ಕೊರೊನಾ ಎಫೆಕ್ಟ್: ಸ್ಪೈಸ್ ಜೆಟ್ ಉದ್ಯೋಗಿಗಳ 30 ಪರ್ಸೆಂಟ್ ಸ್ಯಾಲರಿ ಕಟ್

ಕೊರೊನಾವೈರಸ್‌ನಿಂದ ದೇಶಪೂರ್ಣ ಲಾಕ್‌ಡೌನ್‌ ಹಿನ್ನೆಲೆ ಬಹುತೇಕ ಎಲ್ಲಾ ಉದ್ಯಮಗಳು ನೆಲಕಚ್ಚಿವೆ. ಅದರಲ್ಲೂ ವಿಮಾನಯಾನ ಸಂಸ್ಥೆಗಳು ಕೂಡ ಭಾರೀ ನಷ್ಟ ಅನುಭವಿಸಿವೆ. ಒಂದರ ಬೆನ್ನ ಹಿಂದೆ ಮತ್ತೊಂದು ವಿಮಾನಯಾನ ಸಂಸ್ಥೆಗಳು ಉದ್ಯೋಗಿಗಳ ವೇತನವನ್ನು ಕಡಿತಗೊಳಿಸುತ್ತಿವೆ. ಇನ್ನೂ ಕೆಲವು ಸಂಸ್ಥೆಗಳಂತೂ ಮಾರ್ಚ್‌ ತಿಂಗಳ ವೇತನವನ್ನು ಕೊಡುವುದೇ ಇಲ್ಲ ಎಂದು ಕೂಡ ಹೇಳಿವೆ.

ಇದೇ ಸಾಲಿಗೆ ಈಗ ಸ್ಪೈಸ್ ಜೆಟ್ ಕೂಡ ಸೇರಿದೆ. ತನ್ನ ಉದ್ಯೋಗಿಗಳ ಮಾರ್ಚ್ ತಿಂಗಳ ವೇತನವನ್ನು 10 ರಿಂದ 30 ಪರ್ಸೆಂಟ್‌ವರೆಗೂ ಕಡಿತಗೊಳಿಸಿದೆ ಎಂದು ಮಂಗಳವಾರ ಪ್ರಕಟಿಸಿದೆ. ಇದರಲ್ಲಿ ಸಿಎಂಡಿ ಅಜಯ್ ಸಿಂಗ್ ವೇತನ ಹೆಚ್ಚು ಕಡಿತಗೊಂಡಿದ್ದು, ಯಾವುದೇ ಉದ್ಯೋಗಿಯನ್ನೂ ಕೆಲಸದಿಂದ ತೆಗೆದು ಹಾಕುವುದಿಲ್ಲ ಎಂದು ವಿಮಾನಯಾನ ಸಂಸ್ಥೆ ಭರವಸೆ ನೀಡಿದೆ.

"ವಿಮಾನಯಾನವು ತನ್ನ ಎಲ್ಲ ಉದ್ಯೋಗಿಗಳಿಗೆ ಉನ್ನತ ಮತ್ತು ಮಧ್ಯಮ ಹಂತಗಳಲ್ಲಿ 10 ರಿಂದ 30 ಪರ್ಸೆಂಟ್ ವೇತನ ಕಡಿತವನ್ನು ಜಾರಿಗೆ ತಂದಿದೆ. ಆದರು ಸ್ಪೈಸ್ ಜೆಟ್‌ನ ಕಡಿಮೆ ವೇತನ ಶ್ರೇಣಿಗಳಲ್ಲಿನ ಉದ್ಯೋಗಿಗಳಿಗೆ ಈ ನಿರ್ಧಾರದಿಂದ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಭರವಸೆ ನೀಡಿದೆ. ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ, ಏರ್‌ಲೈನ್ಸ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಅಜಯ್ ಸಿಂಗ್ ಅವರು ಅತಿ ಹೆಚ್ಚು 30 ಪರ್ಸೆಂಟ್‌ರಷ್ಟು ಸಂಬಳವನ್ನು ಕಡಿತಗೊಳಿಸಲು ನಿರ್ಧರಿಸಿದ್ದಾರೆ "ಎಂದು ಸ್ಪೈಸ್‌ಜೆಟ್ ಹೇಳಿಕೆಯಲ್ಲಿ ತಿಳಿಸಿದೆ.

ಎಲ್ಲಾ ಪ್ರಯಾಣಿಕರ ವಿಮಾನಗಳನ್ನು ಸ್ಥಗಿತಗೊಳಿಸಿದ ಮಾರ್ಚ್ 25 ರಿಂದ 31ರ ಲಾಕ್‌ಡೌನ್ ಅವಧಿಯಲ್ಲಿ ಸ್ಪೈಸ್‌ಜೆಟ್ ನೌಕರರಿಗೆ 'ವೇತನವಿಲ್ಲದೆ ರಜೆ' ಘೋಷಿಸಲು ಒತ್ತಾಯಿಸಲ್ಪಟ್ಟಿದೆ. ಆದರೂ ಈ ಸಮಯದಲ್ಲಿ ಕೆಲಸ ಮಾಡುತ್ತಿರುವ ನೌಕರರಿಗೆ ಈ ನಿಯಮ ಅನ್ವಯವಾಗುವುದಿಲ್ಲ ಮತ್ತು ಈ ಅವಧಿಗೆ ಅವರ ಸಂಬಳವನ್ನು ಮರುಪಾವತಿಸಲಾಗುತ್ತದೆ ಎಂದು ಸಂಸ್ಥೆಯು ಹೇಳಿದೆ .

ಇಂಡಿಗೋ ವಿಮಾನಯಾನ ಸಂಸ್ಥೆಯ ಬಳಿಕ ಗೋ ಏರ್ ಕೂಡ ವೇತನವನ್ನು ಕಡಿತಗೊಳಿಸಿತ್ತು. ಇದರ ಜೊತೆಗೆ ಸ್ಪೈಸ್ ಜೆಟ್ ಕೂಡ ಈ ನಿರ್ಧಾರಕ್ಕೆ ಬಂದಿರುವುದು ನೌಕರರಿಗೆ ಆಘಾತ ನೀಡಿದೆ.