Bank Holiday: ಇಂದು ವಾಲ್ಮೀಕಿ ಜಯಂತಿ..ಕರ್ನಾಟಕದಲ್ಲಿ ಬ್ಯಾಂಕ್‌ಗಳು ತೆರೆದಿರುತ್ತವಾ? ಹೋಗೋ ಮುನ್ನ ತಿಳಿಯಿರಿ

ಇಂದು ಅಂದರೆ ಮಂಗಳವಾರ, ಅಕ್ಟೋಬರ್ 7ರಂದು ದೇಶದ ಅನೇಕ ರಾಜ್ಯಗಳಲ್ಲಿ ಬ್ಯಾಂಕ್‌ಗಳಿಗೆ ರಜೆ ಘೋಷಿಸಲಾಗಿದೆ. ವಾಲ್ಮೀಕಿ ಜಯಂತಿ ಮತ್ತು ಕುಮಾರ ಪೂರ್ಣಿಮೆಯಂತಹ ಧಾರ್ಮಿಕ ಹಬ್ಬಗಳ ಹಿನ್ನೆಲೆಯಲ್ಲಿ ಈ ರಜೆ ಅನ್ವಯವಾಗಲಿದೆ. ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಪ್ರಕಟಿಸಿರುವ ಅಧಿಕೃತ ರಜಾ ಕ್ಯಾಲೆಂಡರ್ ಪ್ರಕಾರ, ಈ ವಾರದಲ್ಲಿ ಒಟ್ಟೂ ನಾಲ್ಕು ದಿನಗಳವರೆಗೆ ಬ್ಯಾಂಕ್‌ಗಳು ಮುಚ್ಚಿರುತ್ತವೆ.

ಬೆಂಗಳೂರು, ಚಂಡೀಗಢ, ಭುವನೇಶ್ವರ ಮತ್ತು ಶಿಮ್ಲಾ ಸೇರಿದಂತೆ ಕೆಲವು ಪ್ರಮುಖ ನಗರಗಳಲ್ಲಿ ಇಂದು ಬ್ಯಾಂಕ್‌ಗಳು ಕಾರ್ಯನಿರ್ವಹಿಸುವುದಿಲ್ಲ. ಈ ಪ್ರದೇಶಗಳಲ್ಲಿ ಎರಡು ಹಬ್ಬಗಳು ಒಂದೇ ದಿನ ಬಂದಿರುವುದರಿಂದ, ಬ್ಯಾಂಕ್ ಸಿಬ್ಬಂದಿಗೆ ಹಾಗೂ ಗ್ರಾಹಕರಿಗೆ ರಜೆ ನೀಡಲಾಗಿದೆ. ಬ್ಯಾಂಕ್ ಸಂಬಂಧಿತ ಕಾರ್ಯಗಳನ್ನು ಇಂದೇ ಮಾಡಬೇಕೆಂದು ಯೋಜಿಸಿರುವವರು ಈ ವಿಷಯವನ್ನು ಗಮನದಲ್ಲಿಡುವುದು ಅಗತ್ಯ.

ಅಕ್ಟೋಬರ್ 7ರಂದು ಮಹರ್ಷಿ ವಾಲ್ಮೀಕಿ ಜಯಂತಿ ಮತ್ತು ಕುಮಾರ ಪೂರ್ಣಿಮಾ ಹಬ್ಬಗಳು ಒಂದೇ ದಿನ ಬಂದು, ಅದ್ದೂರಿಯಾಗಿ ಆಚರಿಸಲಾಗುತ್ತಿದೆ. ರಾಮಾಯಣದ ಕಾವ್ಯಕಾರರಾದ ಮಹರ್ಷಿ ವಾಲ್ಮೀಕಿ ಅವರ ಜನ್ಮದಿನವನ್ನು ವಾಲ್ಮೀಕಿ ಜಯಂತಿಯಾಗಿ ಆಚರಿಸಲಾಗುತ್ತದೆ. ಅಶ್ವಯುಜ ಮಾಸದ ಹುಣ್ಣಿಮೆ ದಿನದಂದು ಬರುವ ಕುಮಾರ ಪೂರ್ಣಿಮೆಯು ಚಂದ್ರ ಪೂಜೆಯ ಹಬ್ಬವಾಗಿದ್ದು, ಈ ದಿನ ಮಹಿಳೆಯರು ಚಂದ್ರನ ಆರಾಧನೆ ಮಾಡಿ ಶ್ರದ್ಧೆಯಿಂದ ಉಪವಾಸ ವ್ರತ ಆಚರಿಸುತ್ತಾರೆ.

ಆರ್‌ಬಿಐ ಪ್ರಕಟಿಸಿರುವ ರಜಾ ಪಟ್ಟಿಯ ಪ್ರಕಾರ, ಅಕ್ಟೋಬರ್ 7ನ್ನು ನೆಗೋಷಿಯೇಬಲ್ ಇನ್‌ಸ್ಟ್ರುಮೆಂಟ್ಸ್ ಕಾಯ್ದೆ, 1881 ಅಡಿಯಲ್ಲಿ ಬ್ಯಾಂಕ್ ರಜೆಯಾಗಿ ಗುರುತಿಸಲಾಗಿದೆ. ಈ ಕಾಯ್ದೆಯಡಿಯಲ್ಲಿ ಭಾರತದಲ್ಲಿನ ಬ್ಯಾಂಕ್‌ಗಳು ಸಾರ್ವಜನಿಕ, ಧಾರ್ಮಿಕ ಹಾಗೂ ಪ್ರಾದೇಶಿಕ ಹಬ್ಬಗಳ ಆಧಾರದ ಮೇಲೆ ರಜೆಗಳನ್ನು ನಿರ್ಧರಿಸುತ್ತವೆ. ಜೊತೆಗೆ ಪ್ರತಿ ತಿಂಗಳ ಎರಡನೇ ಮತ್ತು ನಾಲ್ಕನೇ ಶನಿವಾರಗಳೂ ನಿಯಮಿತ ರಜೆಯಾಗಿದೆ.

ದೇಶದಾದ್ಯಂತ ಒಂದೇ ರೀತಿಯ ರಜೆ ಅನ್ವಯವಾಗುವುದಿಲ್ಲ. ರಾಜ್ಯ ಅಥವಾ ಪ್ರದೇಶದ ಹಬ್ಬದ ಪ್ರಕಾರ ಬ್ಯಾಂಕ್ ರಜೆಗಳು ಬದಲಾಗುತ್ತವೆ. ಉದಾಹರಣೆಗೆ, ಕೆಲವು ಹಬ್ಬಗಳು ರಾಷ್ಟ್ರವ್ಯಾಪಿಯಾಗಿ ಆಚರಿಸಲ್ಪಟ್ಟರೆ, ಕೆಲವು ಸ್ಥಳೀಯ ಹಬ್ಬಗಳು ಕೇವಲ ನಿರ್ದಿಷ್ಟ ರಾಜ್ಯಗಳಲ್ಲಿ ಮಾತ್ರ ಪ್ರಭಾವ ಬೀರುತ್ತವೆ. ಆದ್ದರಿಂದ ಗ್ರಾಹಕರು ತಮ್ಮ ಬ್ಯಾಂಕ್ ಕೆಲಸಗಳನ್ನು ಮುಂಚಿತವಾಗಿ ಯೋಜಿಸುವುದು ಅತ್ಯಂತ ಮುಖ್ಯ.

ಅಕ್ಟೋಬರ್ ಮೊದಲ ವಾರದಲ್ಲೇ ಗಾಂಧಿ ಜಯಂತಿ, ದುರ್ಗಾ ಪೂಜೆ ಮತ್ತು ದಸರಾ ಹಬ್ಬಗಳ ಹಿನ್ನೆಲೆಯಲ್ಲಿ ಬ್ಯಾಂಕ್‌ಗಳು ಹಲವು ದಿನ ಮುಚ್ಚಿದ್ದವು. ಈ ತಿಂಗಳಲ್ಲಿ ಒಟ್ಟೂ 21 ರಜೆಗಳು ಇರಲಿವೆ ಎಂದು RBI ಬಿಡುಗಡೆ ಮಾಡಿದ ಪಟ್ಟಿಯಲ್ಲಿ ಉಲ್ಲೇಖಿಸಲಾಗಿದೆ.

ಅದರ ಜೊತೆಗೆ, ಅಕ್ಟೋಬರ್ 10ರಂದು ಶಿಮ್ಲಾದಲ್ಲಿ ಕರ್ವಾ ಚೌತ್ ಹಬ್ಬದ ನಿಮಿತ್ತ ಬ್ಯಾಂಕ್‌ಗಳಿಗೆ ರಜೆ ಇರುತ್ತದೆ. ಈ ಹಬ್ಬವನ್ನು ವಿವಾಹಿತ ಮಹಿಳೆಯರು ತಮ್ಮ ಪತಿಯ ಆಯುಷ್ಯ ಮತ್ತು ಆರೋಗ್ಯಕ್ಕಾಗಿ ಆಚರಿಸುತ್ತಾರೆ. ಆದರೆ ಇತರ ನಗರಗಳಲ್ಲಿ ಈ ದಿನ ಬ್ಯಾಂಕ್‌ಗಳು ಎಂದಿನಂತೆ ತೆರೆಯಲ್ಪಡುವುದಿದೆ.

ಅಕ್ಟೋಬರ್ 11ರಂದು ಎರಡನೇ ಶನಿವಾರ ಬಂದಿರುವುದರಿಂದ ದೇಶಾದ್ಯಂತ ಎಲ್ಲ ಬ್ಯಾಂಕ್‌ಗಳೂ ಮುಚ್ಚಿರುತ್ತವೆ. ಪ್ರತಿ ತಿಂಗಳ ಎರಡನೇ ಮತ್ತು ನಾಲ್ಕನೇ ಶನಿವಾರಗಳು RBI ನಿಯಮದ ಪ್ರಕಾರ ನಿಯಮಿತ ರಜೆಯಾಗಿದೆ. ಈ ನಿಯಮದಿಂದ ಬ್ಯಾಂಕ್ ಉದ್ಯೋಗಿಗಳಿಗೆ ವಿಶ್ರಾಂತಿ ದೊರೆಯುತ್ತದೆ ಮತ್ತು ಉಳಿದ ದಿನಗಳಲ್ಲಿ ಸುಗಮ ಸೇವೆ ನೀಡಲು ಸಹಕಾರಿಯಾಗುತ್ತದೆ.

ಹಬ್ಬದ ಸಮಯದಲ್ಲಿ ಬ್ಯಾಂಕ್ ರಜೆಗಳು ಹೆಚ್ಚಾಗುವ ಕಾರಣದಿಂದ, ಗ್ರಾಹಕರು ತಮ್ಮ ಹಣಕಾಸಿನ ವ್ಯವಹಾರಗಳನ್ನು ಮುಂಚಿತವಾಗಿ ಮಾಡಲು ಸಲಹೆ ನೀಡಲಾಗಿದೆ. ಆನ್‌ಲೈನ್ ಬ್ಯಾಂಕಿಂಗ್, ಮೊಬೈಲ್ ಬ್ಯಾಂಕಿಂಗ್ ಮತ್ತು ಯುಪಿಐ ಸೇವೆಗಳನ್ನು ಬಳಸಿ, ರಜಾದಿನಗಳಲ್ಲಿಯೂ ವ್ಯವಹಾರಗಳನ್ನು ಸುಲಭವಾಗಿ ನಿರ್ವಹಿಸಬಹುದು. ಈ ಮೂಲಕ ಬ್ಯಾಂಕ್ ಮುಚ್ಚಿದ್ದರೂ ಹಣಕಾಸಿನ ಚಟುವಟಿಕೆಗಳಲ್ಲಿ ಅಡಚಣೆ ಉಂಟಾಗುವುದಿಲ್ಲ.