Google Layoffs : 2ನೇ ಹಂತದ ಉದ್ಯೋಗ ಕಡಿತ ಘೋಷಿಸಿದ ಗೂಗಲ್, ಇಲ್ಲಿದೆ ಮಾಹಿತಿ

ಗೂಗಲ್ ಪೋಷಕ ಸಂಸ್ಥೆಯಾದ ಆಲ್ಫಾಬೇಟ್‌ ಸೆಲ್ಫ್ ಡ್ರೈವಿಂಗ್ ಟೆಕ್ನಾಲಜಿ ಯುನಿಟ್ ಆದ ವಾಯ್ಮೋದಲ್ಲಿ ಎರಡನೇ ಹಂತದ ಉದ್ಯೋಗ ಕಡಿತವನ್ನು ಘೋಷಣೆ ಮಾಡಿದೆ. ಈ ವರ್ಷದಲ್ಲಿ ಎರಡನೇ ಹಂತದ ಉದ್ಯೋಗ ಕಡಿತ ಘೋಷಿಸಿದ್ದು, 137 ಜನರನ್ನು ಕೆಲಸದಿಂದ ವಜಾಗೊಳಿಸಿದೆ. ಒಟ್ಟಾಗಿ ಶೇಕಡ 8ರಷ್ಟು ಮಂದಿಯನ್ನು ವಜಾಗೊಳಿಸಲಾಗಿದೆ ಎಂದು ವರದಿಯಾಗಿದೆ. ಜನವರಿಯಲ್ಲಿ 12000 ಉದ್ಯೋಗಿಗಳನ್ನು ವಜಾಗೊಳಿಸಲಾಗಿದೆ.

ಇತ್ತೀಚೆಗೆ ವಜಾಗೊಳಿಸಿದ 137 ಜನರನ್ನು ಸೇರಿದಂತೆ ಒಟ್ಟಾಗಿ ಸಂಸ್ಥೆಯು 209 ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಿದೆ. ಇಂಜಿನಿಯರ್‌ಗಳನ್ನು ಕೂಡಾ ಸಂಸ್ಥೆಯಿಂದ ವಜಾಗೊಳಿಸಲಾಗಿದೆ. ಮುಖ್ಯವಾಗಿ ಈ ಹಿಂದೆ ಹಲವಾರು ಸಂಸ್ಥೆಗಳು ನೀಡಿರುವ ಕಾರಣದಂತೆಯೇ ವೆಚ್ಚ ಕಡಿತ ಮಾಡುವ ನಿಟ್ಟಿನಲ್ಲಿ ಈ ಉದ್ಯೋಗ ಕಡಿತ ಮಾಡಲಾಗುತ್ತದೆ. ಆಟೋ ಮತ್ತು ಟೆಕ್ ಇಂಡಸ್ಟ್ರೀಯಲ್ಲಿ ಉದ್ಯೋಗ ಕಡಿತ ನಡೆಯುತ್ತಿರುವಂತೆಯೇ ವಾಯ್ಮೊದಲ್ಲಿ ಉದ್ಯೋಗ ಕಡಿತ ನಡೆದಿದೆ.

ಜಾಗತಿಕವಾಗಿ ಉದ್ಯೋಗ ಕಡಿತದ ಪರ್ವ ಮುಂದುವರಿದಿರುವಂತೆ, ಗೂಗಲ್‌ನ ಮಾತೃ ಕಂಪನಿಯಾದ ಆಲ್ಬಾಬೆಟ್ ಇದೀಗ ತನ್ನ ಪ್ರಧಾನ ಕಚೇರಿಯಲ್ಲಿದ್ದ ಕೆಫೆಟೇರಿಯಾಗಳನ್ನು ಸ್ವಚ್ಚಗೊಳಿಸುವ ರೋಬೋಟ್‌ಗಳನ್ನು ಕೂಡಾ ಕೆಲಸದಿಂದ ತೆಗೆದು ಹಾಕಿದೆ. ಕಳೆದ ತಿಂಗಳಷ್ಟೇ ಟೆಕ್‌ ದೈತ್ಯ ಕಂಪೆನಿ 12000 ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡಿದ್ದ ಬೆನ್ನಲ್ಲೇ ಈ ಕ್ರಮ ಕೈಗೊಳ್ಳಲಾಗಿದೆ. ಆಲ್ಬಾಬೆಟ್‌ನ "ಎವರಿಡೇ ರೋಬೋಟ್ಸ್" ಪ್ರಾಜೆಕ್ಟ್‌ನಡಿ ಗೂಗಲ್‌ನ ಎಕ್ಸಿಪಿರಿಮೆಂಟ್ ಎಕ್ಸ್ ಲ್ಯಾಬೋರೇಟರಿಯನ್ನು ಸಿಇಒ ಸುಂದರ್‌ ಪಿಚ್ಚೈ ಮುಚ್ಚಿದ್ದಾರೆ.

ಗೂಗಲ್ ಇಂಡಿಯಾ 453 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಗೂಗಲ್ ಇಂಡಿಯಾ ಘೋಷಿಸಿದ 453 ಉದ್ಯೋಗ ಕಡಿತವು ಈ ಹಿಂದೆ ಘೋಷಿಸಿದ 12,000 ಉದ್ಯೋಗ ಕಡಿತದಲ್ಲೇ ಸೇರ್ಪಡೆಯಾಗುತ್ತದೆಯೇ, ಬೇರೆಯೇ ಎಂಬ ಬಗ್ಗೆ ಮಾಹಿತಿ ಲಭ್ಯವಾಗಿಲ್ಲ.

ಈ ಹಿಂದೆ ನಡೆದ ಉದ್ಯೋಗ ಕಡಿತಗಳು

ಗೂಗಲ್ ಮಾತ್ರವಲ್ಲ ಹಲವಾರು ಸಂಸ್ಥೆಗಳು ಉದ್ಯೋಗ ಕಡಿತವನ್ನು ಮಾಡಿದೆ. ಅಮೆಜಾನ್ ಸುಮಾರು 18,000 ಮಂದಿಯನ್ನು ಉದ್ಯೋಗದಿಂದ ತೆಗೆದುಹಾಕಿದೆ. ಅದಕ್ಕೂ ಮುನ್ನ 10 ಸಾವಿರ ಮಂದಿಯನ್ನು ವಜಾಗೊಳಿಸುವ ಘೋಷಣೆ ಮಾಡಿತ್ತು. ಮೆಟಾ ಸಂಸ್ಥೆಯು 13,000 ಮಂದಿಯನ್ನು ವಜಾಗೊಳಿಸಿದೆ. ಮೈಕ್ರೋಸಾಫ್ಟ್‌ನಲ್ಲಿ ಶೇಕಡ 5ರಷ್ಟು ಅಥವಾ 10,000 ಉದ್ಯೋಗ ಕಡಿತ ನಡೆದಿದೆ.

ಸೇಲ್ಸ್‌ಫೋರ್ಸ್‌ನಲ್ಲಿ ಶೇಕಡ 10ರಷ್ಟು ಅಥವಾ 8,000, ಡೆಲ್‌ನಲ್ಲಿ ಶೇಕಡ 5ರಷ್ಟು ಅಥವಾ 6,650, ಐಬಿಎಂಯಲ್ಲಿ ಶೇಕಡ 2ರಷ್ಟು ಅಥವಾ 3,900, ಎಸ್‌ಎಪಿನಲ್ಲಿ ಶೇಕಡ 3ರಷ್ಟು ಅಥವಾ 3,000, ಜೂಮ್‌ನಲ್ಲಿ ಶೇಕಡ 15ರಷ್ಟು ಅಥವಾ 1,300, ಕಾಯಿನ್‌ಬೇಸ್‌ನಲ್ಲಿ ಶೇಕಡ 20ರಷ್ಟು ಅಥವಾ 950, ಯಾಹೂವಿನಲ್ಲಿ ಶೇಕಡ 20ರಷ್ಟು ಅಥವಾ 1,600, ಗಿಟ್‌ಹಬ್‌ನಲ್ಲಿ ಶೇಕಡ 10ರಷ್ಟು ಅಥವಾ 300 ಉದ್ಯೋಗ ಕಡಿತ ಮಾಡಲಾಗಿದೆ.