60 ರುಪಾಯಿಯ ಬರ್ಗರ್ ಕಿಂಗ್ ಷೇರು ನಾಲ್ಕೇ ದಿನದಲ್ಲಿ 219 ರುಪಾಯಿ

ಬರ್ಗರ್ ಕಿಂಗ್ ಕಂಪೆನಿಯ ಷೇರು ಲಿಸ್ಟಿಂಗ್ ಆಗಿದ್ದು ಸೋಮವಾರ. ಅಂದರೆ ಇವತ್ತಿಗೆ (ಡಿಸೆಂಬರ್ 17, 2020) ನಾಲ್ಕನೇ ದಿನ. ಅಷ್ಟರಲ್ಲಿ 60 ರುಪಾಯಿಗೆ ವಿತರಣೆ ಆಗಿದ್ದು ಷೇರು ಬಿಎಸ್ ಇ ಸೂಚ್ಯಂಕದಲ್ಲಿ 219 ರುಪಾಯಿ ಮುಟ್ಟಿದೆ. ಬರ್ಗರ್ ಕಿಂಗ್ ಐಪಿಒದಲ್ಲಿ ಒಂದು ಸಾವಿರ ಷೇರು ಸಿಕ್ಕವರ 60,000 ರುಪಾಯಿ ಮೊತ್ತ, ನಾಲ್ಕು ದಿನದ ವಹಿವಾಟಿಗೆ 2,19,000 ರುಪಾಯಿ ಮುಟ್ಟಿದೆ.

265% ಲಾಭ ಕಣ್ರೀ. ಬ್ಯಾಂಕ್ ಗಳಲ್ಲಿ ದುಡ್ಡು ಇಟ್ಟರೆ ಬಹಳ ಸೇಫ್. ಒಂದು ವರ್ಷಕ್ಕೆ ಬಡ್ಡಿ (ಈಗಿನ ಸ್ಥಿತಿಗೆ) 5.5%ನಿಂದ ತೀರಾ ಹೆಚ್ಚೆಂದರೆ 7% ಸಿಗುತ್ತದೆ. ಅಂಥದ್ದರಲ್ಲಿ ಈ ಬರ್ಗರ್ ಕಿಂಗ್ ಷೇರು ಇಷ್ಟು ರಿಟರ್ನ್ಸ್ ನೀಡಿದೆ. ಹಾಗಂತ ಈ ಷೇರು ಖರೀದಿ ಮಾಡಿ ಅಂತ ಶಿಫಾರಸು ಮಾಡೋದು ಈ ವರದಿ ಉದ್ದೇಶ ಅಲ್ಲ. ಇದು ಕೇವಲ ಮಾಹಿತಿ ಮಾತ್ರ.

ಬರ್ಗರ್ ಇಂಡಿಯಾದ ಮಾರುಕಟ್ಟೆ ಮೌಲ್ಯ 8363 ಕೋಟಿ ರುಪಾಯಿಗೆ ತಲುಪಿಕೊಂಡಿದೆ. ಈ ಹಿಂದೆ, 2017ರಲ್ಲಿ ಅಸ್ಟ್ರಾನ್ ಪೇಪರ್ ಅಂಡ್ ಬೋರ್ಡ್ ಮಿಲ್ ಲಿ. ಲಿಸ್ಟಿಂಗ್ ದಿನವೇ 142% ಏರಿಕೆ ಆಗಿತ್ತು. ಆ ನಂತರ ಬರ್ಗರ್ ಇಂಡಿಯಾ ಷೇರಿನದೇ ಅದ್ಭುತ ಪ್ರದರ್ಶನ.

ಕೊರೊನಾ ಲಾಕ್ ಡೌನ್ ನಿರ್ಬಂಧ ತೆರವಾದ ಮೇಲೆ ರೆಸ್ಟೋರೆಂಟ್ ತೆರೆದು, ಒಳ್ಳೆ ವ್ಯವಹಾರ ಆಗುವ ನಿರೀಕ್ಷೆಯಲ್ಲಿ ಬೇಡಿಕೆ ಕುದುರಿಕೊಳ್ಳಬಹುದು ಎಂದು ಹೂಡಿಕೆದಾರರಿದ್ದಾರೆ. ಅಂದ ಹಾಗೆ, ಬರ್ಗರ್ ಕಿಂಗ್ ನ 810 ಕೋಟಿ ರುಪಾಯಿ ಐಪಿಒ ಕಳೆದ ತಿಂಗಳು 156.65 ಪಟ್ಟು ಹೆಚ್ಚು ಬೇಡಿಕೆ ಪಡೆದಿತ್ತು.

ಇನ್ನು ಷೇರು ಲಿಸ್ಟಿಂಗ್ ಆದ ಮೇಲೆ ಇಪ್ಪತ್ತು ಪರ್ಸೆಂಟ್, ಹತ್ತು ಪರ್ಸೆಂಟ್ ಅಂತ ಏರಿಕೆ ಕಾಣುತ್ತಲೇ ಇದೆ. ಗುರುವಾರದಂದು ಹತ್ತು ಪರ್ಸೆಂಟ್ ನಷ್ಟು ಏರಿಕೆ ಕಂಡಿದೆ.