Burger King IPO: ಲಿಸ್ಟಿಂಗ್ ನಲ್ಲಿ ಭರ್ಜರಿ ಏರಿಕೆ; ಹೂಡಿಕೆದಾರರಿಗೆ ಬಂಪರ್

ಬರ್ಗರ್ ಕಿಂಗ್ ಷೇರು ಸೋಮವಾರ ಷೇರು ಮಾರುಕಟ್ಟೆಯಲ್ಲಿ ಅದ್ಭುತವಾದ ಅರಂಗೇಟ್ರಂ ಮಾಡಿದೆ. ನ್ಯಾಷನಲ್ ಸ್ಟಾಕ್ ಎಕ್ಸ್ ಚೇಂಜ್ ನಲ್ಲಿ (ಎನ್ ಎಸ್ ಇ) 92 ಪರ್ಸೆಂಟ್ ನಷ್ಟು ಪ್ರೀಮಿಯಂನೊಂದಿಗೆ 115.35 ರುಪಾಯಿಯೊಂದಿಗೆ ಲಿಸ್ಟಿಂಗ್ ಆಗಿದೆ. ಬರ್ಗರ್ ಕಿಂಗ್ ಷೇರನ್ನು 60 ರುಪಾಯಿಗೆ ವಿತರಣೆ ಮಾಡಲಾಗಿದೆ.

2020ರಲ್ಲಿ ಬಂದ ಐಪಿಒಗಳಲ್ಲಿ ಹೂಡಿಕೆದಾರರಿಂದ ಅತ್ಯುತ್ತಮ ಪ್ರತಿಕ್ರಿಯೆ ಕಂಡಿತ್ತು ಬರ್ಗರ್ ಕಿಂಗ್. ಇದು ಎರಡನೇ ಅತ್ಯುತ್ತಮ ಸ್ಪಂದನೆ ಆಗಿತ್ತು. ಐಪಿಒಗೆ ಮೀಸಲಿಟ್ಟಿದ್ದ ಷೇರುಗಳ ಸಂಖ್ಯೆಗಿಂತ 156.65 ಪಟ್ಟು ಹೆಚ್ಚು ಬೇಡಿಕೆ ಬಂದಿತ್ತು. ಬರ್ಗರ್ ಕಿಂಗ್ ಐಪಿಒ ಡಿಸೆಂಬರ್ 2ರಿಂದ 4, 2020ರ ಮಧ್ಯೆ ಸಬ್ ಸ್ಕ್ರಿಪ್ಷನ್ ಗೆ ಅವಕಾಶ ಒದಗಿಸಿತ್ತು.

ಕಡಿಮೆ ಮೌಲ್ಯಮಾಪನ, ಹೂಡಿಕೆದಾರರ ಪ್ರಬಲವಾದ ಆಸಕ್ತಿ ಮತ್ತಿತರ ಕಾರಣಗಳಿಗಾಗಿ ವಿತರಣೆ ಬೆಲೆಗಿಂತ ಶೇಕಡಾ 70ರಿಂದ 75ರಷ್ಟು ಮೊತ್ತ ಗಳಿಕೆ ಆಗುತ್ತದೆ ಎಂಬ ನಿರೀಕ್ಷೆ ಇತ್ತು. ಈಗ ಅತ್ಯುತ್ತಮ ಸ್ಪಂದನೆ ಬಂದಿರುವುದರಿಂದ ಸ್ವಲ್ಪ ಮಟ್ಟಿಗಿನ ಷೇರು ಮಾರಾಟ ಮಾಡಿ, ನಗದು ಮಾಡಿಟ್ಟುಕೊಳ್ಳುವುದು ಹಾಗೂ ಮುಂದೆ ಬೆಲೆಯಲ್ಲಿ ಸ್ವಲ್ಪ ಇಳಿಕೆ ಆದಲ್ಲಿ ಖರೀದಿಸುವುದು ಒಳ್ಳೆ ಆಯ್ಕೆ ಎಂದು ತಜ್ಞರು, ವಿಶ್ಲೇಷಕರು ಅಭಿಪ್ರಾಯ ಪಡುತ್ತಾರೆ.