ಇಂಡಿಗೋ ಗುಡ್ ನ್ಯೂಸ್! ಅಗ್ಗದ ದರ ಮತ್ತು ಹೆಚ್ಚಿನ ಸೇವೆಗಳೊಂದಿಗೆ ಬಹುದೂರದ ಪ್ರಯಾಣ ಸೌಲಭ್ಯ

ವಿಶ್ವದ ಯಶಸ್ವಿ ವಿಮಾನಯಾನ ಇಂಡಿಗೋ ಏರ್ಲೈನ್ ಸಂಸ್ಥೆ ಯುರೋಪ್ ಏಶಿಯಾದಲ್ಲಿ ಕಡಿಮೆ ದರದಲ್ಲಿ ಬಿಸಿನೆಸ್ ಕ್ಲಾಸ್ ನಂತಹ ಸೌಲಭ್ಯ ಹೊಂದಿರುವ ಸೀಟುಗಳನ್ನು ಹೊಂದಲು ಯೋಜಿಸುತ್ತಿದೆ.

ಪ್ರಸ್ತುತ, ಇಂಡಿಗೋ ಇಸ್ತಾಂಬುಲ್ ವರೆಗೆ ಹಾರಾಟ ನಡೆಸುತ್ತಿದ್ದು, ಇದೀಗ ಬಹುದೂರದ ನೆಟ್ವರ್ಕ್ ನಲ್ಲಿ ಹಾರಾಟ ನಡೆಸಲು ತಯಾರಿ ನಡೆಸುತ್ತಿದೆ. ಆರು ತಿಂಗಳ ಒಳಗಾಗಿ ಯೂರೋಪ್ ನಲ್ಲಿ ಒಂದು ವಿಮಾನ ನಿಲ್ದಾಣವನ್ನು ಪ್ರಾರಂಭಿಸಲು ವಿಮಾನಯಾನ ಸಂಸ್ಥೆ ಉದ್ದೇಶಿಸಿದೆ ಎಂದು ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ರೊನೋಜಾಯ್ ದತ್ತಾ ಕಳೆದ ವಾರ ನವದೆಹಲಿಯ ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.
ಇಂಡಿಗೋ ತನ್ನ ಅಗ್ಗದ ಆಫರ್, ಸಮಯಕ್ಕೆ ಸರಿಯಾಗಿ ಹಾರಾಟ ಮತ್ತು ಬೇರೆ ಯಾವುದಕ್ಕೂ ಹೆಚ್ಚಿನ ಚಾರ್ಜ್ ನ್ನು ಮಾಡದೆ ಉತ್ತಮ ಸೇವೆಗಳ ಮೂಲಕ ಗ್ರಾಹಕರನ್ನು ಆಕರ್ಷಿಸಿ ಕೇವಲ ಒಂದು ದಶಕದ ಅವಧಿಯಲ್ಲಿ ಭಾರತದ ಅರ್ಧದಷ್ಟು ಮಾರುಕಟ್ಟೆಯನ್ನು ಆಕ್ರಮಿಸಿಕೊಂಡಿದೆ.

ಸುದೀರ್ಘ ಪ್ರಯಾಣದ ಯೋಜನೆಗಳಲ್ಲಿ ಪ್ರಯಾಣಿಕರಿಗೆ ಸಂತೋಷದಯಕವಾಗಿಸಲು ಪ್ರಯಾಣದ ಅವಧಿಯಲ್ಲಿ ಅಗತ್ಯ ಸೌಕರ್ಯಗಳನ್ನು ಪೂರೈಸಲು ಪ್ರಾಮುಖ್ಯತೆ ನೀಡಲಾಗುತ್ತದೆ ಎಂದಿದ್ದಾರೆ.

ಏಳೆಂಟು ತಾಸುಗಳ ಸುದೀರ್ಘ ಪ್ರಯಾಣಗಳಲ್ಲಿ ಪ್ರಯಾಣಿಕರು ದಣಿಯುತ್ತಾರೆ. ಜನರು ಸ್ನಾನಗೃಹಗಳನ್ನು ಬಳಸಲು ಹಾಗು ಆಗಾಗ್ಗೆ ತಿನ್ನಲು ಇಷ್ಟಪಡುತ್ತಾರೆ. ಹೀಗಾಗಿ ಇಂತಹ ಬದಲಾವಣೆಗಳಿಗೆ ಅವಕಾಶ ಮಾಡಿಕೊಡಲಾಗುವುದು ಎಂದು ದತ್ತಾ ಹೇಳಿದ್ದಾರೆ. ನಾವು ನಮ್ಮ ಸೇವೆಯನ್ನು ಪುನರ್ವಿನ್ಯಾಸ ಮಾಡಬೇಕು. ಹೆಚ್ಚು ಆಹಾರ, ಹೆಚ್ಚು ಬಿಸಿ ಟವೆಲ್ ನಂತಹ ಅಗತ್ಯ ಸೇವೆಗಳನ್ನು ಪೂರೈಸಿ ಬಿಸಿನೆಸ್ ಕ್ಲಾಸ್ ಗೆ ಪ್ರಾಮುಖ್ಯತೆ ನೀಡುತ್ತೇವೆ ಎಂದಿದ್ದಾರೆ.

ಇಂಡಿಗೊ ಈಗಾಗಲೇ 53 ದೇಶೀಯ ಮತ್ತು 18 ಅಂತರರಾಷ್ಟ್ರೀಯ ಮಾರ್ಗಗಳ ಮಧ್ಯೆ ಸಂಪರ್ಕ ಹೊಂದಿದೆ. ಅಂತರಾಷ್ಟ್ರೀಯ ಮಾರ್ಗಗಳ ನಡುವೆ ಇನ್ನೂ ಹೆಚ್ಚಿನ ಸಂಪರ್ಕ ಹೊಂದಲು ಯೋಜನೆ ನಡೆಸುತ್ತಿದೆ ಎಂದು ದತ್ತಾ ಹೇಳಿದ್ದಾರೆ.