ಅಲ್ಪಾವಧಿ ಹೂಡಿಕೆ: ಎಫ್‌ಡಿಗಿಂತ ಮ್ಯೂಚುವಲ್ ಫಂಡ್ ಉತ್ತಮವೇ? ನಿಮ್ಮ ಹಣಕ್ಕೆ ಯಾವುದು ಸುರಕ್ಷಿತ?

ಇತ್ತೀಚೆಗೆ ರೂಪಾಯಿ ಮೌಲ್ಯ ಕುಸಿತ ಹಾಗೂ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಏರಿಳಿತದಿಂದಾಗಿ ಶೇರು ಮಾರುಕಟ್ಟೆಯಲ್ಲಿ ಅನಿಶ್ಚಿತತೆಯ ವಾತಾವರಣ ನಿರ್ಮಾಣವಾಗಿದೆ. ಹೀಗಾಗಿ, ಭಾರತೀಯ ಹೂಡಿಕೆದಾರರು ತಮ್ಮ ಬಳಿ ಇರುವ ಹೆಚ್ಚುವರಿ ಹಣವನ್ನು ಸುರಕ್ಷಿತ ಮತ್ತು ಸುಲಭವಾಗಿ ಹಿಂಪಡೆಯಬಹುದಾದ ಹೂಡಿಕೆ ಮಾರ್ಗಗಳಲ್ಲಿ ತೊಡಗಿಸಲು ಆಸಕ್ತಿ ತೋರಿಸುತ್ತಿದ್ದಾರೆ. 7 ರಿಂದ 90 ದಿನಗಳ ಅಲ್ಪಾವಧಿಗೆ ಬ್ಯಾಂಕ್ ಫಿಕ್ಸ್ಡ್ ಡೆಪಾಸಿಟ್ (FD) ಸಂಪೂರ್ಣ ಸುರಕ್ಷತೆಯ ಗ್ಯಾರಂಟಿ ನೀಡುತ್ತದೆ. ಇನ್ನೊಂದೆಡೆ, ಡೆಟ್ ಮ್ಯೂಚುವಲ್ ಫಂಡ್‌ಗಳು (Debt MF) ಹೆಚ್ಚಿನ ಲಿಕ್ವಿಡಿಟಿ ನೀಡುವ ಜೊತೆಗೆ ದಿನಂಪ್ರತಿ ಉತ್ತಮ ಆದಾಯ ತಂದುಕೊಡುತ್ತವೆ.

ಅಲ್ಪಾವಧಿ ಹೂಡಿಕೆಗೆ ಹೂಡಿಕೆದಾರರು ಸಾಮಾನ್ಯವಾಗಿ ಬ್ಯಾಂಕ್ ಡೆಪಾಸಿಟ್ ಅಥವಾ ವಿಶೇಷ ಡೆಟ್ ಯೋಜನೆಗಳನ್ನು ಆಯ್ಕೆ ಮಾಡುತ್ತಾರೆ. ಓವರ್‌ನೈಟ್ ಫಂಡ್‌ಗಳು ಕೇವಲ ಒಂದು ದಿನದ ಅವಧಿಯ ಸಾಲದ ಪತ್ರಗಳಲ್ಲಿ (ಡೆಟ್ ಸೆಕ್ಯುರಿಟೀಸ್) ಹೂಡಿಕೆ ಮಾಡುವುದರಿಂದ ಬಂಡವಾಳದ ರಿಸ್ಕ್ ತೀರಾ ಕಡಿಮೆ ಇರುತ್ತದೆ. ಲಿಕ್ವಿಡ್ ಫಂಡ್‌ಗಳು 91 ದಿನಗಳ ಒಳಗೆ ಮೆಚ್ಯೂರ್ ಆಗುವ ಕಡಿಮೆ ರಿಸ್ಕ್ ಇರುವ ಸಾಧನಗಳಲ್ಲಿ ಹೂಡಿಕೆ ಮಾಡಿ ಸ್ಥಿರ ರಿಟರ್ನ್ಸ್ ನೀಡುತ್ತವೆ. ಇನ್ನು ಆರ್ಬಿಟ್ರೇಜ್ ಫಂಡ್‌ಗಳು ಕ್ಯಾಶ್ ಮತ್ತು ಡೆರಿವೇಟಿವ್ ಮಾರುಕಟ್ಟೆ ನಡುವಿನ ಬೆಲೆ ವ್ಯತ್ಯಾಸದ ಲಾಭ ಪಡೆದು, ಈಕ್ವಿಟಿ ತೆರಿಗೆಯ ಪ್ರಯೋಜನಗಳೊಂದಿಗೆ ಕಡಿಮೆ ರಿಸ್ಕ್‌ನಲ್ಲಿ ಉತ್ತಮ ಆದಾಯ ತಂದುಕೊಡುತ್ತವೆ.

ಆಯ್ಕೆ	ಹೂಡಿಕೆ ಅವಧಿ	ತೆರಿಗೆ ದರ	ಲಿಕ್ವಿಡಿಟಿ (ಹಣ ಹಿಂಪಡೆಯುವಿಕೆ)
ಬ್ಯಾಂಕ್ ಎಫ್‌ಡಿ (Bank FD)	7 ರಿಂದ 90 ದಿನಗಳು	ಟ್ಯಾಕ್ಸ್ ಸ್ಲ್ಯಾಬ್ ದರ	ಅವಧಿಗೆ ಮುನ್ನ ಹಿಂಪಡೆದರೆ ಪೆನಾಲ್ಟಿ
ಓವರ್‌ನೈಟ್ ಮ್ಯೂಚುವಲ್ ಫಂಡ್	1 ರಿಂದ 7 ದಿನಗಳು	ಟ್ಯಾಕ್ಸ್ ಸ್ಲ್ಯಾಬ್ ದರ	T+1 ಕೆಲಸದ ದಿನ
ಲಿಕ್ವಿಡ್ ಮ್ಯೂಚುವಲ್ ಫಂಡ್	7 ರಿಂದ 30 ದಿನಗಳು	ಟ್ಯಾಕ್ಸ್ ಸ್ಲ್ಯಾಬ್ ದರ	ನಿಗದಿತ ಮಿತಿಯವರೆಗೆ ತಕ್ಷಣವೇ ಸಿಗುತ್ತೆ
ಆರ್ಬಿಟ್ರೇಜ್ ಮ್ಯೂಚುವಲ್ ಫಂಡ್	30 ರಿಂದ 90 ದಿನಗಳು	20% STCG	T+2 ಕೆಲಸದ ದಿನಗಳು

ಅಲ್ಪಾವಧಿ ಎಫ್‌ಡಿ vs ಲಿಕ್ವಿಡ್ ಮ್ಯೂಚುವಲ್ ಫಂಡ್: ಇಲ್ಲಿದೆ ಕಂಪ್ಲೀಟ್ ಹೋಲಿಕೆ

ಅಲ್ಪಾವಧಿ ಹೂಡಿಕೆಯಲ್ಲಿ ಸಿಗುವ ಅಂತಿಮ ರಿಟರ್ನ್ಸ್ ಮೇಲೆ ತೆರಿಗೆ ನಿಯಮಗಳು ದೊಡ್ಡ ಮಟ್ಟದ ಪ್ರಭಾವ ಬೀರುತ್ತವೆ. ಡೆಟ್ ಫಂಡ್ ಹಾಗೂ ಬ್ಯಾಂಕ್ ಡೆಪಾಸಿಟ್‌ಗಳಿಂದ ಬರುವ ಲಾಭವು ನಿಮ್ಮ ಒಟ್ಟು ಆದಾಯಕ್ಕೆ ಸೇರ್ಪಡೆಯಾಗಿ, ನಿಮ್ಮ ಇನ್‌ಕಮ್ ಟ್ಯಾಕ್ಸ್ ಸ್ಲ್ಯಾಬ್ ಪ್ರಕಾರ ತೆರಿಗೆ ಅನ್ವಯವಾಗುತ್ತದೆ. ಆದರೆ, ಆರ್ಬಿಟ್ರೇಜ್ ಫಂಡ್‌ಗಳಿಗೆ ಈಕ್ವಿಟಿ ತೆರಿಗೆ ನಿಯಮಗಳು ಅನ್ವಯಿಸುವುದರಿಂದ, ಹೆಚ್ಚಿನ ಇನ್‌ಕಮ್ ಟ್ಯಾಕ್ಸ್ ಬ್ರಾಕೆಟ್‌ನಲ್ಲಿರುವವರಿಗೆ ತೆರಿಗೆ ಉಳಿಸಲು ಇದು ವರದಾನವಾಗಿದೆ. ಇನ್ನು ಬ್ಯಾಂಕ್ ಎಫ್‌ಡಿಗಳನ್ನು ಅವಧಿಗಿಂತ ಮುಂಚಿತವಾಗಿ ಹಿಂಪಡೆದರೆ ದಂಡ (ಪೆನಾಲ್ಟಿ) ತೆರಬೇಕಾಗುತ್ತದೆ. ಆದರೆ, ಲಿಕ್ವಿಡ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡಿದ ಮೊದಲ ಆರು ದಿನಗಳ ಒಳಗೆ ವಿತ್‌ಡ್ರಾ ಮಾಡಿದರೆ ಮಾತ್ರ ತೀರ ಅಲ್ಪ ಪ್ರಮಾಣದ ಎಕ್ಸಿಟ್ ಲೋಡ್ ಇರುತ್ತದೆ.

ನಿಮ್ಮ ಹಣಕಾಸಿನ ಅಗತ್ಯತೆ ಮತ್ತು ಇನ್‌ಕಮ್ ಟ್ಯಾಕ್ಸ್ ಸ್ಲ್ಯಾಬ್‌ಗೆ ಅನುಗುಣವಾಗಿ ಸೂಕ್ತ ಹೂಡಿಕೆ ಮಾರ್ಗವನ್ನು ಆಯ್ಕೆ ಮಾಡಿಕೊಳ್ಳುವುದು ಜಾಣತನ. ತುರ್ತು ನಿಧಿಗಾಗಿ (Emergency Fund) ಹಣ ಕಾಯ್ದಿರಿಸುವ ಉದ್ಯೋಗಿಗಳಿಗೆ ತಕ್ಷಣ ಹಣ ಹಿಂಪಡೆಯುವ ಸೌಲಭ್ಯವಿರುವ ಲಿಕ್ವಿಡ್ ಫಂಡ್‌ಗಳು ಬೆಸ್ಟ್. ಶೇರು ಮಾರುಕಟ್ಟೆಯಲ್ಲಿ ಮಾರ್ಜಿನ್ ಫ್ಲೆಕ್ಸಿಬಿಲಿಟಿ ಬಯಸುವ ಸಕ್ರಿಯ ಟ್ರೇಡರ್‌ಗಳಿಗೆ ಓವರ್‌ನೈಟ್ ಫಂಡ್‌ಗಳು ಸುರಕ್ಷತೆ ಹಾಗೂ ಕ್ಷಿಪ್ರ ಸೆಟಲ್‌ಮೆಂಟ್ ನೀಡುತ್ತವೆ. ಇನ್ನು ನಿಗದಿತ ಹಾಗೂ ಖಾತರಿಯ ರಿಟರ್ನ್ಸ್ ಬಯಸುವ ಜ್ಯೇಷ್ಠ ನಾಗರಿಕರು/ನಿವೃತ್ತರಿಗೆ ಬ್ಯಾಂಕ್ ಎಫ್‌ಡಿಗಳೇ ಸೂಕ್ತ. ನಿಮ್ಮ ಹೂಡಿಕೆ ಅವಧಿ ಮತ್ತು ನಿಯಮಗಳನ್ನು ಸರಿಯಾಗಿ ಅರ್ಥೈಸಿಕೊಂಡು ಹೆಜ್ಜೆ ಇಟ್ಟರೆ ಗರಿಷ್ಠ ಸುರಕ್ಷತೆ ಹಾಗೂ ಲಿಕ್ವಿಡಿಟಿ ಎರಡನ್ನೂ ಪಡೆಯಬಹುದು.