ಜಾಬ್ ಜತೆ ಪಾರ್ಟ್ ಟೈಂ ಕೆಲಸ, ಆದಾಯ ಮುಚ್ಚಿಟ್ಟರೆ ಸಂಕಟ!

ನವದೆಹಲಿ, ಆಗಸ್ಟ್‌ 13: ಕೊರೋನಾ ನಂತರ ಮೂನ್ ಲೈಟಿಂಗ್ ದೊಡ್ಡ ಸದ್ದು ಮಾಡಿತ್ತು. ಮೂನ್ ಲೈಟಿಂಗ್ ಮಾಡುತ್ತಿದ್ದವರ ಮೇಲೆ ಅನೇಕ ಕಂಪನಿಗಳು ಕಠಿಣ ಕ್ರಮ ತೆಗೆದುಕೊಂಡಿದ್ದವು.

ರೆಗ್ಯುಲರ್ ಜಾಬ್ ಜೊತೆಗೆ ಯಾವುದೇ ಹೆಚ್ಚುವರಿ ಕೆಲಸ ಮಾಡಿದರೆ ಅದನ್ನು ಮೂನ್‌ಲೈಟಿಂಗ್‌ ಅಂತ ಹೇಳಲಾಗುತ್ತದೆ. ಸರಳವಾಗಿ ಹೇಳಬೇಕು ಎಂದರೆ 9 ಗಂಟೆಗಳವರೆಗೆ ನೀವು ಒಂದು ಕಂಪನಿಗೆ ಕೆಲಸ ಮಾಡುತ್ತೀರಿ. ಅದು ಮುಗಿದ ಮೇಲೆ ಇನ್ನೊಂದು ಕಂಪನಿಗೆ ಕೆಲಸ ಮಾಡುತ್ತೀರಿ. ಇದನ್ನೇ ಮೂನ್‌ಲೈಟಿಂಗ್‌ ಎಂದು ಕರೆಯಲಾಗುತ್ತದೆ. ಇದರಿಂದ ಗಳಿಸಿದ ಹಣವನ್ನ ಮೂನ್‌ಲೈಟಿಂಗ್‌ನಿಂದ ಬಂದ ಆದಾಯ ಎಂದು ಕರೆಯಲಾಗುತ್ತದೆ. ಆದಾಯ ತೆರಿಗೆಯಲ್ಲಿ ಮೂನ್‌ಲೈಟಿಂಗ್‌ಗೆ ಪ್ರತ್ಯೇಕ ವಿಭಾಗ ಇಲ್ಲ. ಆದರೆ, ಪ್ರತ್ಯೇಕ ವಿಭಾಗ ಇಲ್ಲ ಎಂದ ಮಾತ್ರಕ್ಕೆ ಅದಕ್ಕೆ ತೆರಿಗೆ ಕಟ್ಟಬೇಕಾಗಿಲ್ಲ ಎಂದಲ್ಲ. ಹೆಚ್ಚುವರಿ ಆದಾಯದ ಮೇಲೆ ಹಾಕುವ ತೆರಿಗೆ ಕೆಲಸದ ರೀತಿಯ ಮೇಲೆ ಅವಲಂಬಿಸಿರುತ್ತೆ.

ಇದನ್ನು ಸಂಬಳದ ಆದಾಯ ಎಂದೇ ಪರಿಗಣಿಸಲಾಗುತ್ತದೆ. ಪ್ರೊಫೆಷನಲ್ ಫೀ ಅಥವಾ ಬ್ಯುಸಿನೆಸ್ ಇನ್‌ಕಮ್ ಎಂಬುದನ್ನು ಆಧರಿಸಿರುತ್ತದೆ. ಮೂನ್‌ಲೈಟಿಂಗ್ ಆದಾಯವು ಸ್ಯಾಲರಿ ರೂಪದಲ್ಲಿದ್ದರೆ, ನೀವು ಅದನ್ನು ನಿಮ್ಮ ಮೂಲ ಕಂಪನಿಯ ಆದಾಯದ ಜೊತೆಗೆ ಸ್ಯಾಲರಿ ವಿಭಾಗದಲ್ಲಿ ತೋರಿಸಬಹುದು.

ಕಡಿತ ಮತ್ತು ವಿನಾಯಿತಿಯ ನಂತರ, ಮೂನ್‌ಲೈಟಿಂಗ್‌ನ ಆದಾಯವನ್ನ ಸ್ಲಾಬ್‌ ರೇಟ್‌ಗೆ ಅನುಗುಣವಾಗಿ ವಿಧಿಸಲಾಗುತ್ತೆ. ಸ್ಟಾಂಡರ್ಡ್‌ ಡಿಡಕ್ಷನ್‌, 80ಸಿ, 80ಡಿ, ರೀತಿ ಕ್ಲೇಮ್ ಕೂಡ ಮಾಡಬಹುದು. ಎರಡನೇ ಉದ್ಯೋಗದ ಗಳಿಕೆ ಫ್ರೀಲಾನ್ಸ್‌ ಕೆಲಸ ಅಥವಾ ಪ್ರೊಫೆಷನಲ್ ಫೀ ಇಂದ ಬಂದ ಹಣವಾಗಿದ್ದರೆ ಬ್ಯುಸಿನೆಸ್ ಮತ್ತು ಪ್ರೊಫೆಷನ್ ವಿಭಾಗದಲ್ಲಿ ಇದರ ಆದಾಯವನ್ನು ದಾಖಲಿಸಬೇಕು. ಇದು ಬ್ಯುಸಿನೆಸ್ ಅಥವಾ ಪ್ರೊಫೆಷನ್‌ನಿಂದ ಬಂದ ಆದಾಯದ ಹಾಗೆ ಈ ಗಳಿಕೆಗೂ ತೆರಿಗೆ ವಿಧಿಸಲಾಗುತ್ತದೆ.

ಮೂನ್‌ಲೈಟಿಂಗ್ ಆದಾಯವನ್ನು ಸಂಬಳದ ರೂಪದಲ್ಲಿ ಪಡೆದರೆ, ಅದನ್ನು ಐಟಿಆರ್‌ 1 ಫಾರ್ಮ್‌ನಲ್ಲಿ ತೋರಿಸಬೇಕು. ಆದರೆ, ಆದಾಯ 50 ಲಕ್ಷ ಅಥವಾ ಹೆಚ್ಚಾದರೆ ಅಥವಾ ಕ್ಯಾಪಿಟಲ್ ಗೇನ್ಸ್‌ ಇದ್ದರೆ, ಆಗ ಐಟಿಆರ್‌ 2 ಫಾರ್ಮ್ ಸಲ್ಲಿಸಬೇಕು. ಇದೇ ರೀತಿ, ಬ್ಯುಸಿನೆಸ್ ಅಥವಾ ಪ್ರೊಫೆಷನಲ್ ಫೀ ರೂಪದಲ್ಲಿ ಹೆಚ್ಚುವರಿ ಆದಾಯ ಇದ್ದರೆ, ತೆರಿಗೆದಾರರು ಪ್ರಿಸಂಪ್ಟಿವ್ ಟ್ಯಾಕ್ಸೇಶನ್ ಸ್ಕೀಮ್ ಅನ್ನ ಆಯ್ಕೆ ಮಾಡಿಕೊಂಡಿದ್ದರೆ, ಆಗ ಐಟಿಆರ್‌ 4 ಫಾರ್ಮ್‌ ಸಲ್ಲಿಸಬೇಕಾಗುತ್ತದೆ. ಪ್ರೊಫೆಷನಲ್ ಫೀ ಇಂದ ಒಟ್ಟು ಆದಾಯ 50 ಲಕ್ಷಕ್ಕಿಂತ ಹೆಚ್ಚಿದ್ದರೆ, ಅದನ್ನ ಐಟಿಆರ್‌ 3 ಫಾರ್ಮ್‌ನಲ್ಲಿ ತೋರಿಸಬೇಕು.

ಫ್ರೀಲಾನ್ಸರ್‌ಗಳು ಮತ್ತು ಕನ್ಸಲ್ಟಂಟ್‌ಗಳು ಪ್ರಿಸಂಪ್ಟಿವ್ ಟ್ಯಾಕ್ಸ್ ಸ್ಕೀಮ್ ಅನ್ನು ಆದಾಯ ತೆರಿಗೆ ಕಾಯ್ದೆ ಪ್ರಕಾರ ಆಯ್ಕೆ ಮಾಡಿಕೊಳ್ಳಬಹುದು. ಸೆಕ್ಷನ್‌ 44ಎಡಿಎ ಪ್ರಕಾರ, 50 ಲಕ್ಷಕ್ಕಿಂತ ಹೆಚ್ಚು ಒಟ್ಟು ಆದಾಯ ಮೀರದಿದ್ದರೆ ಅಂತಹ ಪ್ರೊಫೆಷನಲ್‌ಗಳಿಗೆ ಈ ಸ್ಕೀಮ್ ಅನ್ವಯ ಆಗುತ್ತದೆ. ಈ ಸ್ಕೀಮ್ ಅಡಿಯಲ್ಲಿ ವೃತ್ತಿಪರರು ತಮ್ಮ 50% ಒಟ್ಟು ಆದಾಯವನ್ನು ಪ್ರಿಸಂಪ್ಟಿವ್ ಆದಾಯ ಅಂತ ತೋರಿಸಬಹುದು. ಲೆಕ್ಕಾಚಾರ ಆ ಮೊತ್ತದ ಮೇಲೆಯೇ ಮಾಡಲಾಗುತ್ತದೆ. ಲೀಗಲ್, ಮೆಡಿಕಲ್, ಇಂಜಿನಿಯರಿಂಗ್, ಟೆಕ್ನಿಕಲ್ ಕನ್ಸಲ್ಟನ್ಸಿ, ಆರ್ಕಿಟೆಕ್ಟ್ ಗಳು ಮತ್ತು ಇತರ ವೃತ್ತಿಯವರು ಈ ಸ್ಕೀಮ್‌ನಲ್ಲಿ ಬರುತ್ತಾರೆ ಎಂದು ಸಿಬಿಡಿಟಿ ತಿಳಿಸಿದೆ.

ಮೂನ್‌ಲೈಟಿಂಗ್ ಸರ್ವೀಸ್‌ಗಳಿಗೆ ಕಂಪನಿಗಳು ಅಥವಾ ವೆಂಡರ್‌ಗಳು ಪಾವತಿ ಮಾಡುವಾಗ ತೆರಿಗೆ ಕಡಿತ ಮಾಡಲಾಗುತ್ತದೆ. ಈ ಮೊತ್ತವನ್ನ ಸರ್ಕಾರಕ್ಕೆ ನೀಡಲಾಗುತ್ತದೆ. ಅಂದರೆ, ನೀವು ಈ ಚಟುವಟಿಕೆಯಲ್ಲಿ ಹಣ ಗಳಿಸುತ್ತಿದ್ದೀರಿ ಎಂದು ಸರ್ಕಾರಕ್ಕೆ ಗೊತ್ತಾಗುತ್ತದೆ. ಇಂತಹ ಸನ್ನಿವೇಶದಲ್ಲಿ, ಮೂನ್‌ಲೈಟಿಂಗ್‌ ಆದಾಯವನ್ನು ಮುಚ್ಚಿಡುವುದರ ಬದಲಿಗೆ, ನಿಮ್ಮ ತೆರಿಗೆ ರಿಟರ್ನ್‌ನಲ್ಲಿ ನೀವು ಅದನ್ನ ಘೋಷಣೆ ಮಾಡಿಕೊಂಡು, ತೆರಿಗೆ ಕಟ್ಟಬೇಕು, ಇಲ್ಲವಾದರೆ, ಆದಾಯ ತೆರಿಗೆ ಇಲಾಖೆಯಿಂದ ನೋಟಿಸ್ ಬರಬಹುದು ಎಚ್ಚರ!