Cybercrime Karnataka: ಕಳೆದ 4 ವರ್ಷದಲ್ಲಿ 52,000 ಸೈಬರ್ ಕೇಸ್‌ಗಳು...‌2025ರಲ್ಲಿ ಎಷ್ಟು ದಾಖಲಾಗಿವೆ ತಿಳಿಯಿರಿ!

ರಾಜ್ಯದಲ್ಲಿ ಸೈಬರ್ ಅಪರಾಧ ಪ್ರಕರಣಗಳು ಕ್ರಮೇಣ ಇಳಿಕೆಯಾಗುತ್ತಿವೆ ಎಂದು ಗೃಹ ಸಚಿವ ಡಾ. ಜಿ. ಪರಮೇಶ್ವರ್ ವಿಧಾನಸಭೆಯಲ್ಲಿ ತಿಳಿಸಿದರು. ಪ್ರಶ್ನೋತ್ತರ ಅವಧಿಯಲ್ಲಿ ಅವರು ಸೈಬರ್ ವಂಚನೆಯ ಇತ್ತೀಚಿನ ಅಂಕಿ-ಅಂಶಗಳನ್ನು ಮಂಡಿಸಿದರು. ಸರ್ಕಾರ ಕೈಗೊಳ್ಳುತ್ತಿರುವ ತುರ್ತು ಕ್ರಮಗಳು ಮತ್ತು ಪೊಲೀಸ್ ಇಲಾಖೆಯ ಸತತ ನಿಗಾವೇ ಈ ಇಳಿಕೆಯ ಮುಖ್ಯ ಕಾರಣ ಎಂದು ಅವರು ಹೇಳಿದರು.

ಸಿಮೆಂಟ್ ಮಂಜು ಕೇಳಿದ ಪ್ರಶ್ನೆ:

ವಿಧಾನಸಭೆಯಲ್ಲಿ ಸಿಮೆಂಟ್ ಮಂಜು ಮಾತನಾಡುತ್ತಾ, ಆನ್‌ಲೈನ್ ಗೇಮಿಂಗ್‌ಗೆ ಯುವಕರು ಹೆಚ್ಚಾಗಿ ಬಲಿಯಾಗುತ್ತಿದ್ದಾರೆ ಎಂದು ಗಮನ ಸೆಳೆದರು. ಕ್ರಮ ಕೈಗೊಂಡರೂ ಅಪರಾಧಿಗಳು ಬಂಧನವಾಗದಿರುವುದು, ಕೇಂದ್ರ ಸಹಾಯವಾಣಿ ಮೂಲಕ ದೂರು ನೀಡುವಷ್ಟರಲ್ಲಿ ನಾಗರಿಕರು ಹಣ ಕಳೆದುಕೊಳ್ಳುತ್ತಿರುವುದು ಗಂಭೀರ ವಿಷಯ ಎಂದು ಹೇಳಿದರು. ಕರ್ನಾಟಕದಲ್ಲಿ ಇಂತಹ ಪ್ರಕರಣಗಳ ಸಂಖ್ಯೆ ಹೆಚ್ಚಾಗಿದೆ ಎಂದು ಅವರು ಪ್ರಶ್ನಿಸಿದರು.

ಗೃಹ ಸಚಿವ ಪರಮೇಶ್ವರ್ ನೀಡಿದ ಉತ್ತರ:

ಸೈಬರ್ ಅಪರಾಧ ರಾಜ್ಯದಲ್ಲಿ ದೊಡ್ಡ ಸಮಸ್ಯೆಯಾಗಿದ್ದು, ಕಳೆದ ನಾಲ್ಕು ವರ್ಷಗಳಲ್ಲಿ ಒಟ್ಟು 52,000ಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿವೆ ಎಂದು ಗೃಹ ಸಚಿವರು ವಿವರಿಸಿದರು. ತಡೆಗಟ್ಟಲು ಕಾನೂನಿನಲ್ಲಿ ಬದಲಾವಣೆಗಳನ್ನು ಸರ್ಕಾರ ಈಗಾಗಲೇ ತಂದಿದೆ, ಆದರೆ ಇಂಡಿಯಾ ಗೇಮಿಂಗ್ ಫೆಡರೇಶನ್ ಈ ನಿರ್ಣಯದ ವಿರುದ್ಧ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿರುವುದರಿಂದ ಪ್ರಕರಣ ಈಗ ವಿಚಾರಣೆಯಲ್ಲಿ ಇದೆ ಎಂದು ತಿಳಿಸಿದರು.

ಅವರು ನೀಡಿದ ಅಂಕಿ-ಅಂಶಗಳು ಹೀಗಿವೆ:

2023: 22,250 ಪ್ರಕರಣಗಳು, 6,159 ಪ್ರಕರಣ ಪತ್ತೆ, ಸುಮಾರು 880 ಕೋಟಿ ರೂ. ವಂಚನೆ - ಇದರಲ್ಲಿ 177 ಕೋಟಿಯನ್ನು ವಶಪಡಿಸಿಕೊಳ್ಳಲಾಗಿದೆ.

2024: 28,478 ಪ್ರಕರಣಗಳು, ಸುಮಾರು 2,562 ಕೋಟಿ ರೂ. ವಂಚನೆ - ಇದರಲ್ಲಿ 323 ಕೋಟಿಯನ್ನು ವಶಪಡಿಸಿಕೊಳ್ಳಲಾಗಿದೆ.

2025: ಈಗಾಗಲೇ 13,000ಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿದ್ದು, 2,038 ಕೋಟಿ ರೂ. ವಂಚನೆ - ಇದರಲ್ಲಿ 127 ಕೋಟಿಯನ್ನು ವಶಪಡಿಸಿಕೊಳ್ಳಲಾಗಿದೆ.

ಅಪರಾಧಗಳ ಪ್ರಮಾಣ ಹೆಚ್ಚು ಇದ್ದರೂ, ಹೊಸ ಕ್ರಮಗಳ ಜಾರಿಯಿಂದ ಇತ್ತೀಚೆಗೆ ಪ್ರಕರಣಗಳು ಕಡಿಮೆಯಾಗುತ್ತಿರುವುದಾಗಿ ಸಚಿವರು ಹೇಳಿದರು.

ಸೈಬರ್ ಕಂಟ್ರೋಲ್ ರೂಂ ಬಗ್ಗೆ ಚರ್ಚೆ:

ರಾಜ್ಯದಲ್ಲಿ ಪ್ರತ್ಯೇಕ ಸೈಬರ್ ಕಂಟ್ರೋಲ್ ರೂಂ ತೆರೆಯಬೇಕೆಂದು ಕೆಲವು ಸದಸ್ಯರು ಮನವಿ ಮಾಡಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಗೃಹ ಸಚಿವರು, ರಾಜ್ಯದಲ್ಲಿ ಈಗಾಗಲೇ ಸೈಬರ್ ಕಮಾಂಡ್ ಸೆಂಟರ್ ಕಾರ್ಯನಿರ್ವಹಿಸುತ್ತಿದೆ ಮತ್ತು ದೂರುಗಳ ಮೇಲಿನ ಕ್ರಮವನ್ನು ವೇಗವಾಗಿ ಕೈಗೊಳ್ಳಲಾಗುತ್ತಿದೆ ಎಂದು ಹೇಳಿದರು.

ಚರ್ಚೆಯ ವೇಳೆ ಬಿಜೆಪಿಯ ಸುನೀಲ್ ಕುಮಾರ್ ಮಾತನಾಡಿ, ಕೆಲವು ದಿನಗಳಿಂದ "ಮುಖ್ಯಮಂತ್ರಿ ಯಾರು ಆಗುತ್ತಾರೆ?" ಎಂಬುದರ ಮೇಲೆ ಆನ್‌ಲೈನ್ ಬೆಟ್ಟಿಂಗ್ ನಡೆಯುತ್ತಿದೆ ಎಂದು ಗಮನ ಸೆಳೆದರು. ಸೈಬರ್ ಬೆಟ್ಟಿಂಗ್‌ನ್ನು ತಡೆಯಲು ಸರ್ಕಾರ ಒಳ್ಳೆಯ ಕ್ರಮ ತೆಗೆದುಕೊಂಡಿದೆ, ಆದರೆ ಇಂತಹ ರಾಜಕೀಯ ಬೆಟ್ಟಿಂಗ್‌ಗಳನ್ನೂ ತಡೆಯಲು ತಕ್ಷಣ ಕ್ರಮ ಅಗತ್ಯವಿದೆ ಎಂದು ಅವರು ಹೇಳಿದರು.