ಡಿಸೆಂಬರ್‌ನಲ್ಲಿ ಜಿಎಸ್ಟಿ ಸಂಗ್ರಹ ರೂ. 94,726 ಕೋಟಿಗೆ ಇಳಿಕೆ

ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ಸಂಗ್ರಹ ಕಳೆದ ಡಿಸೆಂಬರ್‌ನಲ್ಲಿ ರೂ. 94,726 ಕೋಟಿಗೆ ಇಳಿಕೆಯಾಗಿದೆ. ಕಳೆದ ನವೆಂಬರ್‌ನಲ್ಲಿ ರೂ. 97,637 ಕೋಟಿ ಸಂಗ್ರಹವಾಗಿತ್ತು. ಡಿಸೆಂಬರ್ ನಲ್ಲಿ ಸೇಲ್ಸ್ ರಿಟರ್ನ್ಸ್ ಅಥವಾ ಜಿಎಸ್ಟಿಆರ್ -3ಬಿ ರೂ. 72.44 ಲಕ್ಷ ಸಲ್ಲಿಕೆಯಾಗಿದೆ ಎಂದು ಹಣಕಾಸು ಸಚಿವಾಲಯ ಹೇಳಿದೆ.

ಡಿಸೆಂಬರ್ ನಲ್ಲಿ ಸಂಗ್ರಹವಾಗಿರುವ ಜಿಎಸ್ಟಿ ರು. 94,726 ಕೋಟಿ ಪೈಕಿ ಸಿಜಿಎಸ್ಟಿ ರೂ. 16,442 ಕೋಟಿ, ರಾಜ್ಯ ಜಿಎಸ್ಟಿ ರೂ. 22,459 ಕೋಟಿ,ಸಂಯೋಜಿತ ಜಿಎಸ್ಟಿ (ಐಜಿಎಸ್‌ಟಿ) ರೂ. 47,936 ಕೋಟಿ ಮತ್ತು ಸೆಸ್ ರೂ. 7,888 ಕೋಟಿ ಆಗಿದೆ.

ಕಳೆದ ಏಪ್ರಿಲ್‌-ಡಿಸೆಂಬರ್‌ ಅವಧಿಯಲ್ಲಿ ರೂ. 8.71 ಲಕ್ಷ ಕೋಟಿ ಜಿಎಸ್ಟಿ ಸಂಗ್ರಹಿಸಲಾಗಿತ್ತು. 2018-19ರ ಬಜೆಟ್ ಅಂದಾಜಿನ ಪ್ರಕಾರ ವಾರ್ಷಿಕ ಸಂಗ್ರಹದ ಗುರಿ ರೂ. 13.48 ಲಕ್ಷ ಕೋಟಿ ಆಗಿದೆ. 2017ರ ಜುಲೈ ಹಾಗೂ 2018ರ ಮಾರ್ಚ್‌ ಅವಧಿಯಲ್ಲಿ ಮಾಸಿಕ ಸರಾಸರಿ ರೂ. 89,885 ಕೋಟಿ ಸಂಗ್ರಹವಾಗಿದೆ.