ಮುದ್ರಾ ಸಾಲ ಯೋಜನೆಯಲ್ಲಿ 2 ಪರ್ಸೆಂಟ್ ಬಡ್ಡಿ ಸಬ್ಸಿಡಿ ಯಾರಿಗೆ ಸಿಗುತ್ತೆ ಗೊತ್ತಾ?

ಸಣ್ಣ ಪ್ರಮಾಣದ ವರ್ತಕರಿಗೆ ಅನುಕೂಲ ಮಾಡಿಕೊಡುವ ಉದ್ದೇಶದಿಂದ ಮುದ್ರಾ ಸಾಲ ಯೋಜನೆ ಅಡಿ 50,000 ರುಪಾಯಿಯೊಳಗೆ ಪಡೆಯುವವರಿಗೆ 2 ಪರ್ಸೆಂಟ್ ಬಡ್ಡಿ ಸಬ್ಸಿಡಿ ನೀಡಲು ಪ್ರಧಾನಿ ನೇತೃತ್ವದ ಕೇಂದ್ರ ಸಚಿವ ಸಂಪುಟ ಬುಧವಾರ ಒಪ್ಪಿಗೆ ನೀಡಿದೆ. ಕೇಂದ್ರ ಸಚಿವ ಪ್ರಕಾಶ್ ಜಾವಡೇಕರ್ ಮಾತನಾಡಿ, ಮುದ್ರಾ ಶಿಶು ಯೋಜನಾ ಅಡಿಯಲ್ಲಿ (50 ಸಾವಿರಕ್ಕಿಂತ ಕಡಿಮೆ ಸಾಲ ಪಡೆದವರು) 9.37 ಕೋಟಿ ಫಲಾನುಭವಿಗಳು ಇದ್ದಾರೆ ಎಂದು ಹೇಳಿದ್ದಾರೆ.

ಕೇಂದ್ರ ಸರ್ಕಾರವು ಇದಕ್ಕಾಗಿ ಜೂನ್ 1, 2020ರಿಂದ ಮೇ 31, 2021ರ ತನಕ ಬಡ್ಡಿ ಸಬ್ಸಿಡಿ ಮುಂದುವರಿಸಲಿದೆ. ಇದಕ್ಕಾಗಿ 1540 ಕೋಟಿ ರುಪಾಯಿ ಖರ್ಚು ಮಾಡುವುದಾಗಿ ಘೋಷಿಸಿದೆ. ಮೈಕ್ರೋ ಯೂನಿಟ್ಸ್ ಡೆವಲಪ್ ಮೆಂಟ್ ಅಂಡ್ ರೀಫೈನಾನ್ಸ್ ಏಜೆನ್ಸಿ (MUDRA) ಯೋಜನೆಯು ವಿಶ್ವದಲ್ಲೇ ಅತಿ ದೊಡ್ಡ ಕಿರು ಸಾಲ ಯೋಜನೆ. ಹತ್ತಿರ ಹತ್ತಿರ 20 ಕೋಟಿ ಮಂದಿಗೆ ವರ್ಕಿಂಗ್ ಕ್ಯಾಪಿಟಲ್ ಒದಗಿಸುತ್ತಿದೆ.

ಈ ಯೋಜನೆ ರೂಪುಗೊಂಡಿದ್ದೇ ದೇಶದ ಕಿರು ಸಂಸ್ಥೆಗಳಿಗೆ ಅಭಿವೃದ್ಧಿಗೆ ಬೆಂಬಲ ನೀಡುವ ಉದ್ದೇಶದಿಂದ. ಮುದ್ರಾದಿಂದ ಬ್ಯಾಂಕ್ ಗಳಿಗೆ, ಮೈಕ್ರೋ ಫೈನಾನ್ಸ್ ಸಂಸ್ಥೆಗಳಿಗೆ ಹಾಗೂ ಎನ್ ಬಿಎಫ್ ಸಿಗಳಿಗೆ ಪುನರ್ ಹಣಕಾಸು ಯೋಜನೆ ಬೆಂಬಲ ನೀಡಲಾಗುತ್ತದೆ. ಆ ಮೂಲಕ ಕಿರು ಘಟಕಗಳಿಗೆ ಹತ್ತು ಲಕ್ಷದ ತನಕ ಹಣಕಾಸಿನ ಸಾಲದ ಅಗತ್ಯವನ್ನು ಒದಗಿಸಲಾಗುತ್ತದೆ.

ಶಿಶು ಯೋಜನಾ ಅಡಿಯಲ್ಲಿ 50 ಸಾವಿರ ರುಪಾಯಿಯೊಳಗೆ ಸಾಲ ನೀಡಲಾಗುತ್ತದೆ. ಇನ್ನು ಕಿಶೋರ ಯೋಜನೆಯಲ್ಲಿ 50 ಸಾವಿರದಿಂದ 5 ಲಕ್ಷದ ತನಕ ಹಾಗೂ ತರುಣ್ ಯೋಜನೆ ಅಡಿಯಲ್ಲಿ 5 ಲಕ್ಷ ಮೇಲ್ಪಟ್ಟು 10 ಲಕ್ಷದ ತನಕ ಸಾಲ ಒದಗಿಸಲಾಗುತ್ತದೆ.