Bharti Airtel: ಭಾರ್ತಿ ಏರ್‌ಟೆಲ್ FY25 ರಲ್ಲಿ ಸಂಬಳ ಹೆಚ್ಚಳ ಮಿತಿ! ಉದ್ಯೋಗಿಗಳ ಭತ್ಯೆಗಾಗಿ ಎಷ್ಟು ಖರ್ಚು ಮಾಡಿದೆ?

ಭಾರ್ತಿ ಏರ್‌ಟೆಲ್ 2025ರ ಆರ್ಥಿಕ ವರ್ಷದಲ್ಲಿ ತನ್ನ ಉದ್ಯೋಗಿಗಳ ವೇತನದಲ್ಲಿ ಏರಿಕೆ ಮಾಡಿದೆ. ಆದರೆ, ಈ ವೇತನ ಹೆಚ್ಚಳವು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಸ್ವಲ್ಪ ಮಟ್ಟದಲ್ಲಿ ಕಡಿಮೆಯಾಗಿದೆ.ವಾರ್ಷಿಕ ವರದಿಯ ಪ್ರಕಾರ, ಈ ವರ್ಷದ ಸರಾಸರಿ ವೇತನ ಹೆಚ್ಚಳವು ಶೇ.8 ರಷ್ಟಿದೆ, ಕಳೆದ ವರ್ಷ ಇದು ಶೇ.8.7 ರಷ್ಟಿತ್ತು. ವೇತನ ಹೆಚ್ಚಳವು ಸ್ವಲ್ಪ ಕಡಿಮೆಯಾದರೂ, ಏರ್‌ಟೆಲ್‌ನ ಒಟ್ಟು ಆದಾಯವು ಶೇ.10.4 ರಷ್ಟು ಏರಿಕೆಯಾಗಿ 1.7 ಟ್ರಿಲಿಯನ್ ರೂಪಾಯಿಗಳಿಗೆ ತಲುಪಿದೆ. ಅದರಲ್ಲೂ ಮೊಬೈಲ್ ಸೇವೆಗಳಲ್ಲಿ ಶೇ.40 ರಷ್ಟು ಆದಾಯ ಹೆಚ್ಚಳವಾಗಿದೆ.

ಕಂಪನಿಯ ಉಪಾಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕರಾದ ಗೋಪಾಲ್ ವಿಟ್ಟಲ್ ಅವರ ವೇತನದಲ್ಲಿ ಶೇ.9 ರಷ್ಟು ಏರಿಕೆಯಾಗಿದೆ. 20.2 ಕೋಟಿ ರೂಪಾಯಿಗಳನ್ನು ಗಳಿಸಿದ್ದಾರೆ. ಕಳೆದ ಎರಡು ವರ್ಷಗಳಲ್ಲಿ ಅವರ ವೇತನವು ಶೇ.10 ಕ್ಕಿಂತ ಹೆಚ್ಚಿಗೆ ಏರಿಕೆಯಾಗಿತ್ತು. ಅಧ್ಯಕ್ಷರಾದ ಸುನಿಲ್ ಭಾರ್ತಿ ಮಿತ್ತಲ್ ಅವರ ವೇತನವು ಶೇ.0.9 ರಷ್ಟು ಏರಿಕೆಯಾಗಿ 32.5 ಕೋಟಿ ರೂಪಾಯಿಗಳಿಗೆ ತಲುಪಿದೆ. ಮುಖ್ಯ ಹಣಕಾಸು ಅಧಿಕಾರಿ ಸೌಮೆನ್ ರೇ ಅವರ ವೇತನವು ಶೇ.9.5 ರಷ್ಟು ಹೆಚ್ಚಳವಾಗಿ 6.2 ಕೋಟಿ ರೂಪಾಯಿಗಳಿಗೆ ತಲಪಿದೆ

ಕಳೆದ ಎರಡು ವರ್ಷಗಳಲ್ಲಿ ಮಂಡಳಿಯಲ್ಲಿಲ್ಲದ ಉದ್ಯೋಗಿಗಳು ಮತ್ತು ಪ್ರಮುಖ ವ್ಯವಸ್ಥಾಪಕ ಸಿಬ್ಬಂದಿಯ ಸರಾಸರಿ ವೇತನದಲ್ಲಿ ಇಳಿಕೆಯಾಗಿದೆ. 2024ರ ಆರ್ಥಿಕ ವರ್ಷದಲ್ಲಿ ಶೇ.5.6 ರಷ್ಟು ಕುಸಿತ ಕಂಡಿದ್ದು, 2025ರಲ್ಲಿ ಇದು ಶೇ.3.95 ರಷ್ಟಿದೆ. ಪುರುಷ ಉದ್ಯೋಗಿಗಳ ಸರಾಸರಿ ವೇತನ 8.38 ಲಕ್ಷ ರೂಪಾಯಿಗಳಾಗಿದ್ದರೆ, ಮಹಿಳಾ ಉದ್ಯೋಗಿಗಳು 8.17 ಲಕ್ಷ ರೂಪಾಯಿಗಳನ್ನು ಗಳಿಸಿದ್ದಾರೆ.

ವೇತನದ ಬದಲಾವಣೆಗಳಿಗೆ ಉದ್ಯೋಗಿಗಳ ಪಾತ್ರಗಳಲ್ಲಿನ ಬದಲಾವಣೆಗಳು ಮತ್ತು ಗುಂಪಿನೊಳಗಿನ ಆಂತರಿಕ ಬದಲಾವಣೆಗಳೇ ಕಾರಣವೆಂದು ಏರ್‌ಟೆಲ್ ಹೇಳಿದೆ. ಪರಿಹಾರದ ತತ್ವ ಮತ್ತು ಸಂಭಾವನೆಯ ಮಟ್ಟಗಳ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಕಂಪನಿ ಸ್ಪಷ್ಟಪಡಿಸಿದೆ.

5G ಸೇವೆಯನ್ನು ಪ್ರಾರಂಭಿಸಲು ಹೆಚ್ಚಿನ ಬಂಡವಾಳವನ್ನು ಹೂಡಿಕೆ ಮಾಡಿದ ನಂತರ,ಏರ್‌ಟೆಲ್ ಈಗ ದೀರ್ಘಕಾಲೀನ ಮೌಲ್ಯವನ್ನು ಸೃಷ್ಟಿಸಲು ಬಂಡವಾಳ ನಿರ್ವಹಣೆಯತ್ತ ಗಮನಹರಿಸುತ್ತಿದೆ.ಕಳೆದ ಐದು ವರ್ಷಗಳಲ್ಲಿ ಏರ್‌ಟೆಲ್ ಡಿಜಿಟಲ್ ಮೂಲಸೌಕರ್ಯ ವಿಸ್ತರಣೆಗಾಗಿ 1.6 ಟ್ರಿಲಿಯನ್ ರೂಪಾಯಿಗಳಿಗಿಂತ ಹೆಚ್ಚು ಹೂಡಿಕೆಯನ್ನು ಮಾಡಿದೆ.

2025ರ ಆರ್ಥಿಕ ವರ್ಷದಲ್ಲಿ ಏರ್‌ಟೆಲ್‌ನ ಬಂಡವಾಳ ವೆಚ್ಚವು 30,300 ಕೋಟಿ ರೂಪಾಯಿಗಳಷ್ಟಿತ್ತು. ಹಿಂದಿನ ವರ್ಷಗಳಲ್ಲಿ ಇದು ಹೆಚ್ಚಾಗಿತ್ತು. 2024ರಲ್ಲಿ 33,300 ಕೋಟಿ ಮತ್ತು 2023 ರಲ್ಲಿ 40,000 ಕೋಟಿ ರೂಪಾಯಿಗಳ ಬಂಡವಾಳವನ್ನು ಹೂಡಿಕೆಯನ್ನು ಮಾಡಲಾಗಿದೆ.

ಏರ್‌ಟೆಲ್ 55,300 ಕೋಟಿ ರೂಪಾಯಿಗಳ ಕಾರ್ಯಾಚರಣಾ ಮುಕ್ತ ನಗದು ಹರಿವನ್ನು ಸೃಷ್ಟಿಸಿದೆ. ಪರವಾನಗಿ ಶುಲ್ಕ ಮತ್ತು ಸ್ಪೆಕ್ಟ್ರಮ್ ಬಳಕೆಯ ಶುಲ್ಕಗಳಿಗಾಗಿ ಸರ್ಕಾರಕ್ಕೆ 37,300 ಕೋಟಿ ರೂಪಾಯಿಗಳನ್ನು ಪಾವತಿಸಿದೆ. ಇದರ ಜೊತೆಗೆ, ಸ್ಪೆಕ್ಟ್ರಮ್ ಬಾಧ್ಯತೆಗಳಿಗಾಗಿ 28,900 ಕೋಟಿ ರೂಪಾಯಿಗಳನ್ನು ಪಾವತಿಸಿದೆ ಎಂದು ಕಂಪನಿ ತಿಳಿಸಿದೆ.

ನಮ್ಮ ಪೋಸ್ಟ್‌ಪೇಯ್ಡ್ ಗ್ರಾಹಕರನ್ನು ಹೆಚ್ಚಿಸುವತ್ತ ನಮ್ಮ ಗಮನವಿದೆ. ಸುಸ್ಥಿರವಾಗಿ ಬಳಸಲಾಗುವ ಬಂಡವಾಳದ ಮೇಲಿನ ಲಾಭವನ್ನು ಹೆಚ್ಚಿಸಲು ಮತ್ತಷ್ಟು ಸುಂಕ ಹೊಂದಾಣಿಕೆಗಳ ಅಗತ್ಯವಿದೆ ಎಂದು ಗೋಪಾಲ್ ವಿಟ್ಟಲ್ ವಾರ್ಷಿಕ ವರದಿಯಲ್ಲಿ ಮಾಹಿತಿಯನ್ನು ತಿಳಿಸಿದ್ದಾರೆ.

ಆರ್ಥಿಕ ವರ್ಷದಲ್ಲಿ 2025ರಲ್ಲಿ ಉದ್ಯೋಗಿಗಳ ಭತ್ಯೆಗಳಿಗಾಗಿ ಏರ್‌ಟೆಲ್ 6,309 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದೆ. ಇದು ಹಿಂದಿನ ವರ್ಷದ 5,323 ಕೋಟಿ ರೂಪಾಯಿಗಳಿಗೆ ಹೋಲಿಸಿದರೆ ಹೆಚ್ಚಾಗಿದೆ.ಮಾರ್ಚ್ ಅಂತ್ಯದ ವೇಳೆಗೆ ಏರ್‌ಟೆಲ್ 20,310 ಖಾಯಂ ಉದ್ಯೋಗಿಗಳನ್ನು ಮತ್ತು 73,929 ಗುತ್ತಿಗೆ ಕಾರ್ಮಿಕರನ್ನು ಹೊಂದಿತ್ತು. 2024 ರಲ್ಲಿ ಇದು 19,198 ಖಾಯಂ ಉದ್ಯೋಗಿಗಳನ್ನು ಮತ್ತು 65,446 ಗುತ್ತಿಗೆ ಕಾರ್ಮಿಕರನ್ನು ಹೊಂದಿತ್ತು.

ಏರ್‌ಟೆಲ್ ಸ್ವತಂತ್ರ 5G ನೆಟ್‌ವರ್ಕ್‌ಗಳಿಗೆ ಬದಲಾಗಲು ಸಿದ್ಧವಾಗಿದೆ ಎಂದು ಸುನಿಲ್ ಭಾರ್ತಿ ಮಿತ್ತಲ್ ಹೇಳಿದ್ದಾರೆ. ಪ್ರಾಯೋಗಿಕ ಪರೀಕ್ಷೆಗಳನ್ನು ಮುಂದುವರೆಸಲಾಗುವುದು ಎಂದು ಹೇಳಿದ್ದಾರೆ.