ಎಲ್ ಅಂಡ್ ಟಿ Q3: ನಿರೀಕ್ಷೆಗೂ ಮೀರಿ ಶೇ 37ರಷ್ಟು ಅಧಿಕ ನಿವ್ವಳ ಲಾಭ
ಲಾರ್ಸನ್ ಅಂಡ್ ಟ್ರಾಬ್ರೋ(ಎಲ್ ಅಂಡ್ ಟಿ) ಲಿಮಿಟೆಡ್ ಸಂಸ್ಥೆ ತನ್ನ ಮೂರನೇ ತ್ರೈಮಾಸಿಕ ವರದಿಯನ್ನು ಶುಕ್ರವಾರದಂದು ಪ್ರಕಟಿಸಿದೆ.
ಮಾರುಕಟ್ಟೆ ತಜ್ಞರ ನಿರೀಕ್ಷೆಗೂ ಮೀರಿ ಲಾಭ ಗಳಿಸಿದೆ. ಉತ್ತಮ ಯೋಜೆನೆಗಳು ಹಾಗೂ ಕಾರ್ಯ ನಿರ್ವಹಣೆಯ ಮೂಲಕ ಶೇ 37ರಷ್ಟು ಲಾಭ ಏರಿಕೆ ಕಂಡಿದೆ. ಡಿಸೆಂಬರ್ 31ಕ್ಕೆ ಕೊನೆಗೊಂಡ ತ್ರೈಮಾಸಿಕ ವರದಿಯಂತೆ ನಿವ್ವಳ ಲಾಭ 2,042 ಕೋಟಿ ರು (286.84 ಮಿಲಿಯನ್ ಡಾಲರ್) ಬಂದಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 1,490 ಕೋಟಿ ರು ಲಾಭ ಬಂದಿತ್ತು.
ಮುಂಬೈನಲ್ಲಿ ಮುಖ್ಯ ಕಚೇರಿ ಹೊಂದಿರುವ ಎಲ್ ಅಂಡ್ ಟಿ ಸಂಸ್ಥೆಯು ಈ ತ್ರೈಮಾಸಿಕದಲ್ಲಿ 1,788 ಕೋಟಿ ರು ಗಳಿಸಬಹುದು ಎಂದು ಮಾರುಕಟ್ಟೆ ತಜ್ಞರು ನೀರಿಕ್ಷೆ ಹೊಂದಿದ್ದರು. ಆದರೆ, ನಿರೀಕ್ಷೆಗೂ ಮೀರಿದ ಲಾಭ ಬಂದಿದೆ.
ಆದಾಯ ಶೇ 24.2ರಷ್ಟು ಏರಿಕೆ ಕಂಡಿದ್ದು, 35,709 ಕೋಟಿ ರು ರಷ್ಟಾಗಿದೆ. ಈ ತ್ರೈಮಾಸಿಕ ಅವಧಿಯಲ್ಲಿ ಒಟ್ಟು 42,233 ಕೋಟಿ ಮೌಲ್ಯದ ಹೊಸ ಯೋಜನೆಗಳು ಸಿಕ್ಕಿವೆ. ಶುಕ್ರವಾರದಂದು ಬಿಎಸ್ಇಯಲ್ಲಿ ಶೇ 0.85ರಷ್ಟು ಇಳಿಕೆ ಕಂಡು 1,285.5 ರು ನಂತೆ ವ್ಯವಹಾರ ನಡೆಸಿತ್ತು.