ಎಚ್‌ಡಿಎಫ್‌ಸಿ ಬ್ಯಾಂಕ್ ಗ್ರಾಹಕರಿಗೆ ಶಾಕ್: ಇನ್ಮುಂದೆ ವಿದೇಶಿ ಪೇಮೆಂಟ್‌ಗೆ ಹೆಚ್ಚುವರಿ ಶುಲ್ಕ ಪಾವತಿಸಬೇಕಾ? ತಪ್ಪಿಸಿಕೊಳ್ಳುವುದು ಹೇಗೆ?

ಎಚ್‌ಡಿಎಫ್‌ಸಿ ಬ್ಯಾಂಕ್ (HDFC Bank) ತನ್ನ ಗ್ರಾಹಕರಿಗೆ ಶಾಕ್ ನೀಡಿದ್ದು, ಮೇ 17 ರಿಂದ ಹೊಸ ಶುಲ್ಕ ನಿಯಮಗಳನ್ನು ಜಾರಿಗೆ ತಂದಿದೆ. ನೀವು ವಿದೇಶಿ ಕಂಪನಿಗಳಿಗೆ ಅಥವಾ ವಿದೇಶದಲ್ಲಿ ಭಾರತೀಯ ರೂಪಾಯಿ (INR) ಮೂಲಕ ಹಣ ಪಾವತಿಸಿದರೆ, ಇನ್ಮುಂದೆ 1.75 ಪ್ರತಿಶತದಷ್ಟು 'ಡೈನಾಮಿಕ್ ಕರೆನ್ಸಿ ಕನ್ವರ್ಶನ್' (DCC) ಶುಲ್ಕ ಪಾವತಿಸಬೇಕಾಗುತ್ತದೆ. ಆನ್‌ಲೈನ್ ಅಥವಾ ಆಫ್‌ಲೈನ್ ಯಾವುದೇ ಇಂಟರ್ನ್ಯಾಷನಲ್ ಟ್ರಾನ್ಸಾಕ್ಷನ್ ಮಾಡಿದರೂ ಈ ನಿಯಮ ಅನ್ವಯವಾಗಲಿದೆ. ಕ್ರೆಡಿಟ್ ಕಾರ್ಡ್ ಬಳಕೆದಾರರ ಪಾಲಿಗೆ ಇದೊಂದು ಪ್ರಮುಖ ಬದಲಾವಣೆಯಾಗಿದೆ.

ನೆಟ್‌ಫ್ಲಿಕ್ಸ್‌ನಂತಹ ಸ್ಟ್ರೀಮಿಂಗ್ ಸೇವೆಗಳು ಅಥವಾ ಅಂತರಾಷ್ಟ್ರೀಯ ಟ್ರಾವೆಲ್ ಬುಕಿಂಗ್ ವೆಬ್‌ಸೈಟ್‌ಗಳಂತಹ ಅನೇಕ ಜಾಗತಿಕ ಪ್ಲಾಟ್‌ಫಾರ್ಮ್‌ಗಳು ವಿದೇಶಿ ಪೇಮೆಂಟ್ ಗೇಟ್‌ವೇಗಳನ್ನು ಬಳಸುತ್ತವೆ. ಇಲ್ಲಿ ನೀವು ಬೆಲೆಯನ್ನು ರೂಪಾಯಿಯಲ್ಲೇ ನೋಡಿದರೂ, ಆ ಕಂಪನಿಗಳು ವಿದೇಶದಲ್ಲಿ ನೋಂದಣಿಯಾಗಿರುವುದರಿಂದ ಈ ಶುಲ್ಕ ಅನ್ವಯವಾಗುತ್ತದೆ. ಈ ಮೊದಲು ಇಂತಹ ವಹಿವಾಟುಗಳಿಗೆ ಬ್ಯಾಂಕ್ ಯಾವುದೇ ಹೆಚ್ಚುವರಿ ಶುಲ್ಕ ವಿಧಿಸುತ್ತಿರಲಿಲ್ಲ. ಆದರೆ ಈಗ ಕ್ರಾಸ್-ಬಾರ್ಡರ್ ಪ್ರೊಸೆಸಿಂಗ್ ವೆಚ್ಚ ಸರಿದೂಗಿಸಲು ಎಚ್‌ಡಿಎಫ್‌ಸಿ ಈ ಹೊಸ ಶುಲ್ಕವನ್ನು ಜಾರಿಗೆ ತಂದಿದೆ.

ಎಚ್‌ಡಿಎಫ್‌ಸಿ ಬ್ಯಾಂಕ್ ಕಾರ್ಡ್‌ಗಳ ಮೇಲಿನ DCC ಮಾರ್ಕಪ್ ಎಂದರೇನು?

ನೀವು ವಿದೇಶ ಪ್ರವಾಸದಲ್ಲಿದ್ದಾಗ ಅಥವಾ ಡ್ಯೂಟಿ-ಫ್ರೀ ಶಾಪ್‌ಗಳಲ್ಲಿ ಕಾರ್ಡ್ ಸ್ವೈಪ್ ಮಾಡುವಾಗ (POS), ರೂಪಾಯಿಯಲ್ಲಿ ಪಾವತಿಸುತ್ತೀರಾ ಎಂದು ಕೇಳಲಾಗುತ್ತದೆ. ನೀವು ಅಲ್ಲಿ 'INR' ಆಯ್ಕೆ ಮಾಡಿದರೆ ತಕ್ಷಣವೇ 1.75% DCC ಶುಲ್ಕ ಅನ್ವಯವಾಗುತ್ತದೆ. ಈ ಶುಲ್ಕವು ನಿಮ್ಮ ಬ್ಯಾಂಕ್ ಸ್ಟೇಟ್‌ಮೆಂಟ್‌ನಲ್ಲಿ ಪ್ರತ್ಯೇಕವಾಗಿ ಕಾಣಿಸಿಕೊಳ್ಳುತ್ತದೆ. ಇದು ಸಾಮಾನ್ಯ ವಿದೇಶಿ ವಿನಿಮಯ (FCY) ಶುಲ್ಕಕ್ಕಿಂತ ಹೆಚ್ಚುವರಿಯಾಗಿರುತ್ತದೆ ಎಂಬುದು ನೆನಪಿರಲಿ.

ವಹಿವಾಟಿನ ವಿಧ	ಶುಲ್ಕದ ದರ
ದೇಶೀಯ ಕರೆನ್ಸಿ (DCC)	1.75 ಪ್ರತಿಶತ
ವಿದೇಶಿ ಕರೆನ್ಸಿ (FCY)	ಕಾರ್ಡ್‌ಗೆ ಅನುಗುಣವಾಗಿ ಬದಲಾಗುತ್ತದೆ

DCC ಹೆಚ್ಚುವರಿ ಶುಲ್ಕದಿಂದ ತಪ್ಪಿಸಿಕೊಳ್ಳುವುದು ಹೇಗೆ?

ನೀವು ಪದೇ ಪದೇ ವಿದೇಶ ಪ್ರವಾಸ ಮಾಡುವವರಾಗಿದ್ದರೆ, ಈ ಸಣ್ಣ ಮೊತ್ತದ ಶುಲ್ಕಗಳು ನಿಮ್ಮ ಒಟ್ಟು ಖರ್ಚನ್ನು ಹೆಚ್ಚಿಸಬಹುದು. ಅಷ್ಟೇ ಅಲ್ಲ, ಆಪಲ್ ಅಥವಾ ಗೂಗಲ್‌ನಂತಹ ವಿದೇಶಿ ಮೂಲದ ಆಪ್‌ಗಳ ಮಾಸಿಕ ಸಬ್‌ಸ್ಕ್ರಿಪ್ಶನ್ ಶುಲ್ಕಗಳ ಮೇಲೂ ಇದು ಪರಿಣಾಮ ಬೀರಲಿದೆ. ನಿಮ್ಮ ಹಣಕಾಸಿನ ನಿರ್ವಹಣೆಯನ್ನು ಸರಿಯಾಗಿ ಮಾಡಲು ಮತ್ತು ಬಿಲ್‌ನಲ್ಲಿ ಅನಿರೀಕ್ಷಿತ ಶುಲ್ಕಗಳನ್ನು ತಪ್ಪಿಸಲು ಈ ಬಗ್ಗೆ ಮಾಹಿತಿ ಇರುವುದು ಅಗತ್ಯ.

ಈ ಹೆಚ್ಚುವರಿ ವೆಚ್ಚವನ್ನು ತಪ್ಪಿಸಲು ಒಂದು ಸರಳ ದಾರಿಯಿದೆ. ವಿದೇಶದಲ್ಲಿ ಶಾಪಿಂಗ್ ಮಾಡುವಾಗ ಯಾವಾಗಲೂ ಅಲ್ಲಿನ ಸ್ಥಳೀಯ ಕರೆನ್ಸಿಯನ್ನೇ ಆಯ್ಕೆ ಮಾಡಿ. ಅಂದರೆ, ರೂಪಾಯಿಯ ಬದಲಿಗೆ ಡಾಲರ್ ಅಥವಾ ಯೂರೋ ಮೂಲಕವೇ ಪಾವತಿಸಿ. ಇದರಿಂದ ನೀವು ಬ್ಯಾಂಕ್‌ನ ಸಾಮಾನ್ಯ ಕನ್ವರ್ಶನ್ ದರವನ್ನು ಮಾತ್ರ ಪಾವತಿಸುತ್ತೀರಿ. ಆನ್‌ಲೈನ್ ಪೇಮೆಂಟ್ ಮಾಡುವ ಮೊದಲು ಆ ಕಂಪನಿ ಎಲ್ಲಿ ನೋಂದಣಿಯಾಗಿದೆ ಎಂಬುದನ್ನು ಒಮ್ಮೆ ಪರಿಶೀಲಿಸಿ. ಇಂತಹ ಸಣ್ಣ ಎಚ್ಚರಿಕೆಗಳು ನಿಮ್ಮ ಕಷ್ಟದ ಗಳಿಕೆಯನ್ನು ಅನಗತ್ಯ ಖರ್ಚಿನಿಂದ ಉಳಿಸುತ್ತವೆ.