ಜೂನ್ 30 ಕ್ಕೆ ಕೊನೆಗೊಂಡ ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಭಾರತದ ಜಿಡಿಪಿ ದರ ಶೇ. 6ರಷ್ಟು ಇರಲಿದೆ ಎಂದು ಭಾರತೀಯ ವಾಣಿಜ್ಯೋದಮ ಸಂಘಟನೆಗಳ ಒಕ್ಕೂಟ (ಫಿಕ್ಕಿ) ಸಮೀಕ್ಷೆ ವರದಿ ಮಾಡಿದೆ.

2018-19ರಲ್ಲಿ ಇದೇ ಏಪ್ರಿಲ್-ಜೂನ್ ತ್ರೈಮಾಸಿಕದ ಅವಧಿಗೆ ವೃದ್ದಿ ದರವು ಶೇ. 8.2ರಷ್ಟು ದಾಖಲಾಗಿತ್ತು. ಪ್ರಸ್ತುತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದ ಆರ್ಥಿಕ ವೃದ್ಧಿ ದರವನ್ನು ಕೇಂದ್ರೀಯ ಸಾಂಖ್ಯಿಕ ಕಚೇರಿ ಮುಂದಿನ ವಾರ ಪ್ರಕಟಿಸುವ ಸಾಧ್ಯತೆ ಇದೆ.
ಇತ್ತೀಚಿಗೆ ಎನ್‌ಎಸ್‌ಎಸ್‌ಒ ಬಿಡುಗಡೆ ಮಾಡಿದ ನಿರುದ್ಯೋಗ ಸಂಖ್ಯೆಯು ದೇಶದ ಉದ್ಯೋಗಕ್ಕೆ ಸಂಬಂಧಿಸಿದಂತೆ ಕಠೋರ ಪರಿಸ್ಥಿತಿಯ ಚಿತ್ರಣ ನೀಡುತ್ತದೆ ಎಂದು ಎಂದು ಫಿಕ್ಕಿ ಎಕನಾಮಿಕ್ ಔಟ್‌ಲುಕ್ ಸಮೀಕ್ಷೆ ತಿಳಿಸಿದೆ.
ಇದು 2019-20ರ ವಾರ್ಷಿಕ ಸರಾಸರಿ ಜಿಡಿಪಿ ಬೆಳವಣಿಗೆಯ ಮುನ್ಸೂಚನೆಯನ್ನು ಶೇ. 6.9ಕ್ಕೆ ಇಳಿಸಿದೆ. ಕನಿಷ್ಠ ಮತ್ತು ಗರಿಷ್ಠ ಜಿಡಿಪಿ ಬೆಳವಣಿಗೆ ಅಂದಾಜು ಕ್ರಮವಾಗಿ ಶೇ. 6.7 ಮತ್ತು ಶೇ. 7.2ರಷ್ಟು ಇರಲಿದೆ ಎಂದು ಅಭಿಪ್ರಾಯಿಸಿದೆ. ಆರ್ಬಿಐ ಬಡ್ಡಿದರಗಳನ್ನು ಕಡಿಮೆ ಮಾಡುವ ಧೋರಣೆಯನ್ನು ಈ ವಷ್ಧ ಮುಂದುವರೆಸಿಕೊಂಡು ಹೋಗಬೇಕು ಎಂದು ಸಮೀಕ್ಷೆಯಲ್ಲಿ ತಿಳಿಸಿದೆ.