ನಕಲಿ ಲೋನ್ ಆ್ಯಪ್‌ಗಳ ಬಲೆಗೆ ಬೀಳಬೇಡಿ: ನಿಮ್ಮ ಹಣ ಮತ್ತು ಗೌಪ್ಯತೆ ಕಾಪಾಡಿಕೊಳ್ಳಲು ಇಲ್ಲಿದೆ ಟಿಪ್ಸ್

ಇತ್ತೀಚೆಗೆ ಸೋಶಿಯಲ್ ಮೀಡಿಯಾಗಳಲ್ಲಿ ನಕಲಿ ಡಿಜಿಟಲ್ ಸಾಲ (Digital Loan) ಆ್ಯಪ್‌ಗಳ ಹಾವಳಿ ಬಗ್ಗೆ ಭಾರೀ ಚರ್ಚೆ ನಡೆಯುತ್ತಿದೆ. 'ನಮ್ಮದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಅನುಮೋದಿತ ಆ್ಯಪ್' ಎಂದು ಹೇಳಿಕೊಂಡೇ ಸೈಬರ್ ವಂಚಕರು ಜನರಿಗೆ ಬಲೆ ಬೀಸುತ್ತಿದ್ದಾರೆ. ಆದರೆ, ವಾಸ್ತವದಲ್ಲಿ ಆರ್‌ಬಿಐ ಯಾವುದೇ ಮೊಬೈಲ್ ಆ್ಯಪ್‌ಗಳಿಗೆ ನೇರವಾಗಿ ಅನುಮೋದನೆ ನೀಡುವುದಿಲ್ಲ! ಬ್ಯಾಂಕುಗಳಂತಹ ನಿಯಂತ್ರಿತ ಸಂಸ್ಥೆಗಳಿಗೆ (Regulated Entity - RE) ಮಾತ್ರವೇ ಅದು ಸಾಲ ನೀಡುವ ಲೈಸೆನ್ಸ್ ಕೊಟ್ಟಿರುತ್ತದೆ. ಇನ್ನು ಫಿನ್‌ಟೆಕ್ ಆ್ಯಪ್‌ಗಳು ಕೇವಲ ಸಾಲ ಒದಗಿಸುವ ಸೇವಾದಾರರಾಗಿ (Lending Service Provider - LSP) ಮಾತ್ರ ಕೆಲಸ ಮಾಡುತ್ತವೆ.

ಹಾಗಾಗಿ, ಯಾವುದೇ ಲೋನ್ ಆ್ಯಪ್ ಡೌನ್‌ಲೋಡ್ ಮಾಡುವ ಮುನ್ನ ಅಥವಾ ಒಪ್ಪಂದಕ್ಕೆ ಸಹಿ ಹಾಕುವ ಮೊದಲು ಸಾಲ ನೀಡುವ ಸಂಸ್ಥೆಯ ಅಸಲಿಯತ್ತನ್ನು ಚೆಕ್ ಮಾಡುವುದು ಕಡ್ಡಾಯ. ಪ್ರತಿಯೊಂದು ಅಧಿಕೃತ ಡಿಜಿಟಲ್ ಲೆಂಡಿಂಗ್ ಆ್ಯಪ್ (DLA) ತನ್ನ ಸಹಯೋಗಿ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಯ ವಿವರಗಳನ್ನು ಸ್ಪಷ್ಟವಾಗಿ ಪ್ರದರ್ಶಿಸಲೇಬೇಕು. ಜತೆಗೆ, ವಾರ್ಷಿಕ ಬಡ್ಡಿ ದರ (APR) ಒಳಗೊಂಡ 'ಕೀ ಫ್ಯಾಕ್ಟ್ ಸ್ಟೇಟ್‌ಮೆಂಟ್' (KFS) ನೀಡಬೇಕಾಗುತ್ತದೆ. ಸಾಲದ ಹಣ ಜಮೆಯಾಗುವುದು ಮತ್ತು ಮರುಪಾವತಿಯಾಗುವುದು ಅಧಿಕೃತ ಬ್ಯಾಂಕ್ ಖಾತೆಗಳ ಮೂಲಕವೇ ನಡೆಯಬೇಕು. ಯಾವುದೇ ಕಾರಣಕ್ಕೂ ಮುಂಗಡ ಶುಲ್ಕ ಪಾವತಿಸುವುದು ಅಥವಾ ವೈಯಕ್ತಿಕ ಖಾತೆಗಳಿಗೆ ಹಣ ವರ್ಗಾಯಿಸುವುದು ಮಾಡಬಾರದು.

ಸಾಲ ನೀಡುವವರ ಅಸಲಿಯತ್ತು ತಿಳಿಯುವುದು ಮತ್ತು ವಂಚನೆಯ ಸೂಚನೆಗಳನ್ನು ಗುರುತಿಸುವುದು ಹೇಗೆ?

ಇಂತಹ ಲೋನ್ ಆ್ಯಪ್‌ಗಳ ಅಪಾಯಕಾರಿ ಲಕ್ಷಣಗಳನ್ನು ಮೊದಲೇ ಗುರುತಿಸಿದರೆ ಬ್ಲಾಕ್‌ಮೇಲ್ ಹಾಗೂ ಖಾಸಗಿತನದ ಉಲ್ಲಂಘನೆಯಿಂದ ಬಚಾವ್ ಆಗಬಹುದು. ನಕಲಿ ಆ್ಯಪ್‌ಗಳು ಹೆಚ್ಚಾಗಿ ನಿಮ್ಮ ಫೋನ್‌ನಲ್ಲಿರುವ ಕಾಂಟ್ಯಾಕ್ಟ್‌ಗಳು, ಫೋಟೋಗಳು ಮತ್ತು ಮೆಸೇಜ್‌ಗಳನ್ನು ಪ್ರವೇಶಿಸಲು ಪರ್ಮಿಷನ್ ಕೇರುತ್ತವೆ. ಆದರೆ ಆರ್‌ಬಿಐ ನಿಯಮಗಳ ಪ್ರಕಾರ, ಸಾಲ ನೀಡುವ ಆ್ಯಪ್‌ಗಳು ಕೇವಲ ಕ್ಯಾಮೆರಾ ಮತ್ತು ಲೊಕೇಶನ್‌ಗೆ ಒಮ್ಮೆ ಮಾತ್ರ ಪರ್ಮಿಷನ್ ಕೇಳಬಹುದು. ಇನ್ನು ಕೆಲ ನಿಯಮಬಾಹಿರ ಆ್ಯಪ್‌ಗಳು ಏಳೇ ದಿನಗಳಲ್ಲಿ ಸಾಲ ಮರುಪಾವತಿಸುವಂತೆ ಹೇಳಿ, ಗುಪ್ತ ಶುಲ್ಕಗಳನ್ನು ಹೇರುತ್ತವೆ. ಬೆದರಿಕೆ ಮೆಸೇಜ್‌ಗಳನ್ನು ಕಳುಹಿಸುವ ಯಾವುದೇ ಆ್ಯಪ್ ಆದರೂ ಅದು ಶೇಕಡಾ 100 ರಷ್ಟು ಅಕ್ರಮ ಎಂಬುದನ್ನು ಮರೆಯಬೇಡಿ.

ನಕಲಿ ಲೋನ್ ಆ್ಯಪ್‌ಗಳ ವಿರುದ್ಧ ದೂರು ನೀಡುವುದು ಹೇಗೆ?

ತುರ್ತು ಹಣದ ಅಗತ್ಯವಿದ್ದರೆ ಅಧಿಕೃತ ಬ್ಯಾಂಕ್ ಪೋರ್ಟಲ್‌ಗಳು, ಪ್ರಿ-ಅಪ್ರೂವ್ಡ್ ಕ್ರೆಡಿಟ್ ಲೈನ್‌ಗಳು ಅಥವಾ ಕ್ರೆಡಿಟ್ ಆನ್ ಯುಪಿಐ (Credit-on-UPI) ಆಯ್ಕೆಗಳನ್ನು ಬಳಸುವುದು ಸುರಕ್ಷಿತ. ಯಾವುದೇ ಸಾಲ ಸೌಲಭ್ಯವನ್ನು ಆಯ್ಕೆ ಮಾಡುವ ಮುನ್ನ ಬಡ್ಡಿ ದರ ಹಾಗೂ ಮರುಪಾವತಿ ಶರತ್ತುಗಳನ್ನು ಚೆನ್ನಾಗಿ ಹೋಲಿಸಿ ನೋಡಿ. ಒಂದು ವೇಳೆ ನೀವು ಅಕ್ರಮ ಆ್ಯಪ್‌ಗಳ ಜಾಲಕ್ಕೆ ಸಿಲುಕಿದರೆ, ತಕ್ಷಣವೇ ಎಲ್ಲಾ ವಹಿವಾಟಿನ ವಿವರ ಹಾಗೂ ಬಂದಿರುವ ಬೆದರಿಕೆ ಮೆಸೇಜ್‌ಗಳ ಸಾಕ್ಷಿಗಳನ್ನು ಜೋಪಾನವಾಗಿಟ್ಟುಕೊಳ್ಳಿ. ಇಂತಹ ನಕಲಿ ಆ್ಯಪ್‌ಗಳ ಬಗ್ಗೆ ಆರ್‌ಬಿಐನ 'ಸಚೇತ್' ಪೋರ್ಟಲ್‌ (sachet.rbi.org.in) ನಲ್ಲಿ ದೂರು ನೀಡಬಹುದು. ಹಣಕಾಸು ವಂಚನೆಗೊಳಗಾದ ಸಂತ್ರಸ್ತರು ತಕ್ಷಣವೇ ರಾಷ್ಟ್ರೀಯ ಸೈಬರ್ ಕ್ರೈಮ್ ಹೆಲ್ಪ್‌ಲೈನ್ ಸಂಖ್ಯೆ 1930 ಗೆ ಕರೆ ಮಾಡಬೇಕು.

ಡಿಜಿಟಲ್ ಲೋನ್ ವಂಚನೆಗಳಿಂದ ತಪ್ಪಿಸಿಕೊಳ್ಳಲು ಜಾಗರೂಕತೆಯೇ ಅತ್ಯುತ್ತಮ ಮಾರ್ಗ. ಹಣವನ್ನು ಪಡೆಯುವ ಮುನ್ನ ಆ ಆ್ಯಪ್ ಅಥವಾ ಸಂಸ್ಥೆಯ ಹೆಸರನ್ನು ಆರ್‌ಬಿಐ ಅಧಿಕೃತ ಪಟ್ಟಿಯಲ್ಲಿ ಪರಿಶೀಲಿಸುವುದು ಒಳಿತು. ಸಕಾಲದಲ್ಲಿ ನೀಡುವ ದೂರು ನಿಮ್ಮ ಹಣಕಾಸಿನ ಭದ್ರತೆಯನ್ನು ಕಾಯುವುದಷ್ಟೇ ಅಲ್ಲದೆ, ಇತರರಿಗೂ ವಂಚನೆಯಾಗದಂತೆ ತಡೆಯುತ್ತದೆ. ಸಾಲ ಪಡೆಯುವಾಗ ವಹಿಸುವ ಸಣ್ಣ ಮುನ್ನೆಚ್ಚರಿಕೆ ನಿಮ್ಮನ್ನು ದೊಡ್ಡ ಅಪಾಯದಿಂದ ಪಾರು ಮಾಡುತ್ತದೆ.