ಫೋನ್‌ ಕಾಲ್‌, ಇಮೇಲ್‌ ಮೂಲಕ 500 ಉದ್ಯೋಗಿಗಳನ್ನು ವಜಾಗೊಳಿಸಿದ ಬೈಜೂಸ್‌

ಬೆಂಗಳೂರು, ಏಪ್ರಿಲ್‌ 3: ಹಣಕಾಸಿನ ಬಿಕ್ಕಟ್ಟು ಮತ್ತು ಸರಣಿ ಕಾನೂನು ತೊಡಕುಗಳ ಸಂಕಷ್ಟದ ಹಿನ್ನೆಲೆಯಲ್ಲಿ ಎಜುಟೆಕ್‌ ಸಂಸ್ಥೆ ಬೈಜೂಸ್ ಶಿಕ್ಷಕರು ಸೇರಿದಂತೆ 500 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಪ್ರಸ್ತುತ ಕಂಪನಿಯು ಸುಮಾರು 13,000 ಉದ್ಯೋಗಿಗಳನ್ನು ಹೊಂದಿದೆ.

ಕೆಲವು ಉದ್ಯೋಗಿಗಳು ಮತ್ತು ಮಾರಾಟ, ಮಾರ್ಕೆಟಿಂಗ್ ಮತ್ತು ಟ್ಯೂಷನ್ ಸೆಂಟರ್‌ಗಳಾದ್ಯಂತ ಸಿಬ್ಬಂದಿಯನ್ನು ವಜಾಗೊಳಿಸಲಾಗಿದೆ. ಕೆಲವು ಉದ್ಯೋಗಿಗಳು ವಜಾಗೊಳಿಸುವ ಬಗ್ಗೆ ಇಮೇಲ್‌ಗಳನ್ನು ಸ್ವೀಕರಿಸಿದರೆ, ಇತರರನ್ನು ಫೋನ್ ಕರೆಗಳ ಮೂಲಕ ವಜಾಗೊಳಿಸಲಾಗಿದೆ ಎಂದು ಹೇಳಿಕೊಂಡಿದ್ದಾರೆ.

ಬೈಜೂಸ್‌ನ ಉದ್ಯೋಗಿಯೊಬ್ಬರು ಕಂಪನಿಯು ಆನ್‌ಲೈನ್ ಶಿಕ್ಷಕರನ್ನು ಆಫ್‌ಲೈನ್‌ನಲ್ಲಿ ಕೆಲಸ ಮಾಡುವಂತೆ ಮತ್ತು ಕಂಪನಿಯ ಟ್ಯೂಷನ್ ಸೆಂಟರ್‌ಗಳಲ್ಲಿ ಕಲಿಸಲು ಹೇಳುತ್ತಿದೆ. ಅದನ್ನು ಮಾಡಲು ಸಾಧ್ಯವಾಗದವರನ್ನು ಈಗ ವಜಾ ಮಾಡಲಾಗುತ್ತಿದೆ. ಒಡಿಶಾದ ಆನ್‌ಲೈನ್ ಶಿಕ್ಷಕರನ್ನು ರಾಜಸ್ಥಾನದ ಆಫ್‌ಲೈನ್ ಟ್ಯೂಷನ್ ಸೆಂಟರ್‌ಗೆ ಸ್ಥಳಾಂತರಿಸಲು ಮುಂದಾಗುತ್ತಿದೆ. ಇದು ಸಾಧ್ಯವಾಗದ ಕಾರಣ ಅನೇಕರು ರಾಜೀನಾಮೆ ನೀಡುತ್ತಿದ್ದಾರೆ ಮತ್ತು ಕೆಲವರನ್ನು ವಜಾ ಮಾಡುತ್ತಿದ್ದಾರೆ ಎಂದು ಉದ್ಯೋಗಿಯೊಬ್ಬರು ಹೇಳಿಕೊಂಡಿದ್ದಾರೆ.

ಬೈಜೂಸ್‌ ಇತ್ತೀಚೆಗೆ ತನ್ನ 90% ಬೋಧನಾ ಕೇಂದ್ರಗಳು ಅಂದರೆ 292 ರಲ್ಲಿ 262 ಹೈಬ್ರಿಡ್ ಮಾದರಿಯಲ್ಲಿ ಕಾರ್ಯನಿರ್ವಹಿಸುವುದನ್ನು ಮುಂದುವರಿಸುತ್ತದೆ ಹಾಗೂ ಉಳಿದವು ಪುನರ್‌ರಚನೆಗೆ ಒಳಗಾಗುತ್ತದೆ ಎಂದು ಹೇಳಿದೆ. ವಜಾಗೊಳಿಸುವಿಕೆಯ ಬಗ್ಗೆ ಬೈಜೂಸ್‌ ವಕ್ತಾರರು, ನಾವು ಅಕ್ಟೋಬರ್ 2023 ರಲ್ಲಿ ಕಾರ್ಯಾಚರಣೆಯ ರಚನೆಗಳನ್ನು ಸರಳೀಕರಿಸಲು, ವೆಚ್ಚದ ಮೂಲವನ್ನು ಕಡಿಮೆ ಮಾಡಲು ಮತ್ತು ಉತ್ತಮ ನಗದು ಹರಿವಿನ ನಿರ್ವಹಣೆಗಾಗಿ ಘೋಷಿಸಲಾದ ವ್ಯಾಪಾರ ಪುನರ್‌ರಚನೆಯ ಅಂತಿಮ ಹಂತದಲ್ಲಿದ್ದೇವೆ ಎಂದು ಹೇಳಿದ್ದಾರೆ.

ನಾಲ್ಕು ವಿದೇಶಿ ಹೂಡಿಕೆದಾರರು ಕಂಪೆನಿ ವಿರುದ್ದ ಹೂಡಿರುವ ದಾವೆಯಿಂದಾಗಿ ಕಂಪನಿಯು ಸಂಕಷ್ಟದ ಪರಿಸ್ಥಿತಿಯನ್ನು ಎದುರಿಸುತ್ತಿದೆ. ಪ್ರಸ್ತುತ ಸಂದರ್ಭಗಳನ್ನು ಗಮನಿಸಿದರೆ ಪ್ರತಿಯೊಬ್ಬ ಉದ್ಯೋಗಿ ಮತ್ತು ಪರಿಸರ ವ್ಯವಸ್ಥೆಯು ಅಪಾರ ಒತ್ತಡವನ್ನು ಎದುರಿಸುತ್ತಿದೆ ಎಂದು ವಕ್ತಾರರು ಹೇಳಿದ್ದಾರೆ.