ಕಳ್ಳಸಾಗಣೆ ಮಾಡುತ್ತಿದ್ದ 1.66 ಕೋಟಿಯ ಚಿನ್ನ ವಿಮಾನ ನಿಲ್ದಾಣದಲ್ಲಿ ವಶಕ್ಕೆ

ಕಳ್ಳಸಾಗಣೆ ಮಾಡುತ್ತಿದ 11 ಮಂದಿ ಪ್ರಯಾಣಿಕರಿಂದ 3.11 ಕೇಜಿ ತೂಕದ, 1.66 ಕೋಟಿ ಮೌಲ್ಯದ ಚಿನ್ನವನ್ನು ಹೈದರಾಬಾದ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಶುಕ್ರವಾರ ಕಸ್ಟಮ್ಸ್ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಅಧಿಕಾರಿಗಳು ನೀಡಿದ ಮಾಹಿತಿ ಪ್ರಕಾರ, ಈ ಪ್ರಯಾಣಿಕರು ವಂದೇ ಭಾರತ್ ಅಭಿಯಾನದ ವಿಮಾನದಲ್ಲಿ ಸೌದಿ ಅರೇಬಿಯಾದಿಂದ ಗುರುವಾರ ಬಂದಿದ್ದರು.

ಚಿನ್ನದ ಗಟ್ಟಿಯನ್ನು ತಮ್ಮ ಟ್ರೌಷರ್ ನಲ್ಲಿನ ಒಳ ಜೇಬಿನಲ್ಲಿ ಇರಿಸಿಕೊಂಡಿದ್ದರು. ಈ ಪ್ರಯಾಣಿಕರ ಅನುಮಾನಾಸ್ಪದ ನಡವಳಿಕೆಯಿಂದ ಪರಿಶೀಲನೆ ನಡೆಸಿದಾಗ ಚಿನ್ನ ಪತ್ತೆ ಆಗಿದೆ. ಅವರ ಮೇಲೆ ಚಿನ್ನ ಕಳ್ಳಸಾಗಣೆಯ ಪ್ರಕರಣ ದಾಖಲಿಸಿ, ಈ ಸಂಬಂಧವಾಗಿ ಪ್ರಶ್ನೆ ಮಾಡಲಾಗುತ್ತಿದೆ.

ಪ್ರಾತಿನಿಧಿಕ ಚಿತ್ರ

ಮತ್ತೊಂದು ಪ್ರಕರಣವು ಸಿಐಎಸ್ ಎಫ್ ಜತೆಗೆ ಕಸ್ಟಮ್ಸ್ ನಡೆಸಿದ ಕಾರ್ಯಾಚರಣೆಯಲ್ಲಿ ಐವರು ಪ್ರಯಾಣಿಕರನ್ನು ಪತ್ತೆ ಮಾಡಲಾಗಿದೆ. ಇವರು ಗಂಧದ ಮರ ಕಳ್ಳಸಾಗಣೆಗೆ ಪ್ರಯತ್ನಿಸುತ್ತಿದ್ದರು. ಒಟ್ಟು 78.5 ಕೇಜಿ ಗಂಧದ ಮರವನ್ನು ಗುರುವಾರ ವಿಮಾನ ನಿಲ್ದಾಣದಲ್ಲಿ ವಶಕ್ಕೆ ಪಡೆಯಲಾಗಿದೆ. ಈ ಐವರು ಹೈದರಾಬಾದ್ ನಿಂದ ಸೂಡಾನ್ ನಲ್ಲಿನ ಖರ್ಟೋಂಗೆ ತೆರಳುತ್ತಿದ್ದರು. ಕಸ್ಟಮ್ಸ್ ಅಧಿಕಾರಿಗಳು ಮುಂದಿನ ವಿಚಾರಣೆ ನಡೆಸುತ್ತಿದ್ದಾರೆ.