Bengaluru rain: ಮಳೆರಾಯನ ಸೆಕೆಂಡ್ ಇನ್ನಿಂಗ್ಸ್‌ಗೆ ತತ್ತರ...HSR ಲೇಔಟ್, ಬೊಮ್ಮನಹಳ್ಳಿ ಸೇರಿ ಹಲವೆಡೆ ಜಲಾವೃತ!

ರಾಜಧಾನಿ ಬೆಂಗಳೂರಿನಲ್ಲಿ ಮಳೆಯಾರ್ಭಟ ಮಿತಿ ಮೀರಿದೆ..ಈಗಾಗ್ಲೇ ಎರಡನೇ ಇನ್ನಿಂಗ್ಸ್ ಶುರು ಮಾಡಿರುವ ಮಳೆ, ಎಚ್‌ಎಸ್‌ಆರ್ ಲೇಔಟ್, ಬೊಮ್ಮನಹಳ್ಳಿ, ಬೆಳ್ಳಂದೂರು, ಇಬ್ಲೂರ್ ಮತ್ತು ಸರ್ಜಾಪುರ ರಸ್ತೆಗಳನ್ನು ಕೆರೆಯಂತಾಗಿಸಿದೆ. ಗುರುವಾರ ಸಂಜೆ ಸುರಿದ ಭಾರೀ ಮಳೆಯಿಂದ ಜನಜೀವನ ಅಸ್ತವ್ಯಸ್ತವಾಗಿದೆ. ರಸ್ತೆಗಳಲ್ಲಿ ಮೊಣಕಾಲು ಮಟ್ಟದ ನೀರು ನಿಂತು ವಾಹನ ಸವಾರರು ಕಷ್ಟಕ್ಕೆ ಒಳಗಾಗಿದ್ದಾರೆ. ಅಲ್ಲದೇ ಕೆಲ ಸ್ಥಳಗಳಲ್ಲಿ ಟ್ರಾಫಿಕ್ ಜಾಮ್ ಕಿಲೋಮೀಟರ್‌ಗಟ್ಟಲೆ ಉಂಟಾಗಿದ್ದು ವಾಹನ ಸವಾರರಿಗೂ ಭಾರಿ ತೊಂದರೆ ಎದುರಾಗಿತ್ತು.

ಚರಂಡಿ ಮೂಲಕ ಹರಿಯಬೇಕಾದ ನೀರು ರಸ್ತೆ ಮೇಲೆ:

ಸಿಲ್ಕ್ ಬೋರ್ಡ್ ಜಂಕ್ಷನ್ ಸೇರಿದಂತೆ ಹಲವೆಡೆ ರಸ್ತೆ ಜಲಾವೃತಗೊಂಡಿದ್ದು, ಇದರ ಪ್ರಮುಖ ಕಾರಣವಾಗಿ ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ನಡೆಸುತ್ತಿರುವ ಚರಂಡಿ ಅಭಿವೃದ್ಧಿ ಕಾಮಗಾರಿಗಳನ್ನು ಹೇಳಲಾಗಿದೆ. ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಅಧಿಕಾರಿಗಳು, ಅಪೂರ್ಣ ಚರಂಡಿ ಕಾಮಗಾರಿಗಳಿಂದ ನೀರು ರಸ್ತೆಗಳಿಗೆ ನುಗ್ಗಿರುವುದಾಗಿ ದೃಢಪಡಿಸಿದ್ದಾರೆ. ದ್ವಿತೀಯಕ ಚರಂಡಿಗಳ ಮೂಲಕ ಹರಿಯಬೇಕಾದ ನೀರು ರಸ್ತೆಗೆ ಹರಿಯುತ್ತಿದೆ, ಎಂದು ಹಿರಿಯ ಇಂಜಿನಿಯರ್ ತಿಳಿಸಿದ್ದಾರೆ.

ಎಲ್ಲೆಲ್ಲಿ ಎಷ್ಟು ಮಿ.ಮೀ ಮಳೆ:

ಭಾರತೀಯ ಹವಾಮಾನ ಇಲಾಖೆಯ (IMD) ಮಾಹಿತಿಯ ಪ್ರಕಾರ, ಬೊಮ್ಮನಹಳ್ಳಿಯಲ್ಲಿ 34 ಮಿ.ಮೀ., ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ 24 ಮಿ.ಮೀ., HAL ವಿಮಾನ ನಿಲ್ದಾಣ 2 ನಲ್ಲಿ 23.5 ಮಿ.ಮೀ. ಮತ್ತು ಗರುಡಾಚಾರಪಾಳ್ಯದಲ್ಲಿ 19.5 ಮಿ.ಮೀ. ಮಳೆ ಸುರಿದಿದೆ. ನಗರಾದ್ಯಂತ ಬರುವ ಮಳೆ ಹೆಚ್ಚಾಗಿ ಆಗ್ನೇಯ ಭಾಗದಲ್ಲಿ ದೃಶ್ಯಮಾನವಾಗಿದೆ.

ಜನಜೀವನ ಅಸ್ತ ವ್ಯಸ್ತ:

ಬೆಗೂರ್ ಪ್ರದೇಶದಲ್ಲಿ ಪರಿಸ್ಥಿತಿ ತೀವ್ರವಾಗಿತ್ತು. ಸ್ಥಳೀಯರು, ಪ್ರತಿ ಮಳೆ ಬಂದಾಗಲೂ ಚರಂಡಿ ನೀರು ರಸ್ತೆಗಳಿಗೆ ಹರಿಯುತ್ತದೆ. ತಗ್ಗು ಪ್ರದೇಶವಾಗಿರುವುದರಿಂದ ಕೆಲ ನಿಮಿಷಗಳಲ್ಲಿ ಪ್ರವಾಹ ಉಂಟಾಗುತ್ತದೆ," ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇನ್ನೊಬ್ಬರು, ಮನೆಯಿಂದ ಹೊರ ಹೋಗಲು ಸಾಧ್ಯವಿಲ್ಲ, ದುರ್ವಾಸನೆ ಹಾಗೂ ಅಸಹ್ಯ ಪರಿಸ್ಥಿತಿ ಎದುರಾಗುತ್ತಿದೆ, ಎಂದು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.

ಎಚ್‌ಎಸ್‌ಆರ್ ಸೆಕ್ಟರ್ 6 ಮತ್ತು 7 ರಲ್ಲಿ, ಅಪೂರ್ಣ ನಾಗರಿಕ ಕಾಮಗಾರಿಗಳಿಂದ ಕೆಲ ರಸ್ತೆಗಳ ಅರ್ಧ ಭಾಗ ತೆರವುಗೊಂಡಿದ್ದು, ಉಳಿದ ಭಾಗ ಮಣ್ಣಿನಿಂದ ತುಂಬಿರುವುದು, ವಾಹನ ಸಂಚಾರಕ್ಕೆ ದೊಡ್ಡ ತೊಂದರೆ ನೀಡುತ್ತಿದೆ. ಕೆಲಡೆ ಚರಂಡಿ ಉಕ್ಕಿ, ಮಳೆಯ ನೀರಿನೊಂದಿಗೆ ಮಿಶ್ರಣಗೊಂಡು ದುರ್ವಾಸನೆ ಮತ್ತು ಸೊಳ್ಳೆ ಸಮಸ್ಯೆಯನ್ನುಂಟುಮಾಡಿದೆ.

BWSSB ಅಧಿಕಾರಿಗಳು, "ಚರಂಡಿ ನೀರು ಸುಗಮವಾಗಿ ಹರಿಯಲು ಭೂಗತ ದ್ವಿತೀಯಕ ಕಾಮಗಾರಿಗಳನ್ನು ಕೈಗೊಳ್ಳುತ್ತಿದ್ದೇವೆ. ಆದರೆ, ಜನರ ಅಡ್ಡಿ ಮತ್ತು ಮಳೆಯು ಕೆಲಸವನ್ನು ವಿಳಂಬಗೊಳಿಸುತ್ತಿದೆ," ಎಂದು ವಿವರಿಸಿದ್ದಾರೆ.

ಬೊಮ್ಮನಹಳ್ಳಿಯಲ್ಲಿನ ಪ್ರಮುಖ ರಸ್ತೆಗಳಲ್ಲಿ 3 ಕಿ.ಮೀ.ಗೂ ಹೆಚ್ಚು ಟ್ರಾಫಿಕ್ ಜಾಮ್ ಉಂಟಾಗಿದ್ದು, ಪೊಲೀಸ್ ಸಿಬ್ಬಂದಿಗಳು ಸಂಚಾರ ನಿಯಂತ್ರಣ ಮಾಡಲು ತೀವ್ರ ಪ್ರಯತ್ನಿಸಿದ್ದಾರೆ. ಸರ್ವಿಸ್ ರಸ್ತೆ ಬಂದ್‌ಗಳು, ವಾಹನಗಳು ಜಲಾವೃತದಲ್ಲಿ ಸಿಲುಕುವ ಘಟನೆಗಳು ಹಾಗೂ ಮಳೆಯಿಂದಾಗಿ ದ್ವಿಚಕ್ರ ವಾಹನ ಸವಾರರು ಕಷ್ಟಪಟ್ಟು ಕಾಣಿಸಿಕೊಂಡಿದ್ದಾರೆ.

ನಗರದಲ್ಲಿ ಮುಂಗಾರು ಮಳೆ ಸಂಬಂಧಿ ಜಲಾವೃತ ಹಾಗೂ ಟ್ರಾಫಿಕ್ ಸಮಸ್ಯೆ ಮತ್ತೆ ತೀವ್ರವಾಗಿ ಕಾಣಿಸಿಕೊಳ್ಳುತ್ತಿರುವುದು, ಅಧಿಕಾರಿಗಳ ತ್ವರಿತ ಹಾಗೂ ಸಮಗ್ರ ಕಾಮಗಾರಿಗಳ ಅಗತ್ಯವನ್ನು ಸೂಚಿಸುತ್ತದೆ.