ಇಂಧನ ಬೆಲೆ ಇಳಿಸಿ, 'ಜಿಎಸ್‌ಟಿ'ಯಡಿ ತನ್ನಿ: ಕೇಂದ್ರಕ್ಕೆ ಬೆಂಗಳೂರು ಹೊಟೇಲ್ ಮಾಲೀಕರ ಸಂಘ ಆಗ್ರಹ

ಬೆಂಗಳೂರು, ಸೆಪ್ಟೆಂಬರ್ 22: ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರದಲ್ಲಿ ಗಣನೀಯ ಇಳಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಇಂಧನ ಬೆಲೆಯನ್ನು ಕಡಿಮೆ ಮಾಡುವಂತೆ ಬೃಹತ್ ಬೆಂಗಳೂರು ಹೊಟೇಲ್ ಮಾಲೀಕರ ಸಂಘ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿದೆ. ಕೇಂದ್ರ ಸರ್ಕಾರಕ್ಕೆ ಬರೆದ ಪತ್ರದಲ್ಲಿ, ಕಚ್ಚಾ ತೈಲದ ಪ್ರಸ್ತುತ ಬೆಲೆ ಪ್ರತಿ ಬ್ಯಾರೆಲ್‌ಗೆ $ 74.72 ರಷ್ಟಿದೆ, ಅಂದರೆ ಪ್ರತಿ ಲೀಟರ್‌ಗೆ ಸರಿಸುಮಾರು 39 ರೂ. ಈ ಕಡಿತದ ಹೊರತಾಗಿಯೂ, ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಯಾವುದೇ ಇಳಿಕೆಯ ಬದಲಾವಣೆ ಕಂಡುಬಂದಿಲ್ಲ ಎಂದು ಹೇಳಿದ್ದಾರೆ.

ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳೆರಡೂ ವಿಧಿಸುವ ತೆರಿಗೆಗಳ ಕಾರಣದಿಂದ ನಾಗರಿಕರು 50% ಕ್ಕಿಂತ ಹೆಚ್ಚು ಹೊರೆಯನ್ನು ಹೊರಬೇಕಾಗುತ್ತದೆ ಎಂದು ಹೊಟೇಲ್ ಮಾಲೀಕರ ಸಂಘವು ಬೊಟ್ಟು ಮಾಡಿ ತೋರಿಸಿದೆ. ಪ್ರಸ್ತುತ ಬೆಂಗಳೂರಿನಲ್ಲಿ ಪ್ರತಿ ಲೀಟರ್ ಪೆಟ್ರೋಲ್ ಬೆಲೆ 102.86 ರೂ. ಮತ್ತು ಡೀಸೆಲ್ ಬೆಲೆ ಲೀಟರ್‌ಗೆ 88.94 ರೂ.ಗಳಾಗಿದ್ದು, ಇದರಿಂದ ವ್ಯಾಪಾರಸ್ಥರು ಮತ್ತು ಸಾಮಾನ್ಯ ಜನರ ಮೇಲೆ ಭಾರೀ ಆರ್ಥಿಕ ಒತ್ತಡವಿದೆ. "ಇಂಧನದ ಹೆಚ್ಚಿನ ವೆಚ್ಚವು ಸಾರಿಗೆ ವೆಚ್ಚಗಳ ಮೇಲೆ ನೇರ ಪರಿಣಾಮ ಬೀರುತ್ತದೆ, ಇದು ಹಾಲು, ತರಕಾರಿಗಳು ಮತ್ತುಇತರ ಅಗತ್ಯ ವಸ್ತುಗಳ ಬೆಲೆಗಳನ್ನು ಹೆಚ್ಚಿಸುತ್ತದೆ" ಎಂದು ಪತ್ರದಲ್ಲಿ ತಿಳಿಸಲಾಗಿದೆ.

"ಮತ್ತೊಂದೆಡೆ ಏರುತ್ತಿರುವ ಇಂಧನ ವೆಚ್ಚಗಳೊಂದಿಗೆ ಸೇರಿಕೊಂಡು, ಈಗಾಗಲೇ ಹೆಣಗಾಡುತ್ತಿರುವ ಪ್ರವಾಸೋದ್ಯಮ ಉದ್ಯಮವನ್ನು ಇನ್ನಷ್ಟು ಹಾನಿಗೊಳಿಸಬಹುದು." ಹೀಗಾಗಿ ಇಂಧನ ಬೆಲೆಗಳನ್ನು ಕಡಿಮೆ ಮಾಡಲು ಮತ್ತು ಪೆಟ್ರೋಲ್ ಮತ್ತು ಡೀಸೆಲ್ ಅನ್ನು ಸರಕು ಮತ್ತು ಸೇವಾ ತೆರಿಗೆ Goods and Services Tax (GST) ಪದ್ದತಿಯ ಅಡಿಯಲ್ಲಿ ತರಬೇಕು ಎಂದು ಸಂಘವು ಸರ್ಕಾರವನ್ನು ವಿನಂತಿಸಿದೆ. ಇದರಿಂದ ವ್ಯಾಪಾರ ಮತ್ತು ಗ್ರಾಹಕರಿಗೆ ಸಮಾನವಾಗಿಅನುಕೂಲತೆಯನ್ನು ನೀಡುತ್ತದೆ ಎಂದು ಹೇಳಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಹೋಟೆಲ್ ಉದ್ಯಮಿಯೊಬ್ಬರು, "ಇಂಧನ ಬೆಲೆಯನ್ನು ಕಡಿಮೆ ಮಾಡುವುದು ಕೇವಲ ಆರ್ಥಿಕ ಪರಿಹಾರದ ವಿಷಯವಲ್ಲ; ಇದು ವ್ಯವಹಾರಗಳು ಮತ್ತು ಸಾರ್ವಜನಿಕರ ಯೋಗಕ್ಷೇಮಕ್ಕೆ ಅವಶ್ಯಕವಾಗಿದೆ. ಇಂಧನ ಬೆಲೆಗಳು ಗಗನಕ್ಕೇರಿದಾಗ, ಅವು ಇಡೀ ಆರ್ಥಿಕತೆಯಾದ್ಯಂತ ಏರಿಳಿತದ ಪರಿಣಾಮವನ್ನು ಉಂಟುಮಾಡುತ್ತವೆ, ಸಾರಿಗೆ ವೆಚ್ಚವನ್ನು ಹೆಚ್ಚಿಸುತ್ತವೆ, ಅಗತ್ಯ ವಸ್ತುಗಳ ಬೆಲೆಗಳನ್ನು ಹೆಚ್ಚಿಸುತ್ತವೆ ಮತ್ತು ಕೈಗೆಟುಕುವ ಪ್ರಯಾಣವನ್ನು ಅವಲಂಬಿಸಿರುವ ಪ್ರವಾಸೋದ್ಯಮ ಮತ್ತು ಹೊಟೇಲ್ ಆತಿಥ್ಯದಂತಹ ಉದ್ಯಮಗಳ ಮೇಲೆ ಭಾರೀ ಹೊರೆಯನ್ನು ಉಂಟುಮಾಡುತ್ತದೆ" ಎನ್ನುತ್ತಾರೆ.

ಸಾಮಾನ್ಯ ವ್ಯಕ್ತಿಗೆ, ಇಂಧನ ವೆಚ್ಚಗಳು ಹೆಚ್ಚಾದಂತೆ ಆಹಾರ ಮತ್ತು ಅಗತ್ಯ ವಸ್ತುಗಳಂತಹ ದೈನಂದಿನ ವಸ್ತುಗಳ ಹೆಚ್ಚಿನ ವೆಚ್ಚಗಳಾಗಿ ರೂಪಾಂತರವಾಗುತ್ತದೆ. ಮನೆಯ ಬಜೆಟ್ ಅನ್ನು ಮೇಲೆ ಇನ್ನಷ್ಟು ಕತ್ತರಿ ಹಾಕಬೇಕಾಗುತ್ತದೆ. ಇದಲ್ಲದೆ, ವ್ಯಾಪಾರ, ವಿಶೇಷವಾಗಿ ಸಣ್ಣ ಮತ್ತು ಮಧ್ಯಮ ವ್ಯಾಪಾರಗಳಲ್ಲಿ, ಹೆಚ್ಚಿದ ಕಾರ್ಯಾಚರಣೆಯ ವೆಚ್ಚಗಳನ್ನು ಎದುರಿಸಬೇಕಾಗುತ್ತದೆ. ಇಂತಹ ಸವಾಲಿನ ಆರ್ಥಿಕ ವಾತಾವರಣದಲ್ಲಿ ಲಾಭದಾಯಕತೆಯನ್ನು ಉಳಿಸಿಕೊಳ್ಳಲು ಕಷ್ಟವಾಗುತ್ತದೆ. ಈ ಅಂತರ್ಸಂಪರ್ಕಿತ ವ್ಯವಸ್ಥೆಯಲ್ಲಿ, ಹೆಚ್ಚಿನ ಇಂಧನ ಬೆಲೆಗಳು ಅಂತಿಮವಾಗಿ ಬೆಳವಣಿಗೆಯನ್ನು ನಿಧಾನಗೊಳಿಸುತ್ತದೆ, ಉದ್ಯೋಗ ಸೃಷ್ಟಿಯ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ಜೀವನ ವೆಚ್ಚ ಮತ್ತು ವೇತನಗಳ ನಡುವಿನ ಅಂತರವನ್ನು ವಿಸ್ತರಿಸುತ್ತದೆ.

ಮತ್ತೊಬ್ಬ ಹೊಟೇಲ್ ಉದ್ಯಮಿ , "ದೀರ್ಘಕಾಲದ ಸ್ಥಿರತೆಯನ್ನು ಖಚಿತಪಡಿಸಿಕೊಳ್ಳಲು, ಜಾಗತಿಕ ಕಚ್ಚಾ ತೈಲ ಮಾರುಕಟ್ಟೆಯನ್ನು ಪ್ರತಿಬಿಂಬಿಸುವ ರೀತಿಯಲ್ಲಿ ಇಂಧನದ ಬೆಲೆಯನ್ನು ನಿಗದಿಪಡಿಸಬೇಕು ಮತ್ತು ನಾಗರಿಕರಿಗೆ ಅಸಮಾನವಾಗಿ ತೆರಿಗೆ ವಿಧಿಸಬಾರದು. ಜಿಎಸ್‌ಟಿ ಅಡಿಯಲ್ಲಿ ಇಂಧನವನ್ನು ತರುವುದರಿಂದ ಉತ್ತಮವಾದ, ಹೆಚ್ಚು ಪಾರದರ್ಶಕ ವ್ಯವಸ್ಥೆಗೆ ಕಾರಣವಾಗಬಹುದು. ಬೆಲೆಗಳನ್ನು ಕಡಿಮೆ ಮಾಡುವುದರಿಂದ ವ್ಯಾಪಾರಗಳು ಮತ್ತು ಗ್ರಾಹಕರು ಇಂಧನ ವೆಚ್ಚಗಳ ಭಾರೀ ಹೊರೆಯಿಲ್ಲದೆ ಅಭಿವೃದ್ಧಿ ಹೊಂದಬಹುದು. ಈ ಎಲ್ಲಾ ಬದಲಾವಣೆ ಮಾಡಿದ್ರೆ ಅಗತ್ಯವಿರುವ ಆರ್ಥಿಕತೆಯೂ, ಸಮತೋಲನ ಮತ್ತು ನ್ಯಾಯಸಮ್ಮತದ ಕಡೆ ಸಾಗುತ್ತದೆ" ಎಂದು ಪತ್ರ ಬರೆದಿದ್ದಾರೆ.