ನವೆಂಬರ್ ಚಿಲ್ಲರೆ ಹಣದುಬ್ಬರ ದರದಲ್ಲಿ ಅಲ್ಪ ಪ್ರಮಾಣದ ಇಳಿಕೆ

ಭಾರತದಲ್ಲಿ ಚಿಲ್ಲರೆ ಹಣದುಬ್ಬರ ಪ್ರಮಾಣ ನವೆಂಬರ್ ನಲ್ಲಿ ಕಡಿಮೆ ಆಗಿದೆ ಎಂಬ ಸಂಗತಿ ಸೋಮವಾರ ಬಿಡುಗಡೆಯಾದ ಅಧಿಕೃತ ದತ್ತಾಂಶಗಳು ತಿಳಿಸುತ್ತವೆ. ಸ್ಟಾಟಿಸ್ಟಿಕ್ಸ್ ಅಂಡ್ ಪ್ರೋಗ್ರಾಂ ಇಂಪ್ಲಿಮೆಂಟೇಷನ್ (MoSPI) ಸಚಿವಾಲಯದಿಂದ ಈ ದತ್ತಾಂಶ ಬಿಡುಗಡೆ ಮಾಡಲಾಗಿದೆ. ನವೆಂಬರ್ ತಿಂಗಳಲ್ಲಿ ಗ್ರಾಹಕ ದರ ಸೂಚ್ಯಂಕವು (CPI) 6.93% ತಲುಪಿದೆ. ಆದರೂ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಇರಿಸಿಕೊಂಡಿದ್ದ 6% ಗುರಿಗಿಂತ ಮೇಲಿದೆ.

ಅಕ್ಟೋಬರ್ ತಿಂಗಳಲ್ಲಿ ಗ್ರಾಹಕ ದರ ಸೂಚ್ಯಂಕವು 7.61% ಇತ್ತು. ಆಹಾರ ಹಣದುಬ್ಬರವು ಅಕ್ಟೋಬರ್ ನಲ್ಲಿ 11% ಇದ್ದದ್ದು, ನವೆಂಬರ್ ನಲ್ಲಿ 9.43%ಗೆ ಇಳಿಕೆ ಆಗಿದೆ. ಇನ್ನು ತರಕಾರಿಗಳು 15.6%ಗೆ ಇಳಿದಿದೆ. ಇನ್ನು ಬೆಲೆ ಏರಿಕೆ ಆಗಿರುವುದು ಮೊಟ್ಟೆಯಲ್ಲಿ ಕಳೆದ ವರ್ಷಕ್ಕೆ ಹೋಲಿಸಿದಲ್ಲಿ 20.26% ಹೆಚ್ಚಳವಾಗಿದೆ.

ಇನ್ನು ತೈಲ ಮತ್ತು ವನಸ್ಪತಿ ಬೆಲೆಯಲ್ಲಿ 17.86% ಹೆಚ್ಚಳವಾಗಿದೆ. ಬೇಳೆ ಕಾಳು ಮತ್ತು ಉತ್ಪನ್ನಗಳು 17.91% ಗಳಿಕೆ, ಮಾಂಸ ಮತ್ತು ಮೀನು 16.67% ಗಳಿಕೆ, ತರಕಾರಿ ಸೆಗ್ಮೆಂಟ್ 15.63% ಹೆಚ್ಚಳವಾಗಿದೆ. ಈ ಮಧ್ಯೆ ಸಗಟು ದರ ಹಣದುಬ್ಬರ (WPI) ನವೆಂಬರ್ ನಲ್ಲಿ ಒಂಬತ್ತು ತಿಂಗಳ ಗರಿಷ್ಠ ಮಟ್ಟವಾದ 1.55% ಮುಟ್ಟಿದೆ.