ಎಫ್‌ಡಿ ಮೇಲೆ ಸಾಲ ಅಥವಾ ಅವಧಿಗೂ ಮುನ್ನ ಹಿಂಪಡೆತ, ಯಾವುದು ಉತ್ತಮ?

ದೇಶದಲ್ಲಿ ಆರ್ಥಿಕ ಚಟುವಟಿಕೆಗಳು ಹೆಚ್ಚಿದಂತೆಲ್ಲಾ ಸಾಲ ಪಡೆದುಕೊಳ್ಳುವವರ ಸಂಖ್ಯೆಯಲ್ಲೂ ಏರಿಕೆ ಕಾಣುತ್ತಿದೆ ಎನ್ನಲಾಗಿದೆ. ಇನ್ನು ಸಾಲ ಪಡೆದುಕೊಳ್ಳುವುದು ತಪ್ಪಾದ ನಿರ್ಣಯವಲ್ಲದಿದ್ದರೂ ಪಡೆದುಕೊಂಡ ಮೊತ್ತವನ್ನು ಸರಿಯಾದ ರೀತಿಯಲ್ಲಿ ಉಪಯೋಗಿಸದಿದ್ದರೆ ಮಾತ್ರ ಅದೊಂದು ತಪ್ಪಾದ ನಿರ್ಣಯವಾಗುತ್ತದೆ. ಹಾಗಾಗಿ ಬ್ಯಾಂಕ್‌ ಅಥವಾ ಇತರೆ ಹಣಕಾಸಿನ ಸಂಸ್ಥೆಗಳಿಂದ ಪಡೆದುಕೊಂಡ ಸಾಲವನ್ನು ಸರಿಯಾದ ರೀತಿಯಲ್ಲಿ ಅಥವಾ ಆರ್ಥಿಕ ತಜ್ಞರ ಸಲಹೆ ಪಡೆದುಕೊಂಡು ಉಪಯೋಗಿಸುವುದು ಸರಿಯಾದ ನಿರ್ಧಾರವಾಗಿದೆ. ಇನ್ನು ಫಿಕ್ಸ್‌ಡ್‌ ಡೆಪಾಸಿಟ್‌ ವಿಚಾರಕ್ಕೆ ಬಂದರೆ ಅದರ ಆಧಾರದಲ್ಲಿ ಸಾಲ ಪಡೆಯುವವರ ಸಂಖ್ಯೆ ಕೂಡ ಹೆಚ್ಚಿದೆ. ಆದರೆ ಫಿಕ್ಸ್‌ಡ್‌ ಡೆಪಾಸಿಟ್‌ ಮುರಿಯಬೇಕೇ ಅಂದರೆ ಅವಧಿಗೂ ಮುಂಚಿತವಾಗಿ ಹಿಂಪಡೆಯಬೇಕೆ ಅಥವಾ ಅದರ ಆಧಾರದಲ್ಲಿ ಸಾಲ ಪಡೆದುಕೊಳ್ಳಬೇಕೇ ಎಂಬ ವಿಚಾರದಲ್ಲಿ ಹೆಚ್ಚಿನವರು ಗೊಂದಲಕ್ಕೆ ಸಿಲುಕಿಕೊಳ್ಳುವುದು ಸಾಮಾನ್ಯ ಸಂಗತಿ. ಸದ್ಯ ಈ ಗೊಂದಲವನ್ನು ನಿವಾರಿಸುವ ಸಲುವಾಗಿ ಇದರ ಸಂಪೂರ್ಣ ಲೆಕ್ಕಾಚಾರದ ಬಗ್ಗೆ ನಾವು ಹೇಳಲಿದ್ದೇವೆ.

1. ಸಾಮಾನ್ಯವಾಗಿ ಹಠಾತ್ ಹಣದ ಅವಶ್ಯಕತೆ ಎದುರಾದಾಗಲೆಲ್ಲ ಮನಸ್ಸಿಗೆ ಬರುವ ಮೊದಲ ಆಲೋಚನೆ ಎಂದರೆ ಉಳಿತಾಯದ ಹಣವನ್ನು ಉಪಯೋಗಿಸುವುದು. ಹೆಚ್ಚಿನ ಜನರು ಸಾಲವನ್ನು ತಪ್ಪಿಸಬೇಕೆನ್ನುವ ನಿಟ್ಟಿನಲ್ಲಿ ಈ ವಿಧಾನವನ್ನು ಅನುಸರಿಸುವುದು ಸಾಮಾನ್ಯ ಸಂಗತಿ. ಸಾಲ ಪಡೆಯುವುದು ಅಪಾಯಕಾರಿ ನೀತಿಯಾಗಿದ್ದು, ಸರಿಯಾಗಿ ಪಾವತಿ ಮಾಡದಿದ್ದರೆ ಭವಿಷ್ಯದ ಬ್ಯಾಂಕಿಂಗ್‌ ವಹಿವಾಟುಗಳಿಗೆ ಕಂಟಕವಾಗಿ ಪರಿಣಮಿಸಬಹುದು. ಆದರೆ ಈ ರೀತಿ ಯೋಚಿಸುವುದು ಸಂಪೂರ್ಣವಾಗಿ ಸರಿಯಾಗಿದ್ದರೂ, ಅನೇಕ ಸಂದರ್ಭಗಳಲ್ಲಿ ಸಾಲವನ್ನು ತೆಗೆದುಕೊಳ್ಳುವುದು ನಿಮಗೆ ಲಾಭದಾಯಕ ವ್ಯವಹಾರವೆಂದು ಸಾಬೀತುಪಡಿಸಬಹುದು. ಒಂದು ವೇಳೆ ನಿಮಗೂ ಹಣದ ಅಗತ್ಯ ಕಂಡುಬಂದರೆ ನಿಮ್ಮ ಫಿಕ್ಸೆಡ್ ಡೆಪಾಸಿಟ್ ಅಂದರೆ FD ಅನ್ನು ಮುರಿಯಲು ಯೋಚಿಸುತ್ತಿದ್ದರೆ, ಸ್ವಲ್ಪ ತಾಳ್ಮೆಯಿಂದ ಯೋಚಿಸಿ. ಕೆಲವು ಸಂದರ್ಭಗಳಲ್ಲಿ ಎಫ್‌ಡಿ ಮುರಿಯುವುದು ಸರಿ, ಆದರೆ ಹೆಚ್ಚಿನ ಸಂದರ್ಭಗಳಲ್ಲಿ ನೀವು ಎಫ್‌ಡಿ ವಿರುದ್ಧ ಸಾಲ ತೆಗೆದುಕೊಳ್ಳಬಹುದು. ಅದರ ಬಗ್ಗೆ ಕೂಲಂಕುಷವಾಗಿ ತಿಳಿದುಕೊಳ್ಳಬೇಕಿರುವುದು ಅಗತ್ಯವಾಗಿದೆ. ಯಾಕೆಂದರೆ ನೀವು 2 ವರ್ಷಗಳ ಕಾಲ ಎಫ್‌ಡಿ ಮಾಡಿದ್ದೀರಿ, ಅದರ ಮೇಲೆ ನೀವು ಶೇಕಡಾ 7 ಬಡ್ಡಿಯನ್ನು ಪಡೆಯುತ್ತೀರಿ ಎಂದು ಭಾವಿಸೋಣ. ಅಂತಹ ಪರಿಸ್ಥಿತಿಯಲ್ಲಿ, ಬ್ಯಾಂಕ್ 1 ವರ್ಷದ FD ಮೇಲೆ ಸುಮಾರು 6.5 ಪ್ರತಿಶತದಷ್ಟು ಬಡ್ಡಿಯನ್ನು ನೀಡುವ ಸಾಧ್ಯತೆಯಿದೆ. ಈಗ ನಿಮಗೆ ಹಣ ಬೇಕಾದಾಗ ಎಫ್‌ಡಿ ಮುರಿದರೆ, ನೀವು ನಷ್ಟವನ್ನು ಅನುಭವಿಸುತ್ತೀರಿ.

2. ಇನ್ನು ಒಂದು ವೇಳೆ ನಿಮ್ಮ ಎಫ್‌ಡಿಯನ್ನು ನೀವು ಅಕಾಲಿಕವಾಗಿ ಮುರಿದರೆ, ನೀವು ಸುಮಾರು 1% ದಂಡವನ್ನು ಪಾವತಿಸಬೇಕಾಗುತ್ತದೆ. ಇದಲ್ಲದೆ, ಕೆಲವು ಬ್ಯಾಂಕ್‌ಗಳು ಕೆಲವು ಶುಲ್ಕಗಳನ್ನು ಸಹ ವಿಧಿಸುತ್ತವೆ. ನೀವು ಶುಲ್ಕವನ್ನು ಬದಿಗಿಟ್ಟರೂ ಸಹ ಅಗತ್ಯವಿದ್ದಾಗ ಅದನ್ನು ಮುರಿಯುವುದರಿಂದ ನೀವು FD ಮೇಲೆ ಕೇವಲ 5.5 ಶೇಕಡಾ ಬಡ್ಡಿಯನ್ನು ಪಡೆಯುತ್ತೀರಿ. ನೀವು ಎಫ್‌ಡಿಯನ್ನು ತುಂಬಾ ಮುಂಚೆಯೇ ಮುರಿದರೆ, ಬಡ್ಡಿ ಇನ್ನೂ ಕಡಿಮೆ ಇರುತ್ತದೆ. ಸಹಜವಾಗಿಯೇ ಇದರಿಂದ ನಮಗೆ ನಷ್ಟ ಉಂಟಾಗುತ್ತದೆ.

3. ಎಫ್‌ಡಿಯಿಂದ ಸಾಲ ಪಡೆಯುವ ಲಾಭಗಳು

ನೀವು ಎಫ್‌ಡಿ ಮುಂದಿಟ್ಟುಕೊಂಡು ಸಾಲವನ್ನು ತೆಗೆದುಕೊಂಡರೆ ಅದು ಸಾಮಾನ್ಯ ವೈಯಕ್ತಿಕ ಸಾಲಕ್ಕಿಂತ ಅಗ್ಗವಾಗಿರುತ್ತದೆ. ನೀವು ಎಫ್‌ಡಿಯಲ್ಲಿ ಶೇಕಡಾ 7 ಬಡ್ಡಿಯನ್ನು ಪಡೆಯುತ್ತಿದ್ದರೆ, ನೀವು ಅದರ ಮೇಲೆ 1.5-2 ಶೇಕಡಾ ಹೆಚ್ಚಿನ ಬಡ್ಡಿಯಲ್ಲಿ ಸಾಲವನ್ನು ಪಡೆಯುತ್ತೀರಿ. ಅಂದರೆ ನೀವು ಎಫ್‌ಡಿ ಇಟ್ಟುಕೊಂಡು 8.5-9 ಪ್ರತಿಶತ ಬಡ್ಡಿಯಲ್ಲಿ ಸಾಲ ಪಡೆಯುತ್ತೀರಿ. ಉಳಿದ ಸಾಲದ ಬಡ್ಡಿಗೆ ಹೋಲಿಕೆ ಮಾಡಿದರೆ ಎಫ್‌ಡಿ ಸಾಲ ತ್ರಾಸದಾಯಕವಲ್ಲ.

4. ನಿಮ್ಮ ಎಫ್‌ಡಿ ಸುರಕ್ಷಿತ

ಈ ರೀತಿಯಾಗಿ ನೀವು ಹೆಚ್ಚು ಬಡ್ಡಿಯನ್ನು ಪಾವತಿಸಬೇಕಾಗುತ್ತದೆ ಎಂದು ಈಗ ನೀವು ಭಾವಿಸುತ್ತೀರಿ. ಆದರೆ ಅದರಲ್ಲಿ ಉತ್ತಮವಾದ ವಿಷಯವೆಂದರೆ ನೀವು ಮಾಡಿದ ಉಳಿತಾಯವು ಸುರಕ್ಷಿತವಾಗಿ ಉಳಿಯುತ್ತದೆ ಮತ್ತು ಮುಕ್ತಾಯದವರೆಗೆ ಮುಂದುವರಿಯುತ್ತದೆ. ಇದರರ್ಥ ನೀವು ಸಾಲದ ಹೊರೆಯನ್ನು ಹೊಂದಿದ್ದರೂ ಸಹ ನೀವು ಉಳಿತಾಯವನ್ನು ಹೊಂದಿರುತ್ತೀರಿ. ನೀವು ಇಂದು ಅಥವಾ ನಾಳೆ ಸಾಲವನ್ನು ಮರುಪಾವತಿಸುತ್ತೀರಿ, ಆದರೆ ನಿಮ್ಮ ಉಳಿತಾಯವು ನಿಮಗೆ ಭವಿಷ್ಯದಲ್ಲಿ ನೆರವಾಗುತ್ತದೆ. ಹಾಗಾಗಿ ಎಫ್‌ಡಿ ಮುರಿಯುವ ಅಥವಾ ಅದರಿಂದ ಸಾಲ ಪಡೆದುಕೊಳ್ಳುವ ವಿಚಾರದಲ್ಲಿ ಜಾಣತನದ ನಡೆ ಅಗತ್ಯವಾಗಿದೆ.

5. ಎಫ್‌ಡಿ ಹಿಂಪಡೆಯುವ ಬಗ್ಗೆ ಬಗ್ಗೆ ಯಾವಾಗ ಯೋಚಿಸಬಾರದು?

ಇನ್ನು ನಿಮಗೆ ಎಫ್‌ಡಿ ಮೊತ್ತದ 20-30 ಪ್ರತಿಶತದಷ್ಟು ಅಗತ್ಯವಿದೆ ಎಂದು ಭಾವಿಸೋಣ. ಈ ಪರಿಸ್ಥಿತಿಯಲ್ಲಿ ನೀವು ಎಫ್‌ಡಿಯನ್ನು ಮುರಿಯಬಾರದು. ಅದೇ ರೀತಿ ಒಂದು ವೇಳೆ ನಿಮ್ಮ FD 6 ತಿಂಗಳಿಗಿಂತ ಹೆಚ್ಚು ಅಥವಾ ಒಂದು ವರ್ಷ ಹಳೆಯದಾಗಿದ್ದರೆ ನಿಮಗೆ ಎಫ್‌ಡಿ ಮೊತ್ತದ 80-90 ಪ್ರತಿಶತದಷ್ಟು ಅಗತ್ಯವಿದ್ದರೂ ಮತ್ತು ನಿಮ್ಮ ಎಫ್‌ಡಿಯನ್ನು ಮುರಿಯದಿರಲು ಪ್ರಯತ್ನಿಸಿ. ಅಂತಹ ಪರಿಸ್ಥಿತಿಯಲ್ಲಿ, ಬೇರೆಡೆಯಿಂದ ಸ್ವಲ್ಪ ಹಣವನ್ನು ವ್ಯವಸ್ಥೆ ಮಾಡಿಕೊಳ್ಳಬೇಕು. ಉಳಿದಂತೆ ನೀವು ಖಂಡಿತವಾಗಿಯೂ ಎಫ್‌ಡಿಯಲ್ಲಿ ಶೇಕಡಾ 80 ರಷ್ಟು ಸಾಲವನ್ನು ಪಡೆಯಬಹುದು.

6. ಎಫ್‌ಡಿ ಮುರಿಯುವುದು ಯಾವಾಗ ಲಾಭದಾಯಕ?

ನೀವು ನಿಮ್ಮ ಎಫ್‌ಡಿ ಮಾಡಿ ಕೆಲವೇ ತಿಂಗಳುಗಳಾಗಿದ್ದರೆ, ನೀವು ಲೋನ್ ತೆಗೆದುಕೊಳ್ಳುವ ಬದಲು ಎಫ್‌ಡಿಯನ್ನು ಮುರಿಯಬಹುದು. ನಿಮಗೆ ಹೆಚ್ಚು ಹಣ ಬೇಕಾದಾಗ ಇದನ್ನೂ ಮಾಡಿ. ನಿಮಗೆ ಎಫ್‌ಡಿ ಮೊತ್ತದ ಶೇಕಡಾ 20-30 ರಷ್ಟು ಮಾತ್ರ ಅಗತ್ಯವಿದ್ದರೆ, ಎಫ್‌ಡಿಯನ್ನು ಮುರಿಯುವ ಬದಲು ಸಾಲವನ್ನು ತೆಗೆದುಕೊಳ್ಳಿ. ನಿಮಗೆ ಕನಿಷ್ಠ 70 ಪ್ರತಿಶತದಷ್ಟು ಮೊತ್ತದ ಅಗತ್ಯವಿರುವಾಗ ಮಾತ್ರ FD ಮುರಿಯುವ ಯೋಚಿಸಿ.