100 ರುಪಾಯಿ ಕೂಡ ಲಕ್ಷ ರುಪಾಯಿ ಆದೀತು, ಆದರೆ ಅದು ಹೀಗೆ

ಯಾವ ಕಂಪೆನಿ ಷೇರು ಖರೀದಿಸಿದರೆ ಉತ್ತಮ ಎಂಬ ಪ್ರಶ್ನೆ ಹೂಡಿಕೆದಾರರಲ್ಲಿ ಸಾಮಾನ್ಯವಾಗಿ ಮೂಡುವ ಪ್ರಶ್ನೆ.ಚ್ಷೇರುಪೇಟೆಯ ಹೂಡಿಕೆಯಲ್ಲಿರುವವರು ಹೊಸಬರಾಗಲಿ ಅಥವಾ ಹಳಬರಾಗಲಿ ಎಚ್ ಡಿಎಫ್ ಸಿ, ಲಾರ್ಸನ್ ಅಂಡ್ ಟೊಬ್ರೋ , ಐಟಿಸಿ, ಐಸಿಐಸಿಐ ಬ್ಯಾಂಕ್ ಗಳು ಹೂಡಿಕೆಗೆ ಯೋಗ್ಯವೇ ಎಂದು ವಿಚಾರಿಸಿದಲ್ಲಿ ಸಕಾರಾತ್ಮಕ ಸ್ಪಂದನವಿರುತ್ತದೆ.

ಇದಕ್ಕೆ ಮುಖ್ಯ ಕಾರಣ ಈ ಕಂಪೆನಿಗಳು ಹೂಡಿಕೆದಾರರ ಹಿತವನ್ನು ರಕ್ಷಿಸುವತ್ತ ತಮ್ಮ ಚಟುವಟಿಕೆಯ ಜಾಲವನ್ನು ಹೆಣೆಯುವ ಜಾಣ್ಮೆ ಮತ್ತು ವೃತ್ತಿಪರತೆಯಿಂದ ಮೆರೆದಿವೆ. ಅಲ್ಲದೆ ಈ ಕಂಪೆನಿಗಳು ಷೇರುದಾರರಿಗೆ ಆಕರ್ಷಣೀಯವಾದ ಕಾರ್ಪೊರೇಟ್ ಫಲಗಳನ್ನು ನೀಡಿ, ಅವರ ಹೂಡಿಕೆಯು ನ್ಯಾಯಸಮ್ಮತವಾಗಿದೆ ಎಂಬುದನ್ನು ನಿರೂಪಿಸಿವೆ.

ನಿಮಗೆ ಈ ದಿನ ಒಂದು ನಿರ್ದಿಷ್ಟ ಕಂಪೆನಿಯ ಸಾಧನೆಯ ಪಯಣವನ್ನು ತಿಳಿಸುತ್ತೇನೆ. ಇದು ನಿಮಗೆ ಉದಾಹರಣೆಯೇ ವಿನಾ ಖರೀದಿಸಲು ಶಿಫಾರಸು ಅಲ್ಲ. ಯಾವ ಷೇರನ್ನು ಖರೀದಿಸಬೇಕು ಎಂಬುದು ನಿಮ್ಮ ವೈಯಕ್ತಿಕ ನಿರ್ಧಾರ. ಎಚ್ ಡಿಎಫ್ ಸಿ ಕಂಪೆನಿಯು ಭಾರತದಲ್ಲಿ ಗೃಹನಿರ್ಮಾಣದ ಜಾಗೃತಿ ಮೂಡಿಸುವ ಕಾರ್ಯವನ್ನು ಆರಂಭಿಸಿದ ಮೊದಲ ಕಂಪೆನಿಯಾಗಿದ್ದು, ಹೆಚ್ಚಿನ ಶಿಸ್ತುಬದ್ಧವಾದ ಕಂಪೆನಿ.

ಹೂಡಿಕೆ ಮಾಡುವಾಗ ಈ ಅಂಶಗಳನ್ನು ಗಮನಿಸಿ

ಕಾರ್ಪೊರೇಟ್ ಗವರ್ನನ್ಸ್ ಎಂಬುದು ಇತ್ತೀಚಿಗೆ ಶಾಸನಬದ್ಧ ನಿಯಮವಾಗಿದ್ದರೆ, ಈ ಕಂಪೆನಿ ಆರಂಭದಿಂದಲೂ ಅಳವಡಿಸಿಕೊಂಡು ಬಂದಿದೆ. ಮೂಲಭೂತ ಅಂಶಗಳಿಂದ ಕೂಡಿದ ಹೂಡಿಕೆಯು ದೀರ್ಘಕಾಲೀನವಾಗಿ ಉತ್ತಮ ಫಲ ನೀಡುವುದೆಂಬುದಕ್ಕೆ ಈ ಕಂಪೆನಿಯು ಒಂದು ಉತ್ತಮ ಉದಾಹರಣೆಯಾಗಿದೆ. ಹೂಡಿಕೆಯನ್ನು ಮಾಡುವ ಮೊದಲು ಕಂಪೆನಿಯ ಗುಣಮಟ್ಟ, ಕಂಪೆನಿಯ ಚಟುವಟಿಕೆಯ ವಲಯ, ಆ ಚಟುವಟಿಕೆಗೆ ಇರುವ ವ್ಯಾವಹಾರಿಕ ಬೆಂಬಲ, ಕಂಪೆನಿಯ ಆಡಳಿತ ಮಂಡಳಿಯ ಮನೋಧರ್ಮ ವಿಶೇಷವಾಗಿ ಷೇರುದಾರರ ಬಗ್ಗೆ ಅವರಿಗಿರುವ ಕಾಳಜಿ (ಇದನ್ನು ಕಂಪೆನಿ ಪ್ರಕಟಿಸುವ ಕಾರ್ಪೊರೇಟ್ ಫಲಗಳಾದ ಲಾಭಾಂಶ, ಬೋನಸ್ ಷೇರು ಮುಂತಾದವುಗಳಿಂದ ಮಾಪನ ಮಾಡಬಹುದು) ಮುಂತಾದವುಗಳನ್ನು ಪರಿಶೀಲಿಸಿ ನಿರ್ಧರಿಸಿದಲ್ಲಿ ಹೂಡಿಕೆ ಸ್ವಲ್ಪಮಟ್ಟಿನ ಸುರಕ್ಷತೆ ಕಾಣಲು ಸಾಧ್ಯ.

ಷೇರು ಪೇಟೆಯಲ್ಲಿ ಹಣ ಬೆಳೆಯುವುದಕ್ಕೆ ಉದಾಹರಣೆ

ಇವೆಲ್ಲವನ್ನೂ ಮೈಗೂಡಿಸಿಕೊಂಡಿರುವ ಎಚ್ ಡಿಎಫ್ ಸಿ ಆರಂಭವಾದುದು 1977ರಲ್ಲಿ. ಈ ಕಂಪೆನಿ 1981-82ರಲ್ಲಿ ರು.100ರ ಮುಖಬೆಲೆ ಷೇರಿಗೆ ಶೇ.5 ರಷ್ಟು ಆರಂಭಿಕ ಲಾಭಾಂಶ ನೀಡಿ, ತದನಂತರ ಶೇ.7.5, ಶೇ.10 ಹೀಗೆ ವರ್ಷದಿಂದ ವರ್ಷಕ್ಕೆ ಲಾಭಾಂಶ ಹೆಚ್ಚಿಸಿಕೊಂಡು ಹೋಯಿತು. ರು.100ರ ಮುಖಬೆಲೆಯ ಷೇರು ಸುಮಾರು 2000ನೇ ಇಸವಿಯವರೆಗೂ ಪೇಟೆಯಲ್ಲಿ ನೂರರ ಒಳಗಿತ್ತು. ಉತ್ತಮ ಲಾಭಾಂಶದ ಕಾರಣ ಒಂದು ರೀತಿಯ ಫಿಕ್ಸೆಡ್ ಡೆಪಾಸಿಟ್ ತರಹ ಈ ಷೇರು ಕೊಂಡವರು ಮುಂದೆ ಉತ್ತಮ ಲಾಭವನ್ನು ಪಡೆದುಕೊಂಡರು. ಷೇರುಪೇಟೆಯಲ್ಲಿ ಹಣ ಹೇಗೆ ಬೆಳೆಯುತ್ತದೆ ಎಂಬುದಕ್ಕೆ ಸಾಮಾನ್ಯವಾಗಿ ವಿಶ್ಲೇಷಕರು ಇನ್ಫೋಸಿಸ್ ನ ಉದಾಹರಣೆ ನೀಡುವರು. ಆದರೆ ವಸತಿ ವಲಯದ ಎಚ್ ಡಿಎಫ್ ಸಿ ಕಂಪೆನಿ 1986 ರಲ್ಲಿ 1:2ರ ಅನುಪಾತದ ಹಕ್ಕಿನ ಷೇರನ್ನು ಮುಖಬೆಲೆಯಲ್ಲೇ ವಿತರಿಸಿತು. ಮತ್ತೊಮ್ಮೆ 1:2ರ ಅನುಪಾತದ ಹಕ್ಕಿನ ಷೇರು ವಿತರಿಸಿತು. 1992ರಲ್ಲಿ ರು.400ರ ಮುಖಬೆಲೆಯ ಪೂರ್ಣವಾಗಿ ಇಕ್ವಿಟಿಯಾಗಿ ಪರಿವರ್ತನೆಯಾಗುವ ಡಿಬೆಂಚರ್ ವಿತರಿಸಿತು. 1:1ರ ಅನುಪಾತದ ಬೋನಸ್ ಷೇರನ್ನು ಸಹ ವಿತರಿಸಿದೆ.

ಕೋಟ್ಯಂತರ ರುಪಾಯಿಗಳಾಗುತ್ತದೆ

2002ರಲ್ಲಿ ಷೇರಿನ ಮುಖಬೆಲೆಯನ್ನು ರು.100ರಿಂದ ರು.10 ಕ್ಕೆ ಸೀಳಿದ್ದು, 2010ರಲ್ಲಿ ರು.10 ರಿಂದ ರು.2 ಕ್ಕೆ ಸೀಳಿದೆ. ಅಲ್ಲದೆ ರು.2ರ ಮುಖಬೆಲೆಯ ಷೇರಿನ ಬೆಲೆ ರು.2,000ದ ಹತ್ತಿರವಿದೆ. ಅಂದರೆ ರು.100 ರ ಮುಖಬೆಲೆ ಷೇರು ಈಗ ರು.1,00,000 ಇದ್ದಂತೆ ಆಗಿದೆ. ಬೋನಸ್ ಷೇರು, ಹಕ್ಕಿನ ಷೇರುಗಳನ್ನು ಪರಿಗಣಿಸಿದರೆ ಕೋಟ್ಯಂತರ ರುಪಾಯಿಗಳಾಗುವುದು. ಈ ಷೇರು ಸೆನ್ಸೆಕ್ಸ್ ನ ಅಂಗವಾಗಿದ್ದು, ರು.43ರಷ್ಟು ಏರಿಕೆ ಕಂಡರೆ ಸೆನ್ಸೆಕ್ಸ್ 73ಪಾಯಿಂಟುಗಳಷ್ಟು ಏರಿಕೆ ಕಾಣುತ್ತದೆ. ರು.100ರ ಮುಖಬೆಲೆಗಿಂತ ಕಡಿಮೆ ಬೆಲೆಯಲ್ಲಿ ವಹಿವಾಟಾಗುತ್ತಿದ್ದ ಷೇರು ಈಗ ರು.2ರ ಮುಖಬೆಲೆ ಎರಡು ಸಾವಿರ ರುಪಾಯಿಗಳ ಸಮೀಪಕ್ಕೆ ತಲುಪಿರುವುದು ಬೃಹತ್ ಸಾಧನೆಯಾಗಿದೆ. ಅಲ್ಲದೆ ಈ ಕಂಪೆನಿ ಬೆಳವಣಿಗೆಯಲ್ಲಿ ಯಾವುದೇ ಕಾರ್ಪೊರೇಟ್ ಗವರ್ನನ್ಸ್ ಲೋಪವಿಲ್ಲದಿರುವುದು ಗಮನಾರ್ಹ. ಬದಲಾಗಿ ಹೂಡಿಕೆದಾರರ ಆತ್ಮೀಯತೆಯನ್ನು, ಮೆಚ್ಚುಗೆಯನ್ನು ಪಡೆದುಕೊಂಡಿದೆ.

ಲಕ್ಷಕ್ಕೂ ಹೆಚ್ಚು ಷೇರು ಹೊಂದಿರುವ ಸಾವಿರಕ್ಕೂ ಹೆಚ್ಚು ಮಂದಿ

ಈ ಕಂಪೆನಿಯನ್ನು ಸಂಪೂರ್ಣವಾಗಿ ವೃತ್ತಿಪರರು ನಿರ್ವಹಿಸುತ್ತಿದ್ದು, ಈ ಕಂಪನಿಗೆ ಯಾವುದೇ ಪ್ರವರ್ತಕರ ಭಾಗಿತ್ವವು ಇಲ್ಲದೆ ಶೇ.100ರಷ್ಟು ಸಾರ್ವಜನಿಕರಲ್ಲಿರುವುದು ವಿಶೇಷ. ಮತ್ತೊಂದು ವಿಶೇಷವೆಂದರೆ 2018ರ ಮಾರ್ಚ್ ಅಂತ್ಯದಲ್ಲಿ ಈ ಕಂಪೆನಿಯ ಒಂದು ಲಕ್ಷಕ್ಕೂ ಹೆಚ್ಚಿನ ಷೇರುಗಳನ್ನು ಹೊಂದಿರುವವರು 1,096 ಷೇರುದಾರರಿದ್ದು, ಇದು ಶೇ.90.89 ರಷ್ಟಾಗಿದೆ. ಇದರಲ್ಲಿ ಹೆಚ್ಚು ವಿತ್ತೀಯ ಸಂಸ್ಥೆಗಳಾಗಿರುವುದರಿಂದ ಚಲಾವಣೆಗೆ ಬಾರದೆ, ನಿಶ್ಚೇಷ್ಟಿತವಾಗಿವೆ. ಈ ಕಾರಣದಿಂದಾಗಿ ಹರಿದಾಡುವ ಷೇರುಗಳು ಕಡಿಮೆಯಾಗುವುದರಿಂದ ವಹಿವಾಟಿನ ಗಾತ್ರವು ಸಹ ಮಿತವಾಗಿದೆ. ಹೂಡಿಕೆ ಮಾಡುವಾಗ ಕಂಪೆನಿಗಳು ತಮ್ಮ ಸಾಧನೆಗಿಂತ ಕಡಿಮೆ ದರದಲ್ಲಿ ಷೇರುಗಳು ಲಭ್ಯವಾದರೆ, ಷೇರಿನ ದರವು ಏರಿಕೆ ತಂದು ಲಾಭ ಗಳಿಕೆ ಮಾಡಿಕೊಡುವುದಲ್ಲದೆ ಕಾರ್ಪೊರೇಟ್ ಲಾಭಗಳನ್ನು ಗಳಿಸಿ ಕೊಡಲು ಸಾಧ್ಯ. ಆದರೆ ನೆನಪಿರಲಿ: ಷೇರಿನ ದರ ಗರಿಷ್ಠದಲ್ಲಿದ್ದಲ್ಲಿ ಅದು ಅಲ್ಪಕಾಲೀನ ಹೂಡಿಕೆಗೆ ಮಾತ್ರ ಸೀಮಿತವಾಗಿರಬೇಕು.