ಕೇಂದ್ರ ಸರ್ಕಾರ ನಗದು ರಹಿತ ವ್ಯವಹಾರಗಳನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಹೊಸ ಬಗೆಯ ಗ್ರಾಹಕ ಸ್ನೇಹಿ ಆಧಾರ್ ಪೇಮೆಂಟ್ ಆಪ್ ಅಭಿವೃದ್ಧಿಪಡಿಸಿ ಡಿಸೆಂಬರ್ 25ರಂದು ಬಿಡುಗಡೆಗೊಳಿಸಿದೆ.

ಹೆಚ್ಚು ಮುಖಬೆಲೆಯ ನೋಟು ರದ್ದತಿ ನಂತರ ನಗದು ರಹಿತ ವ್ಯವಹಾರ ಉತ್ತೇಜನಕ್ಕಾಗಿ ಸರ್ಕಾರ ಹಲವು ಯೋಜನೆಗಳನ್ನು ಕಾರ್ಯರೂಪಕ್ಕೆ ತರುತ್ತಿದೆ.
ಐಡಿಎಪ್ಎ ಬ್ಯಾಂಕು ಮತ್ತು ಯುಐಡಿಎಐ ಜತೆಗೂಡಿ ಅಭಿವೃದ್ಧಿಪಡಿಸಿರುವ ಆಧಾರ್ ಪೇಮೆಂಟ್ ಆಪ್ ಬಳಕೆ ತುಂಬಾ ಸುಲಭವಾಗಿದೆ.

ಆಧಾರ್ ಪೇಮೆಂಟ್ ಆಪ್ ಹೇಗೆ ಕಾರ್ಯನಿರ್ವಹಿಸುತ್ತದೆ?

ಆಧಾರ್ ಪೇಮೆಂಟ್ ಆಪ್ ಸ್ಮಾರ್ಟ್ ಫೋನ್ ಗಳಿಗೆ ಡೌನ್ ಲೋಡ್ ಮಾಡಿ, ರೂ. 2000 ಬೆಲೆಯ ಬೆರಳಚ್ಚು ಬಯೋಮೆಟ್ರಿಕ್ ಸಾಧನವನ್ನು ಜೋಡಿಸಿಕೊಳ್ಳಬೇಕು. ಗ್ರಾಹಕ ತನ್ನ ಆಧಾರ್ ನಂಬರ್ ಆಪ್ ಗೆ ಫೀಡ್ ಮಾಡಿ, ವ್ಯವಹರಿಸುವ ಬ್ಯಾಂಕ್ ಆಯ್ಕೆ ಮಾಡಬೇಕು. ಬಯೋಮೆಟ್ರಿಕ್ ಸ್ಕ್ಯಾನ್ ಪ್ರಮಾಣೀಕೃತ ವ್ಯವಹಾರದ ಪಾಸ್ವರ್ಡ್ ಆಗಿ ಕಾರ್ಯನಿರ್ವಹಿಸುತ್ತದೆ.

ಆಧಾರ್ ಪೇಮೆಂಟ್ ಆಪ್ ವ್ಯವಸ್ಥೆಯಲ್ಲಿ ಡೆಬಿಟ್/ಕ್ರೆಡಿಟ್ ಕಾರ್ಡ್ ಬಳಸುವ ಅಗತ್ಯ ಇಲ್ಲ. ಅಲ್ಲದೆ ಕಾರ್ಡುಗಳ ಪಾಸ್ವರ್ಡ್ ಸೋರಿಕೆಯಾಗುವ ಭಯವಿಲ್ಲ. ವೀಸಾ ಅಥವಾ ಮಾಸ್ಟರ್ ಕಾರ್ಡ್ ಸಂಸ್ಥೆಗಳಿಗೆ ಯಾವುದೇ ಶುಲ್ಕ ಪಾವತಿಯಾಗುವುದಿಲ್ಲ.
ದೇಶದಾದ್ಯಂತ ಈಗಾಗಲೇ 40 ಕೋಟಿ ಆಧಾರ್ ಕಾರ್ಡುಗಳು ಬ್ಯಾಂಕು ಖಾತೆಯೊಂದಿಗೆ ಜೋಡಿಸಲ್ಪಟ್ಟಿದ್ದು, 2017ರ ಮಾರ್ಚ್ ಒಳಗಾಗಿ ಎಲ್ಲ ಆಧಾರ್ ಕಾರ್ಡ್ ಗಳನ್ನು ಬ್ಯಾಂಕ್ ಖಾತೆಗೆ ಸಂಪರ್ಕಿಸುವ ಗುರಿ ಹೊಂದಲಾಗಿದೆ ಎಂದು ಅಜಯ್ ಭೂಷಣ್ ಹೇಳಿದ್ದಾರೆ.