ದೇಶದ 2018-19ನೇ ಸಾಲಿನ ಮೂರನೇ ತ್ರೈಮಾಸಿಕದ ಅಕ್ಟೋಬರ್-ಡಿಸೆಂಬರ್ ಅವಧಿಯಲ್ಲಿ ಆರ್ಥಿಕ ವೃದ್ಧಿ ದರ (ಜಿಡಿಪಿ) ಶೇ. 6.6ಕ್ಕೆ ಕುಸಿದಿದೆ.

ಕಳೆದ ಐದು ತ್ರೈಮಾಸಿಕಗಳಲ್ಲೇ ಅತ್ಯಂತ ಕಡಿಮೆ ಆರ್ಥಿಕ ವೃದ್ಧಿ ದರ ಇದಾಗಿದೆ. ಅಕ್ಟೋಬರ್ - ಡಿಸೆಂಬರ್ ತ್ರೈಮಾಸಿಕದ ಅವಧಿಯಲ್ಲೇ ಜಿಡಿಪಿ ದರ ಶೇ. 7 ರಿಂದ ಶೇ. 6.6 ಕ್ಕೆ ಕುಸಿತ ಕಂಡಿದೆ ಎಂದು ಕೇಂದ್ರ ಸಾಂಖ್ಯಿಕ ಕಚೇರಿ ತಿಳಿಸಿದೆ.

ಜಿಡಿಪಿಯು ಹಿಂದಿನ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಸ್ಥಿರ ಬೆಲೆ ಲೆಕ್ಕದಲ್ಲಿ (೨೦೧೧-೧೨) ಶೇ. 7.7 ದಾಖಲಾಗಿತ್ತು. ಮೋದಿ ನೇತ್ರತ್ವದ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಕೈಗೊಂಡ ಆರ್ಥಿಕ ಸುಧಾರಣೆಗಳ ನಂತರ ತೀವ್ರವಾಗಿ ಕುಸಿತಗೊಂಡಿದ್ದ ಜಿಡಿಪಿ ಈ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಶೇ. 8.2ಕ್ಕೆ ಏರಿಕೆ ಕಂಡಿತ್ತು. ಎರಡನೇ ತ್ರೈಮಾಸಿಕದಲ್ಲಿ ಶೇ. 7ಕ್ಕೆ ಕುಸಿತ ಕಂಡಿತ್ತು. ಈಗ ಮತ್ತೆ ಶೇ. 6.6 ಕ್ಕೆ ಕುಸಿದಿದೆ. ಜಿಡಿಪಿ ಕುಸಿತಕ್ಕೆ ಉತ್ಪಾದನಾ ಹಾಗೂ ಕೃಷಿ ಕ್ಷೇತ್ರದಲ್ಲಿನ ಕುಸಿತ ಕಾರಣ ಎನ್ನಲಾಗಿದೆ.