ಚೀನಾ ಒಟ್ಟು ದೇಶಿ ಉತ್ಪನ್ನ(ಜಿಡಿಪಿ) ಕಳೆದ 26 ವರ್ಷಗಳಲ್ಲೇ ದಾಖಲೆ ಪ್ರಮಾಣದಲ್ಲಿ ಕುಸಿತ ಕಂಡಿದ್ದು, 2016ನೇ ಸಾಲಿನಲ್ಲಿ ಶೇ. 6.7ರಷ್ಟಾಗಿದೆ.

ನಾಲ್ಕನೇ ತ್ರೈಮಾಸಿಕದಲ್ಲಿ ಬೆಳವಣಿಗೆ ದರ ಶೇ. 6.8ರಷ್ಟಿದ್ದರೆ, ಮೂರನೇ ತ್ರೈಮಾಸಿಕದಲ್ಲಿ ಶೇ. 6.7ರಷ್ಟಿತ್ತು ಎಂದು ರಾಷ್ಟ್ರೀಯ ಅಂಕಿ-ಅಂಶ ಬ್ಯೂರೊ(ಎನ್ ಬಿಎಸ್) ವರದಿ ಮಾಡಿದೆ.

2016ರ ಆರ್ಥಿಕ ಸಾಲಿನಲ್ಲಿ ಸರ್ಕಾರ ಶೇ. 6.5ರಿಂದ ಶೇ. 7ರಷ್ಟು ಬೆಳವಣಿಗೆ ದರ ಸಾಧಿಸುವ ಗುರಿ ಹೊಂದಿತ್ತು. ಜಿಡಿಪಿ ಕುಸಿತ ಕಂಡಿದ್ದರೂ ಸಹ ಸರ್ಕಾರ ನಿರೀಕ್ಷಿತ ಗುರಿ ತಲುಪಿದೆ ಎಂದು ಚೀನಾದ ಅಧಿಕೃತ ಮೂಲಗಳು ತಿಳಿಸಿವೆ.

2016ನೇ ವರ್ಷದಲ್ಲಿ ಜಿಡಿಪಿ 10 ಟ್ರಿಲಿಯನ್ ಡಾಲರ್ ಗಳಷ್ಟಾಗಿದ್ದರೆ, ಸೇವಾ ಕ್ಷೇತ್ರ ಶೇ. 51.6 ರಷ್ಟು ಕೊಡುಗೆ ನೀಡಿದೆ. 2015ನೇ ಸಾಲಿನಲ್ಲಿ ಶೇ. 6.1 ರಷ್ಟು ಇದ್ದ ಕೈಗಾರಿಕಾ ಉತ್ಪಾದನೆ ಶೇ. 6 ಕ್ಕೆ ಕುಸಿದಿದೆ.