ಸೋಮವಾರದ ದಿನದ ಅಂತ್ಯಕ್ಕೆ ದಾಖಲೆಯ ಗರಿಷ್ಠ ಮಟ್ಟ ತಲುಪಿದ ನಂತರ ಜೂನ್ 4 ರ ಮಂಗಳವಾರದಂದು ದಿನದ ವಹಿವಾಟಿನ ಅಂತ್ಯಕ್ಕೆ ಬೆಂಚ್ಮಾರ್ಕ್ ಸೂಚ್ಯಂಕಗಳು ಕುಸಿತ ಕಂಡವು. ನಿನ್ನೆಯ ಸೋಮವಾರದ ದಿನದ ವಹಿವಾಟಿನಲ್ಲಿ ಸೆನ್ಸೆಕ್ಸ್‌ ಮತ್ತು ನಿಫ್ಟಿ ಸಾರ್ವಕಾಲಿಕ ದಾಖಲೆಯ ಏರಿಕೆ ಕಂಡಿದ್ದವು.

ಸೆನ್ಸೆಕ್ಸ್ ಸೂಚ್ಯಂಕ 184.08 ಪಾಯಿಂಟ್ ಕುಸಿತ ಕಂಡು 40083.54 ಕ್ಕೆ ತಲುಪಿದೆ. ಜೊತೆಗೆ ನಿಫ್ಟಿ 66.80 ಪಾಯಿಂಟ್ ಕುಸಿತದೊಂದಿಗೆ 12021.70 ಮಟ್ಟ ತಲುಪಿದೆ. ಸುಮಾರು 1108 ಷೇರುಗಳು ಲಾಭ, 1428 ಷೇರುಗಳು ಕುಸಿತ ಮತ್ತು 175 ಷೇರುಗಳು ಯಥಾಸ್ಥಿತಿಯಲ್ಲಿದ್ದವು. ಇಂದು ಮಂಗಳವಾರದ ಆರಂಭಿಕ ವಹಿವಾಟಿನಲ್ಲಿ ಮುಂಬೈ ಷೇರು ಪೇಟೆ 15 ಅಂಕಗಳ ನಷ್ಟಕ್ಕೆ ಗುರಿಯಾಗಿತ್ತು.

ಜಾಗತಿಕ ಷೇರುಪೇಟೆಯಲ್ಲಿ ತೋರಿ ಬಂದ ದೌರ್ಬಲ್ಯ, ಆರ್‌ಬಿಐ ಇನ್ನೆರಡು ದಿನಗಳಲ್ಲಿ ಪ್ರಕಟಿಸಲಿರುವ ಹಣಕಾಸು ನೀತಿ ಬಗೆಗಿನ ಕಾತರ ಮೊದಲಾದ ಕಾರಣಗಳಿಗೆ ದೇಶಿ ಷೇರುಪೇಟೆಯಲ್ಲಿ ಉತ್ಸಾಹ ಕಂಡು ಬರಲಿಲ್ಲ.
ಝೀ ಎಂಟರ್ಟೈನ್ಮೆಂಟ್, ಹೀರೋ ಮೊಟೊಕಾರ್ಪ್, ಏಷ್ಯನ್ ಪೇಂಟ್ಸ್, ಎಚ್ಸಿಎಲ್ ಟೆಕ್ ಮತ್ತು ಟಿಸಿಎಸ್ ಕಂಪನಿಗಳು ನಷ್ಟ ಅನುಭವಿಸಿದವು. ಯೆಸ್ ಬ್ಯಾಂಕ್, ಭಾರ್ತಿ ಇನ್ಫ್ರಾಟೆಲ್, ಆಕ್ಸಿಸ್ ಬ್ಯಾಂಕ್, ಎನ್ಟಿಪಿಸಿ ಮತ್ತು ವೇದಾಂತ ಕಂಪನಿಗಳು ಲಾಭ ಗಳಿಸಿವೆ.
ಇಂದು ಡಾಲರ್‌ ಎದುರು ರೂಪಾಯಿ ಮೌಲ್ಯ 26 ಪೈಸೆಗಳ ಏರಿಕೆಯನ್ನು ಕಂಡು 69.00 ರೂ. ಮಟ್ಟದಲ್ಲಿ ವ್ಯವಹಾರ ನಿರತವಾಗಿತ್ತು.