ನೋಟು ರದ್ದತಿ ನಂತರದಲ್ಲಿ ರಿಯಲ್ ಎಸ್ಟೇಟ್ ವಲಯ ನಿಧಾನಗತಿಯ ಪ್ರಗತಿಯಲ್ಲಿದ್ದು, ಇದಕ್ಕೆ ಉತ್ತೇಜನ ನೀಡುವ ಸಲುವಾಗಿ ಅರುಣ್ ಜೇಟ್ಲಿ 'ಕೈಗೆಟುಕುವ ದರದ ಮನೆ ಯೋಜನೆ'ಗೆ ಮೂಲಸೌಕರ್ಯದ ಸ್ವರೂಪ ಒದಗಿಸಿದ್ದಾರೆ.

2016ರ ಬಜೆಟ್ ನಲ್ಲಿಯೇ 'ಕೈಗೆಟುಕುವ ದರದಲ್ಲಿ ಮನೆ ಯೋಜನೆ'ಯನ್ನು ಜೇಟ್ಲಿ ಪ್ರಕಟಿಸಿದ್ದರು. ಈ ಯೋಜನೆ ಅಡಿ ನಿರ್ಮಿಸುವ ಮನೆಗಳು ಮತ್ತು ವಸತಿ ಸಮುಚ್ಚಯಗಳಿಗೆ ಶೇ. 100ರಷ್ಟು ತೆರಿಗೆ ವಿನಾಯಿತಿ ನೀಡಲಾಗಿತ್ತು. ಆದರೆ ಈ ಯೋಜನೆ ಅಡಿಯಲ್ಲಿ ವಿಧಿಸಲಾಗಿದ್ದ ಹಲವು ಷರತ್ತುಗಳನ್ನು ಅರುಣ್ ಜೇಟ್ಲಿ ಸಡಿಲಿಸಿದ್ದಾರೆ.

ಹಿಂದಿನ ಷರತ್ತಿನ ಪ್ರಕಾರ ಮನೆ ನಿರ್ಮಾಣ ಆರಂಭಿಸಿ ಮೂರು ವರ್ಷದ ಒಳಗೆ ಕಾಮಗಾರಿ ಪೂರ್ಣಗೊಳಿಸಿದರೆ ಮಾತ್ರ ತೆರಿಗೆ ವಿನಾಯಿತಿ ದೊರೆಯುತ್ತಿತ್ತು. ಈಗ ನಿರ್ಮಾಣ ಅವಧಿ ಮಿತಿಯನ್ನು ಮೂರು ವರ್ಷದಿಂದ ಐದು ವರ್ಷಕ್ಕೆ ಏರಿಸಲಾಗಿದೆ. ಮನೆಯ ವಿಸ್ತೀರ್ಣ 30 ಮತ್ತು 60 ಚದರ ಮೀಟರ್‌ಗಿಂತ ಹೆಚ್ಚಿದ್ದರೂ ತೆರಿಗೆ ವಿನಾಯಿತಿ ದೊರೆಯಲಿದೆ.