕೇಂದ್ರವು 650 ಕ್ಕೂ ಹೆಚ್ಚು ಎಂಜಿನಿಯರ್‌ಗಳನ್ನು ಹೊಂದಿದೆ. ಅವರು ಡಿಜಿಟಲ್ ಪರಿಸರ ವ್ಯವಸ್ಥೆಯನ್ನು ಗೆಲ್ಲುವ ಓಟದಲ್ಲಿ ನಮಗೆ ನಿರೀಕ್ಷೆಯಂತೆ ಉದ್ಯೋಗನಿರತರಾಗಿದ್ದಾರೆ ಎಂದು ತಿಳಿಸಿದೆ.

ಝೀ 3ಎಂ ಪ್ರೋಗ್ರಾಂ ಎಂಬ ಮಾಸಿಕ ನಿರ್ವಹಣಾ ಮಾರ್ಗದರ್ಶನವನ್ನು ರಚಿಸಿದೆ. ಇದು ಪ್ರಮುಖ ಕಾರ್ಯಕ್ಷಮತೆಯ ಹಂತಗಳನ್ನು ಸಾಧಿಸಲು ನಿರ್ವಹಣಾ ತಂಡಕ್ಕೆ ಮಾರ್ಗದರ್ಶನ ನೀಡುತ್ತದೆ ಮತ್ತು ಸಕ್ರಿಯಗೊಳಿಸುತ್ತದೆ. ಇತ್ತೀಚೆಗೆ ನಡೆದ 3ಎಂ ಕಾರ್ಯಕ್ರಮದಲ್ಲಿ ಮಂಡಳಿಯಿಂದ ಪಡೆದ ಮಾರ್ಗದರ್ಶನದ ಆಧಾರದ ಮೇಲೆ ಎಂಡಿ, ಸಿಇಒ ಪುನೀತ್‌ ಗೋಯೆಂಕಾ ಅವರು ಟಿಐಸಿಯ ರಚನೆಯನ್ನು ಸರಿಸುಮಾರು 50 ಪ್ರತಿಶತದಷ್ಟು ಕಡಿತಗೊಳಿಸಿದ್ದಾರೆ ಮತ್ತು ಅದರ ಕಾರ್ಯವ್ಯಾಪ್ತಿಯನ್ನು ಸುವ್ಯವಸ್ಥಿತಗೊಳಿಸಿದ್ದಾರೆ ಎಂದು ಕಂಪೆನಿ ಹೇಳಿಕೆಯಲ್ಲಿ ತಿಳಿಸಿದೆ.

ಗ್ರಾಹಕರ ಆದ್ಯತೆಗಳ ಬಗ್ಗೆ ಅಳವಾದ ಅರಿವು ಪಡೆಯಲು ತಂತ್ರಜ್ಞಾನ-ನೇತೃತ್ವದ ಸಾಧನಗಳನ್ನು ಬಳಸಿಕೊಳ್ಳುತ್ತಿದೆ. ಈ ಮೂಲಕ ಕಂಪನಿಯ ಒಟ್ಟಾರೆ ವಿಷಯ ರಚನೆ, ವಿತರಣೆ ಮತ್ತು ಹಣ ಗಳಿಕೆಯ ಪ್ರಕ್ರಿಯೆಯನ್ನು ಹೆಚ್ಚಿಸುವಲ್ಲಿ ಟಿಐಸಿ ತೀಕ್ಷ್ಣವಾದ ಗಮನವನ್ನು ನೀಡಿದೆ ಎಂದು ಅದು ಹೇಳಿದೆ.

"ನಮ್ಮ ವೀಕ್ಷಕರಿಗೆ ಶ್ರೀಮಂತ ಮತ್ತು ಮಹತ್ವದ ಕಂಟೆಟ್‌ ಅನ್ನು ರಚಿಸುವತ್ತ ನಾವು ಗಮನ ಹರಿಸಿದ್ದೇವೆ. ಪ್ರಪಂಚದಾದ್ಯಂತದ ಶತಕೋಟಿ ವೀಕ್ಷಕರ ನಿರೀಕ್ಷೆಗಳಿಗೆ ತಕ್ಕಂತೆ ಬದುಕಲು ನಮ್ಮ ಕೈಯಲ್ಲಿ ದೊಡ್ಡ ಜವಾಬ್ದಾರಿ ಇದೆ. ನಾವು ಅವರ ಹೃದಯಗಳನ್ನು ಗೆಲ್ಲುವುದನ್ನು ಮುಂದುವರಿಸುತ್ತೇವೆ. ಇದನ್ನು ಸಾಧಿಸಲು ನಮಗೆ ಸೃಜನಾತ್ಮಕ ವಿಧಾನ, ತಂತ್ರಜ್ಞಾನದ ಮಿಶ್ರಣದ ಅಗತ್ಯವಿದೆ" ಎಂದು ಗೋಯೆಂಕಾ ಹೇಳಿದ್ದಾರೆ.

ಈ ವಾರದ ಆರಂಭದಲ್ಲಿ ಸಮಿತಿಯು ಟಿಐಸಿಯ ವಿವರವಾದ ವಿಶ್ಲೇಷಣೆಯನ್ನು ನಡೆಸಿದೆ ಎಂದು ಝೀ ಹೇಳಿತ್ತು. ಇದು ಕಳೆದ ವರ್ಷ ಸುಮಾರು 600 ಕೋಟಿ ರೂ. ವೆಚ್ಚ ಮಾಡಿದೆ. 2024-25ರ ಹಣಕಾಸು ವರ್ಷದಲ್ಲಿ ಟಿಐಸಿಯಲ್ಲಿನ ವೆಚ್ಚವನ್ನು ಶೇಕಡಾ 50 ರಷ್ಟು ಕಡಿಮೆ ಮಾಡಲು ಮತ್ತು ಕಂಪನಿಯ ಕಂಟೆಟ್‌ ಡೆವಲಪ್‌ಮೆಂಟ್‌, ವಿತರಣೆ ಮತ್ತು ಹಣಗಳಿಕೆಯ ವಿಧಾನವನ್ನು ಹೆಚ್ಚಿಸಲು ಅದರ ಸೇವೆಗಳನ್ನು ಬಳಸಿಕೊಳ್ಳುವಂತೆ ಸಮಿತಿಯು ಸಲಹೆ ನೀಡಿದೆ.