ಸುಮಾರು 70 ಸಾವಿರ ಪೆಟ್ರೋಲ್ ಪಂಪ್ಸ್ ಪ್ರತಿಭಟನೆ, ಗ್ರಾಹಕರ ಗತಿ?

ದೇಶದ ವಿವಿಧ ರಾಜ್ಯಗಳಲ್ಲಿ ಮೇ 31ರಂದು ಪೆಟ್ರೋಲ್ ಪಂಪ್ ಮಾಲೀಕರು ಪ್ರತಿಭಟನೆ ನಡೆಸಿದ್ದಾರೆ. ಸುಮಾರು 24 ರಾಜ್ಯಗಳ 70 ಸಾವಿರ ಪೆಟ್ರೋಲ್ ಪಂಪ್ಸ್ ಬಂದ್ ಆಗಿವೆ. ಪೆಟ್ರೋಲ್ ಹಾಗೂ ಡೀಸೆಲ್ ಖರೀದಿ ಮೇಲೆ ನೀಡಲಾಗುವ ಕಮಿಷನ್ ದರ ಹೆಚ್ಚಳಕ್ಕೆ ಮಾಲೀಕರು ಆಗ್ರಹಿಸಿದ್ದಾರೆ. ಇದಲ್ಲದೆ ವಿವಿಧ ಬೇಡಿಕೆಗಳನ್ನು ಸರ್ಕಾರ ಈಡೇರಿಸಿಲ್ಲ ಎಂದು ದೂರಿದ್ದಾರೆ. ಹೀಗಾಗಿ, ಮೇ 31ರಂದು ಸರ್ಕಾರ ಸ್ವಾಮ್ಯದ ತೈಲ ಕಂಪನಿಗಳಿಂದ ಇಂಧನ ಖರೀದಿಸದಿರಲು ಪಂಪ್ ಮಾಲೀಕರು ನಿರ್ಧರಿಸಿದ್ದಾರೆ.

ಪೆಟ್ರೋಲ್, ಡೀಸೆಲ್ ರಿಟೇಲ್ ದರ ಹೆಚ್ಚಳವಾದ ಬಳಿಕ ಪೆಟ್ರೋಲಿಯಂ ಕಂಪನಿಗಳಿಗೆ ಭರ್ಜರಿ ಲಾಭವಾಗಿದೆ. ಆದರೆ ಡೀಲರ್ಸ್ ಕಮಿಷನ್ ಪ್ರಮಾಣದಲ್ಲಿ ಯಾವುದೇ ಏರಿಕೆ ಕಂಡು ಬಂದಿಲ್ಲ ಎಂದು ಪೆಟ್ರೋಲ್ ಪಂಪ್ ಮಾಲೀಕರು ಆರೋಪಿಸಿದ್ದಾರೆ. ಇಂಧನ ಕಮಿಷನ್ ಹೆಚ್ಚಳಕ್ಕೆ ಆಗ್ರಹಿಸಿ ದೇಶದ 24 ರಾಜ್ಯಗಳಲ್ಲಿ ಸುಮಾರು 70,000 ಪೆಟ್ರೋಲ್ ಪಂಪ್ ಮಾಲೀಕರು ಪ್ರತಿಭಟನೆ ನಡೆಸುತ್ತಿದ್ದಾರೆ.

ಗ್ರಾಹಕರಿಗೆ ಯಾವುದೇ ತೊಂದರೆ ಇಲ್ಲ

ವಿವಿಧ ರಾಜ್ಯಗಳಲ್ಲಿ ಪೆಟ್ರೋಲ್ ಡೀಲರ್ ಸಂಘಟನೆಗಳಿಂದ ಪ್ರತಿಭಟನೆ ಜಾರಿಯಲ್ಲಿದೆ. ಆದರೆ, ಇದರಿಂದ ರೀಟೈಲ್ ಮಾರಾಟ ಮತ್ತು ಗ್ರಾಹಕರ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ದೆಹಲಿ ಪೆಟ್ರೋಲ್ ವಿತರಕರ ಸಂಘದ ಅಧ್ಯಕ್ಷ ಅನುರಾಗ್ ಜೈನ್ ಹೇಳಿದ್ದಾರೆ. ಪೆಟ್ರೋಲ್ ಪಂಪ್‌ಗಳಲ್ಲಿ ಎರಡು ದಿನಗಳ ಸ್ಟಾಕ್ ಇದೆ. ಹೀಗಾಗಿ ಮಂಗಳವಾರವೂ ಚಿಲ್ಲರೆ ಗ್ರಾಹಕರಿಗೆ ಪೆಟ್ರೋಲ್, ಡೀಸೆಲ್ ಮಾರಾಟ ಮಾಡಲಿದ್ದಾರೆ. ಇದರ ಪರಿಣಾಮ ಕಂಪನಿಗಳಿಂದ ಖರೀದಿಗೆ ಮಾತ್ರ ಸೀಮಿತವಾಗಿರುತ್ತದೆ. ಆದರೆ, ಒಂದು ವೇಳೆ ಪ್ರತಿಭಟನೆ ಇನ್ನೆರಡು ದಿನ ಮುಂದುವರೆದರೆ ಲಭ್ಯ ದಾಸ್ತಾನು ಪ್ರಮಾಣ ತಗ್ಗಲಿದ್ದು, ಪೆಟ್ರೋಲ್ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಲಿದೆ.

ಯಾವ ರಾಜ್ಯಗಳಲ್ಲಿ ಪ್ರತಿಭಟನೆಗಳು

ತಮಿಳುನಾಡು, ಕರ್ನಾಟಕ, ಕೇರಳ, ತೆಲಂಗಾಣ, ಆಂಧ್ರಪ್ರದೇಶ, ದೆಹಲಿ, ಪಂಜಾಬ್, ಹರಿಯಾಣ, ರಾಜಸ್ಥಾನ, ಗುಜರಾತ್, ಮಹಾರಾಷ್ಟ್ರ, ಹಿಮಾಚಲ ಪ್ರದೇಶ, ಬಿಹಾರ, ಅಸ್ಸಾಂ, ಮೇಘಾಲಯ, ಅರುಣಾಚಲ ಪ್ರದೇಶ, ಮಿಜೋರಾಂ, ನಾಗಾಲ್ಯಾಂಡ್, ಮಣಿಪುರ, ತ್ರಿಪುರಾ, ಸಿಕ್ಕಿಂ ಉತ್ತರ ಬಂಗಾಳ, ಉತ್ತರ ಪ್ರದೇಶ ಮತ್ತು ಮಧ್ಯಪ್ರದೇಶದ ಅನೇಕ ವಿತರಕರು ಸೇರಿದಂತೆ 24 ರಾಜ್ಯಗಳ ಪೆಟ್ರೋಲ್ ಡೀಲರ್‌ಗಳು ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದಾರೆ.

5 ವರ್ಷಗಳಿಂದ ಕಮಿಷನ್ ದರ ಬದಲಾಗಿಲ್ಲ

ತೈಲ ಮಾರುಕಟ್ಟೆ ಕಂಪನಿಗಳು (ಒಎಂಸಿ) ಮತ್ತು ಡೀಲರ್‌ಗಳ ನಡುವಿನ ಒಪ್ಪಂದದ ಪ್ರಕಾರ, ಪ್ರತಿ 6 ತಿಂಗಳಿಗೊಮ್ಮೆ ಡೀಲರ್‌ಗಳ ಮಾರ್ಜಿನ್ ಬದಲಾಯಿಸಬೇಕು, ಆದರೆ 2017 ರಿಂದ ಯಾವುದೇ ಬದಲಾವಣೆಯಾಗಿಲ್ಲ. ಇದೇ ವೇಳೆ ಪೆಟ್ರೋಲ್ ಮತ್ತು ಡೀಸೆಲ್ ಚಿಲ್ಲರೆ ಬೆಲೆ ಈ ಅವಧಿಯಲ್ಲಿ ಬಹುತೇಕ ದ್ವಿಗುಣಗೊಂಡಿದೆ ಎಂದು ಡೀಲರ್ ಸಂಸ್ಥೆಗಳು ಆರೋಪಿಸುತ್ತವೆ,

ಇದಲ್ಲದೆ, ಈ ಸಮಯದಲ್ಲಿ ವಿತರಕರು ವ್ಯಾಪಾರಕ್ಕಾಗಿ ದುಪ್ಪಟ್ಟು ಬಂಡವಾಳವನ್ನು ಹೂಡಬೇಕಾಗಿತ್ತು, ಅದಕ್ಕಾಗಿ ಅವರು ಹೆಚ್ಚು ಸಾಲವನ್ನು ತೆಗೆದುಕೊಂಡಿದ್ದು, ಈಗ ಬಡ್ಡಿಯೂ ಹೆಚ್ಚಾಗಿದೆ. ಇಂದು ದೆಹಲಿಯ 400 ಪೆಟ್ರೋಲ್ ಪಂಪ್‌ಗಳಲ್ಲಿ ಮತ್ತು ಮಹಾರಾಷ್ಟ್ರದ 6,500 ಪಂಪ್‌ಗಳಲ್ಲಿ ಕಂಪನಿಗಳಿಂದ ತೈಲವನ್ನು ಖರೀದಿಸಲಾಗುವುದಿಲ್ಲ ಎಂದು ಮಾಹಿತಿ ನೀಡಿದರು.

ಕಮಿಷನ್ ದರ

ಪೆಟ್ರೋಲ್ ಪಂಪ್ ಡೀಲರ್‌ಗಳು ಪ್ರಸ್ತುತ ಪೆಟ್ರೋಲ್‌ನ ರಿಟೇಲ್ ಮಾರಾಟದಲ್ಲಿ ಲೀಟರ್‌ಗೆ 2.90 ರೂಪಾಯಿ ಮತ್ತು ಡೀಸೆಲ್‌ನಲ್ಲಿ 1.85 ರೂಪಾಯಿ ಕಮಿಷನ್ ಪಡೆಯುತ್ತಾರೆ. 2017 ರಲ್ಲಿ, ಕಂಪನಿಗಳು ಪ್ರತಿ ಲೀಟರ್‌ಗೆ 1 ರೂಪಾಯಿ ಕಮಿಷನ್ ಹೆಚ್ಚಿಸಿವೆ, ಅದರಲ್ಲಿ 40 ಪೈಸೆಯನ್ನು ಪರವಾನಗಿ ಶುಲ್ಕದ ಹೆಸರಿನಲ್ಲಿ ಕಡಿತಗೊಳಿಸಲಾಗಿದೆ.

ಈ ಐದು ವರ್ಷಗಳಲ್ಲಿ ವಿದ್ಯುತ್ ಬಿಲ್, ಉದ್ಯೋಗಿಗಳ ಸಂಬಳ, ಬ್ಯಾಂಕ್ ಶುಲ್ಕ ಸೇರಿದಂತೆ ಎಲ್ಲ ವೆಚ್ಚದ ಹೊರೆಯನ್ನು ನಾವು ಹೊರಿಸಿದ್ದೇವೆ. ಹಾಗಾಗಿ ಕಂಪನಿಗಳು ನಮ್ಮ ಬೇಡಿಕೆಗಳನ್ನು ಪರಿಗಣಿಸಲು ನಾವು ಈಗ ಪ್ರತಿಭಟನೆಯ ಹಾದಿಯನ್ನು ಅನುಸರಿಸಿದ್ದೇವೆ ಎಂದು ದೆಹಲಿ ಪೆಟ್ರೋಲ್ ಡೀಲರ್ಸ್ ಅಸೋಸಿಯೇಷನ್ ಅಧ್ಯಕ್ಷ ಅನುರಾಗ್ ಜೈನ್ ಹೇಳಿದ್ದಾರೆ.