ಮುಂಬೈ, ಆಗಸ್ಟ್.27: ಇಳಿಕೆಯ ದಾರಿಯಲ್ಲಿ ಹೋಗುತ್ತಿದ್ದ ಷೇರು ಪೇಟೆ ಗುರುವಾರ ಚೇತರಿಸಿಕೊಂಡಿದೆ. ಬಂಡವಾಳ ಹೂಡಿಕೆದಾರರು ನಿಟ್ಟುಸಿರು ಬಿಡುವಂತೆ ಮಾಡಿದೆ. ಸೆನ್ಸೆಕ್ಸ್ 507 .15 ಅಂಕ ಏರಿಕೆ ಕಂಡರೆ, ನಿಫ್ಟಿ 157 ಅಂಕ ಏರಿಕೆ ದಾಖಲಿಸಿತು.

26,231.19 ರಲ್ಲಿ ಬಿಎಸ್ ಇ ಕೊನೆಯಾದರೆ, 7,948.95 ಅಂಕ ಗಳಿಸಿ ನಿಫ್ಟಿ ದಿನದ ವ್ಯವಹಾರ ಮುಗಿಸಿತು. ದಿನದ ಆರಂಭದಿಂದಲೇ ಮಾರುಕಟ್ಟೆ ಏರಿಕೆಯ ಹಾದಿಯಲ್ಲಿ ಸಾಗುತ್ತಿತ್ತು. ಆಗಸ್ಟ್ ತಿಂಗಳ ವ್ಯವಹಾರ ಮುಗಿಸಲು ಗುರುವಾರ ಕೊನೆ ದಿನವಾದ್ದರಿಂದ ಮಾರುಕಟ್ಟೆಯಲ್ಲಿ ಏರಿಕೆ ಕಂಡುಬಂದಿತು ಎಂದು ವಿಶ್ಲೇಷಣೆ ಮಾಡಲಾಗಿದೆ.[ಅಂತಾರಾಷ್ಟ್ರೀಯ ಚಿನ್ನದ ದರ ಗಣನೀಯ ಇಳಿಕೆ: ಹೂಡಿಕೆಗೆ ಸಕಾಲವೇ?]

ಅತ್ತ ಶಾಂಘೈ ಮತ್ತು ಹಾಂಕಾಂಗ್ ಮಾರುಕಟ್ಟೆಗಳಲ್ಲೂ ಕೊಂಚ ಏರಿಕೆ ಕಂಡುಬಂದಿದ್ದು ಏಷ್ಯಾ ಷೇರುಗಳ ಮೇಲೆ ಪ್ರಭಾವ ಬೀರಿತು. ತೈಲ ಬೆಲೆ ತೀವ್ರ ತೆರನಾದ ಇಳಿಕೆ ದಾಖಲಿಸಿಕೊಂಡರೂ ರುಪಾಯಿ ತನ್ನ ಸ್ಥಿರತೆ ಕಾಯ್ದುಕೊಂಡಿತು. ಆದರೆ ಸಾಂಸ್ಥಿಕ ಹೂಡಿಕೆದಾರರು ವಹಿವಾಟಿನಿಂದ ದೂರವೇ ಇದ್ದರು.

ಇಳಿಕೆಯಲ್ಲಿ ಸಾಗುತ್ತಿದ್ದ ಮಿಡ್ ಕ್ಯಾಪ್ ಷೇರುಗಳು ಗುರುವಾರ ಗಳಿಕೆ ದಾಖಲಿಸಿದವು. ಎಚ್ ಡಿ ಎಫ್ ಸಿ ಮತ್ತು ಟಾಟಾ ಸ್ಟೀಲ್ ಸಹ ಕೊಂಚ ಪ್ರಮಾಣದ ಏರಿಕೆ ಕಂಡವು. ಇಡಿ ದಿನದ ಬೆಳವಣಿಗೆ ಹೂಡಿಕೆದಾರರ ದೃಷ್ಟಿಯಲ್ಲಿ ಸಕಾರಾತ್ಮಕವಾಗಿತ್ತು. ಕಳೆದ ಒಂದು ವಾರದಿಂದ ತೀವ್ರ ತೆರನಾದ ತಲ್ಲಣ ಅನುಭವಿಸಿದ್ದ ಮಾರುಕಟ್ಟೆ ಚೇತರಿಕೆ ದಾಖಲಿಸಿತು.