10 ರೂ. ನಕಲಿ ನಾಣ್ಯ ಚಲಾವಣೆಯಲ್ಲಿದೆ ಎಂದು ಹರಡಿರುವ ವದಂತಿಯನ್ನು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯ ಅಲ್ಲಗಳೆದಿದ್ದು, ಇಂತಹ ಸುಳ್ಳು ಸುದ್ದಿಗಳಿಗೆ ಸಾರ್ವಜನಿಕರು ಕಿವಿಗೊಡಬಾರದು. ಅಲ್ಲದೇ ಯಾವುದೇ ಹಿಂಜರಿಕೆ ಇಲ್ಲದೆ 10 ರೂ. ನಾಣ್ಯವನ್ನು ವ್ಯವಹಾರಕ್ಕೆ ಬಳಸಬಹುದು ಎಂದು ತಿಳಿಸಿದೆ.

ಕೆಲ ಊಹಾಪೋಹಗಳಿಂದಾಗಿ ಸಾರ್ವಜನಿಕರು ನಾಣ್ಯಗಳ ನಿಖರತೆಯ ಬಗ್ಗೆ ಸಂಶಯ ವ್ಯಕ್ತಪಡಿಸುತ್ತಿದ್ದು, ವ್ಯಾಪಾರಿಗಳು, ಅಂಗಡಿ ಮಾಲಿಕರು, ಚಿಲ್ಲರೆ ವ್ಯವಹಾರಸ್ಥರು ಹಾಗೂ ಜನಸಾಮಾನ್ಯರು ಗೊಂದಲ ಪಡುವಂತಾಗಿದೆ. ಹೀಗಾಗಿ ಅನಗತ್ಯವಾದ ಸಂಶಯಗಳಿಗೆ ಜನರು ಒಳಗಾಗುತ್ತಿದ್ದಾರೆ ಎಂದು ಆರ್ಬಿಐ ಹೇಳಿದೆ.

ಆರ್ಬಿಐ ಸ್ಪಷ್ಟನೆ:
10 ರೂ. ನಾಣ್ಯ ರದ್ದಾಗಿಲ್ಲ ಹಾಗೂ ನಕಲಿಯಲ್ಲ. ದಿನಿತ್ಯದ ವ್ಯವಹಾರದ ಸಂದರ್ಭದಲ್ಲಿ ಸಾರ್ವಜನಿಕರು ಯಾವುದೇ ಗೊಂದಲ, ಹಿಂಜರಿಕೆ ಇಲ್ಲದೇ ಬಳಸಬಹುದಾಗಿದೆ. ಹಳೆ ನಾಣ್ಯಗಳು ದೀರ್ಘಾವಧಿಯವರೆಗೆ ಚಲಾವಣೆಯಲ್ಲಿರುವುದರಿಂದ ವಿವಿಧ ವಿನ್ಯಾಸ ಮತ್ತು ಆಕಾರದ ನಾಣ್ಯಗಳು ಚಲಾವಣೆಗೆ ಬರುವ ನಿರೀಕ್ಷೆಯಿದೆ ಎಂದು ಆರ್ಬಿಐ ಸ್ಪಷ್ಟಪಡಿಸಿದೆ.
ದೇಶದ ಆರ್ಥಿಕ, ಸಾಂಸ್ಕೃತಿಕ, ಸಾಮಾಜಿಕ ಲಕ್ಷಣಗಳನ್ನು ಪ್ರತಿಬಿಂಬಿಸುವ ಹೊಸ ಮುಖಬೆಲೆಯ ನಾಣ್ಯಗಳನ್ನು ಆರ್ಬಿಐ ಕಾಲಕಾಲಕ್ಕೆ ಬಿಡುಗಡೆ ಮಾಡುತ್ತ ಬಂದಿದೆ ಎಂದು ತಿಳಿಸಿದೆ.