Jio AirFiber: ಜಿಯೋ ಏರ್‌ಫೈಬರ್ ಆರಂಭ- ದರ, ಪ್ಲ್ಯಾನ್, ಡೇಟಾ ಸ್ಪೀಡ್, ಇತರೆ ವಿವರ ಇಲ್ಲಿದೆ

ರಿಲಯನ್ಸ್ ಜಿಯೋ ಗಣೇಶ ಚತುರ್ಥಿಯ ಸಂದರ್ಭದಲ್ಲಿ ದೇಶದ 8 ಮೆಟ್ರೋ ನಗರಗಳಲ್ಲಿ ಜಿಯೋ ಏರ್‌ಫೈಬರ್ ಆರಂಭ ಮಾಡಿದೆ. ಈ ಹಿಂದೆಯೇ ಗಣೇಶ ಚತುರ್ಥಿ ವೇಳೆ ಜಿಯೋ ಏರ್‌ಫೈಬರ್ ಆರಂಭಿಸುವ ಬಗ್ಗೆ ಸಂಸ್ಥೆಯ ಮುಖ್ಯಸ್ಥರಾದ ಮುಕೇಶ್ ಅಂಬಾನಿ ತಿಳಿಸಿದ್ದರು. ಜಿಯೋ ಏರ್ ಫೈಬರ್ ಹೋಮ್ ಎಂಟರ್‌ಟೈನ್‌ಮೆಂಟ್, ಸ್ಮಾರ್ಟ್ ಹೋಮ್ ಸರ್ವಿಸಸ್ ಮತ್ತು ಹೈ-ಸ್ಪೀಡ್ ಬ್ರಾಡ್‌ಬ್ಯಾಂಡ್‌ನಂತಹ ಸೇವೆಗಳನ್ನು ಒದಗಿಸುತ್ತದೆ.

ಆರಂಭದಲ್ಲಿ, ಕಂಪನಿಯು ಜಿಯೋ ಏರ್ ಫೈಬರ್ ಸೇವೆಯನ್ನು ದೆಹಲಿ, ಮುಂಬೈ, ಹೈದರಾಬಾದ್, ಕೋಲ್ಕತ್ತಾ, ಅಹಮದಾಬಾದ್, ಬೆಂಗಳೂರು, ಚೆನ್ನೈ ಮತ್ತು ಪುಣೆಯಲ್ಲಿ ಆರಂಭ ಮಾಡಿದೆ. ಅಂದರೆ ಬೆಂಗಳೂರಿನಲ್ಲಿರುವವರಿಗೂ ಈ ಸೇವೆ ಲಭ್ಯವಾಗುತ್ತದೆ. ಕಂಪನಿಯು ಮಾರುಕಟ್ಟೆಯಲ್ಲಿ ಏರ್‌ಫೈಬರ್ ಮತ್ತು ಏರ್‌ಫೈಬರ್ ಮ್ಯಾಕ್ಸ್ ಎಂಬ ಎರಡು ಯೋಜನೆಗಳನ್ನು ಪರಿಚಯಿಸಿದೆ.

ಜಿಯೋ ಏರ್‌ಫೈಬರ್ ಯೋಜನೆಯಲ್ಲಿ ಗ್ರಾಹಕರು ಎರಡು ರೀತಿಯ ಸ್ಪೀಡ್‌ ಯೋಜನೆಗಳನ್ನು ಪಡೆಯುತ್ತಾರೆ. ಇವು 30 Mbps ಮತ್ತು 100 Mbps. ಕಂಪನಿಯು ಆರಂಭಿಕವಾಗಿ 30 Mbps ಪ್ಲ್ಯಾನ್‌ನ ಬೆಲೆಯನ್ನು 599 ರೂಪಾಯಿ ಇರಿಸಿದೆ. ಆದರೆ, 100 Mbps ಪ್ಲ್ಯಾನ್‌ನ ಬೆಲೆಯು 899 ರೂಪಾಯಿ ಇರಿಸಲಾಗಿದೆ. ಎರಡೂ ಯೋಜನೆಗಳಲ್ಲಿ, ಗ್ರಾಹಕರು 550 ಕ್ಕೂ ಹೆಚ್ಚು ಡಿಜಿಟಲ್ ಚಾನಲ್‌ಗಳು ಮತ್ತು 14 ಮನರಂಜನಾ ಅಪ್ಲಿಕೇಶನ್‌ಗಳನ್ನು ಪಡೆಯಬಹುದು.

ಜಿಯೋ ಏರ್‌ಫೈಬರ್ ಯೋಜನೆಯಡಿಯಲ್ಲಿ, ಕಂಪನಿಯು 100 Mbps ವೇಗದ 1199 ರೂಪಾಯಿಯ ಪ್ಲ್ಯಾನ್ ಅನ್ನು ಪರಿಚಯಿಸಿದೆ. ಇದರಲ್ಲಿ ಮೇಲೆ ತಿಳಿಸಿದ ಸೌಲಭ್ಯಗಳನ್ನು ಮಾತ್ರವಲ್ಲದೆ ಅದರ ಜೊತೆಗೆ ನೆಟ್‌ಫ್ಲಿಕ್ಸ್, ಅಮೆಜಾನ್ ಮತ್ತು ಜಿಯೋ ಸಿನಿಮಾದಂತಹ ಪ್ರೀಮಿಯಂ ಅಪ್ಲಿಕೇಶನ್‌ಗಳು ಸಹ ಲಭ್ಯವಿರುತ್ತವೆ.

ಹೆಚ್ಚಿನ ಇಂಟರ್ನೆಟ್ ವೇಗವನ್ನು ಬಯಸುವ ಗ್ರಾಹಕರು 'ಏರ್ ಫೈಬರ್ ಮ್ಯಾಕ್ಸ್' ಯೋಜನೆಗಳಲ್ಲಿ ಒಂದನ್ನು ಆಯ್ಕೆ ಮಾಡಬಹುದು. ಕಂಪನಿಯು ಮಾರುಕಟ್ಟೆಯಲ್ಲಿ 300 Mbps ನಿಂದ 1000 Mbps ವರೆಗಿನ ಮೂರು ಯೋಜನೆಗಳನ್ನು ಬಿಡುಗಡೆ ಮಾಡಿದೆ. ಆದರೆ 300 Mbps ವೇಗದ ಪ್ಲ್ಯಾನ್ 1499 ರೂಪಾಯಿಗೆ ಲಭ್ಯವಿದೆ.

ಗ್ರಾಹಕರು 2499 ರೂಪಾಯಿಗೆ 500 Mbps ವೇಗವನ್ನು ಆನಂದಿಸಬಹುದು. ಗ್ರಾಹಕರು 1 Gbps ವೇಗದ ಪ್ಲ್ಯಾನ್ ಅನ್ನು ತೆಗೆದುಕೊಳ್ಳಲು ಬಯಸಿದರೆ, ಅದಕ್ಕಾಗಿ 3999 ರೂಪಾಯಿ ವೆಚ್ಚ ಮಾಡಬೇಕಾಗುತ್ತದೆ. 550 ಡಿಜಿಟಲ್ ಚಾನಲ್‌ಗಳು, 14 ಮನರಂಜನಾ ಅಪ್ಲಿಕೇಶನ್‌ಗಳು ಮತ್ತು ನೆಟ್‌ಫ್ಲಿಕ್ಸ್‌, ಅಮೆಜಾನ್, ಜಿಯೋ ಸಿನಿಮಾದಂತಹ ಪ್ರೀಮಿಯಂ ಅಪ್ಲಿಕೇಶನ್‌ಗಳು ಈ ಪ್ಲ್ಯಾನ್‌ನೊಂದಿಗೆ ಲಭ್ಯವಾಗುತ್ತದೆ.

ಜಿಯೋ ಏರ್‌ಫೈಬರ್ ಅನ್ನು ಆನ್‌ಲೈನ್ ಮತ್ತು ಆಫ್‌ಲೈನ್‌ನಲ್ಲಿ ಬುಕ್ ಮಾಡಬಹುದು. 60008-60008 ಗೆ ಮಿಸ್ಡ್ ಕಾಲ್ ನೀಡುವ ಮೂಲಕ ಅಥವಾ www.jio.com ಗೆ ಭೇಟಿ ನೀಡುವ ಮೂಲಕ ಬುಕಿಂಗ್ ಪ್ರಕ್ರಿಯೆಯನ್ನು ಪ್ರಾರಂಭಿಸಬಹುದು. ಜಿಯೋ ಏರ್‌ಫೈಬರ್ ಅನ್ನು ಜಿಯೋ ಸ್ಟೋರ್‌ಗಳಿಂದಲೂ ಖರೀದಿಸಬಹುದು.

ಜಿಯೋ ಫೈಬರ್ ಮತ್ತು ಜಿಯೋ ಏರ್‌ಫೈಬರ್ ನಡುವಿನ ವ್ಯತ್ಯಾಸ

ಜಿಯೋ ಏರ್‌ಫೈಬರ್ ವೈರ್ಡ್ ಸೇವೆಯಾಗಿದ್ದು, ಆಪ್ಟಿಕಲ್ ಫೈಬರ್ ಮೂಲಕ ಮನೆಗಳಿಗೆ ತಲುಪಿಸಲಾಗುತ್ತದೆ. ಜಿಯೋಫೈಬರ್ 1 Gbps ವರೆಗೆ ವೇಗವನ್ನು ನೀಡುತ್ತದೆ. ಆದರೆ ಜಿಯೋ ಏರ್‌ಫೈಬರ್ 1.5 Gbps ವರೆಗೆ ವೇಗವನ್ನು ಹೊಂದಿರುತ್ತದೆ. ಏಷ್ಯಾದ 22 ಪರವಾನಗಿ ಪಡೆದ ಸೇವಾ ಕ್ಷೇತ್ರಗಳಲ್ಲಿ 5ಜಿ ನೆಟ್‌ವರ್ಕ್ ಕೆಲಸವನ್ನು ಪೂರ್ಣಗೊಳಿಸಿದೆ ಎಂದು ರಿಲಯನ್ಸ್ ಜಿಯೋ ಘೋಷಿಸಿದೆ. ಕಂಪನಿಯು ಕಳೆದ ವರ್ಷ ಸ್ವಾಧೀನಪಡಿಸಿಕೊಂಡ ಸ್ಪೆಕ್ಟ್ರಮ್‌ಗಾಗಿ ಎಲ್ಲಾ ಸ್ಪೆಕ್ಟ್ರಮ್ ಬ್ಯಾಂಡ್‌ಗಳಲ್ಲಿ ನಿಗದಿತ ಸಮಯಕ್ಕಿಂತ ಮುಂಚಿತವಾಗಿ ಬಿಡುಗಡೆಯನ್ನು ಪೂರ್ಣಗೊಳಿಸಿದೆ.

ರಿಲಯನ್ಸ್ ಇಂಡಸ್ಟ್ರೀಸ್‌ನ (ಆರ್‌ಐಎಲ್) 46 ನೇ ವಾರ್ಷಿಕ ಸಾಮಾನ್ಯ ಸಭೆಯು (ಎಜಿಎಂ) ಸೋಮವಾರ (ಆಗಸ್ಟ್ 28) ನಡೆದಿದ್ದು, ಭಾರತದ ಅತ್ಯಂತ ಶ್ರೀಮಂತ ವ್ಯಕ್ತಿ, ಸಂಸ್ಥೆಯ ಮುಖ್ಯಸ್ಥ ಮುಕೇಶ್ ಅಂಬಾನಿ ಸಭೆಯಲ್ಲಿ ಮಾತನಾಡಿದ್ದಾರೆ. ಮುಕೇಶ್ ಅಂಬಾನಿ ಎಜಿಎಂನಲ್ಲಿ ತಮ್ಮ ಭಾಷಣದಲ್ಲಿ ಜಿಯೋ ಏರ್‌ಫೈಬರ್ ಅನ್ನು ಸೆಪ್ಟೆಂಬರ್ 19 ರಂದು ಗಣೇಶ ಚತುರ್ಥಿಯ ಸಂದರ್ಭದಲ್ಲಿ ಪ್ರಾರಂಭಿಸಲಾಗುವುದು ಎಂದು ಘೋಷಿಸಿದರು.