ಉಳಿತಾಯಕ್ಕಾಗಿ 'ತ್ರಿ ಬಕೆಟ್ ಪ್ಲಾನ್' ಬಗ್ಗೆ ನಿಮಗೆ ಗೊತ್ತಾ?

ನವದೆಹಲಿ, ಮೇ 10: ನಿವೃತ್ತಿಯ ನಂತರ ಆದಾಯಕ್ಕೆ ಏನು ಮಾಡಬೇಕು? ಇದು ನಮ್ಮಲ್ಲಿ ಅನೇಕರಿಗೆ ಮನಸ್ಸಿನಲ್ಲಿ ಮೂಡುವ ಪ್ರಶ್ನೆಯಾಗಿದೆ. ಇದಕ್ಕಾಗಿ ಕೆಲವರು ದುಡಿಯುತ್ತಲೇ ಅಲ್ಪ ಪ್ರಮಾಣವನ್ನು ಉಳಿತಾಯಕ್ಕಾಗಿ ಮೀಸಲಿಡುತ್ತಾರೆ. ಪಿಂಚಣಿಗಾಗಿ ಹಣ ಉಳಿತಾಯ ಮಾಡಿದ್ರೆ ಯಾವುದೇ ಹಣಕಾಸಿನ ಚಿಂತೆಗಳಿಲ್ಲದೆ ಮುಂದೆ ನಿವೃತ್ತಿ ವರ್ಷಗಳನ್ನು ಆನಂದಿಸಬಹುದು.

ಆದರೆ ಇದು ಅನೇಕರಿಗೆ ಸ್ವಲ್ಪ ಕಷ್ಟಕರವಾಗಿರುತ್ತದೆ. ಏಕೆಂದರೆ ಅವರ ದಿನನಿತ್ಯದ ಕುಟುಂಬದ ಅಗತ್ಯಗಳನ್ನು ಪೂರೈಸಲು ಮಾತ್ರ ಅವರ ಪ್ರಸ್ತುತ ಸಂಬಳವು ಸಾಕಾಗುತ್ತದೆ. ಹೀಗಾಗಿ ನಿವೃತ್ತಿಗಾಗಿ ಉಳಿತಾಯ ಅವರಿಗೆ ಅಡ್ಡಿಯಾಗಬಹುದು. ಇಂತಹ ಜನರಿಗೆ ಸಹಾಯ ಮಾಡಲು ಹೆಚ್ಚಿನ ಪಿಂಚಣಿ ನೀಡುವ 3 ಬಕೆಟ್ ಯೋಜನೆಯನ್ನು ನಾವು ಈ ಪೋಸ್ಟ್‌ನಲ್ಲಿ ತಿಳಿಸುತ್ತೇವೆ. ಈ ಲೇಖನದಲ್ಲಿ, ನಿವೃತ್ತಿಗಾಗಿ 3-ಬಕೆಟ್ ತಂತ್ರ ಏನು ಮತ್ತು ಅದನ್ನು ಪಾಲಿಸುವುದು ಹೇಗೆ ಎಂಬುದನ್ನು ನಾವು ಅರ್ಥಮಾಡಿಕೊಳ್ಳುತ್ತೇವೆ.

ಒತ್ತಡ ರಹಿತ ನಿವೃತ್ತಿಗಾಗಿ ಭವಿಷ್ಯದ ಯೋಜನೆ ಮಾಡಿಕೊಳ್ಲುವುದು ಸ್ಮಾರ್ಟ್ ಆಗಿರುತ್ತದೆ. ಆದ್ದರಿಂದ ನಿಮಗೆ ಸಹಾಯ ಮಾಡಲು 3 ಬಕೆಟ್ ಯೋಜನೆಯನ್ನು ಬಳಸಿಕೊಂಡು ಹೇಗೆ ಉಳಿತಾಯ ಮಾಡಬಹುದು ಎಂದು ನೋಡೋಣ. ಈ ಯೋಜನೆಯೊಂದಿಗೆ ನೀವು ನಿವೃತ್ತಿಗಾಗಿ ಉಳಿಸಬಹುದು. ಇದರರ್ಥ ನಿಮಗೆ ಹಣದ ಅಗತ್ಯವಿರುವಾಗ ನಿಮ್ಮ ಉಳಿತಾಯವನ್ನು ಮೂರು ಬಕೆಟ್‌ಗಳಾಗಿ ವಿಂಗಡಿಸಬಹುದು.

3-ಬಕೆಟ್ ಯೋಜನೆ ಎಂದರೇನು?:

ಒಬ್ಬ ವ್ಯಕ್ತಿಯ ವಯಸ್ಸಿನ ಅನುಗುಣವಾಗಿ, ಕಾಲಕ್ಕೆ ತಕ್ಕಂತೆ ವಿಭಿನ್ನ ನಗದು ಅವಶ್ಯಕತೆ ಇರುತ್ತದೆ. ಅದನ್ನು ಪೂರೈಸುವ ಸಲುವಾಗಿ, ಪ್ರತ್ಯೇಕ ಹೂಡಿಕೆ ಯೋಜನೆಗಳಲ್ಲಿ ಹೂಡಿಕೆ ಮಾಡುವುದನ್ನು 3 ಬಕೆಟ್ ಯೋಜನೆ ಎಂದು ಕರೆಯಲಾಗುತ್ತದೆ. ಆದ್ದರಿಂದ ಇದರ ಮೂಲಕ ಹೂಡಿಕೆ ಮಾಡಿದ ಮೊತ್ತವು ಪ್ರತಿ ಅವಧಿಗೆ ನಿಮಗೆ ಸಹಾಯ ಮಾಡುತ್ತದೆ.

ಅದಕ್ಕಾಗಿ ಮೊದಲು ಈ 3 ಬಕೆಟ್ ಪ್ಲಾನ್ ಬಗ್ಗೆ ತಿಳಿದುಕೊಳ್ಳಬೇಕು. ಇದು ಹೂಡಿಕೆ ವಿಧಾನವಾಗಿದೆ. ಇದರೊಂದಿಗೆ ನೀವು ನಿಮ್ಮ ಪಿಂಚಣಿ ಕಾರ್ಪಸ್ ಅನ್ನು 3 ವರ್ಗಗಳಾಗಿ ವಿಂಗಡಿಸಬಹುದು. ಇದರ ಮೂಲಕ, ನಿಮ್ಮ ಹೂಡಿಕೆಯನ್ನು ನೀವು ತಕ್ಷಣದ ಅಗತ್ಯಗಳಿಗಾಗಿ , ಮಧ್ಯಮ ಅಗತ್ಯಗಳಿಗಾಗಿ ಮತ್ತು ದೀರ್ಘಾವಧಿಯ ಅಗತ್ಯಗಳಿಗಾಗಿ ಹಣ ಎಂದು 3 ವಿಭಾಗಗಳಾಗಿ ವಿಂಗಡಿಸಬಹುದು. ಈ ವಿಧಾನವನ್ನು ಬಳಸಿಕೊಂಡು ಒಬ್ಬರು ತಮ್ಮ ನಿವೃತ್ತಿಯ ದಿನಗಳನ್ನು ಚಿಂತೆಯಿಲ್ಲದೆ ಕಳೆಯಬಹುದು.

ಬಕೆಟ್ ತಂತ್ರವನ್ನು ಮೊದಲು 1980 ರ ದಶಕದಲ್ಲಿ ಅಮೇರಿಕಾದ ಆರ್ಥಿಕ ಸಲಹೆಗಾರರಾದ ಹೆರಾಲ್ಡ್ ಈವೆನ್ಸ್ಕಿ ಸೂಚಿಸಿದರು. ಮೂರು ಬಕೆಟ್‌ಗಳು ಈ ಕೆಳಗಿನವುಗಳನ್ನು ಒಳಗೊಂಡಿವೆ:

ಮೊದಲ ಬಕೆಟ್: (ಲಿಕ್ವಿಡಿಟಿ ಬಕೆಟ್)

ಲಿಕ್ವಿಡಿಟಿ ಬಕೆಟ್ ನಿಯಮಿತ ಮಾಸಿಕ ವೆಚ್ಚಗಳು ಮತ್ತು ವೈದ್ಯಕೀಯ ವೆಚ್ಚಗಳು ಮತ್ತು ತುರ್ತು ಅಗತ್ಯಗಳನ್ನು ಪೂರೈಸುವುದರ ಮೇಲೆ ಕೇಂದ್ರೀಕರಿಸುತ್ತದೆ. ಅಂದರೆ, ಮುಂದಿನ ಎರಡು ಮೂರು ವರ್ಷಗಳಲ್ಲಿ ನಿಮಗೆ ಅಗತ್ಯವಿರುವ ನಗದು ಅಗತ್ಯವನ್ನು ಇದು ಸೂಚಿಸುತ್ತದೆ. ಇದಕ್ಕಾಗಿ ನೀವು ಸ್ಥಿರ ಠೇವಣಿ, ಈಕ್ವಿಟಿ ಫಂಡ್ ಇತ್ಯಾದಿಗಳಲ್ಲಿ ಹೂಡಿಕೆ ಮಾಡಬಹುದು. ಆದರೆ ನೀವು ಠೇವಣಿ ಇಡುವುದು ಅಪಾಯ-ಮುಕ್ತವಾಗಿರುವುದು ಮುಖ್ಯ. ಏಕೆಂದರೆ ಇದು ನಿಮ್ಮ ತಕ್ಷಣದ ಅಗತ್ಯಗಳಿಗಾಗಿ ಬಳಸಲ್ಪಡುತ್ತದೆ ಮತ್ತು ಅವು ಸ್ಥಿರವಾದ ಆದಾಯವನ್ನು ಒದಗಿಸುವಂತಿರಬೇಕು. ಈ ಬಕೆಟ್ ಗೆ ಬೇಕಾದ ಹಣವನ್ನು ಉಳಿತಾಯ ಖಾತೆಯಲ್ಲಿ ನಿರ್ವಹಿಸಬಹುದು.

ನೀವು ಯಾವುದೇ ಮಾಸಿಕ ಆದಾಯ ಅಥವಾ ಇತರ ನಿಯಮಿತ ಆದಾಯವನ್ನು ಪಡೆಯುತ್ತಿದ್ದರೆ, ನೀವು ಅದನ್ನು ಈ ಬಕೆಟ್‌ನಲ್ಲಿ ಸೇರಿಸಿಕೊಳ್ಳಬಹುದು. ನಿಯಮಿತ ಆದಾಯವು ಈಕ್ವಿಟಿಗಳು ಮತ್ತು ಮ್ಯೂಚುವಲ್ ಫಂಡ್‌ಗಳಿಂದ ಲಾಭಾಂಶವನ್ನು ಒಳಗೊಂಡಿರಬಹುದು ಅಥವಾ ರಿಯಲ್ ಎಸ್ಟೇಟ್‌ ನ ಬಾಡಿಗೆ, ಸ್ಥಿರ-ಆದಾಯದ ಬಡ್ಡಿ, REIT ಗಳು ಇತ್ಯಾದಿಗಳು ಆಗಿರಬಹುದು. ಮಾಸಿಕ ವೆಚ್ಚಗಳು ಮತ್ತು ಇತರ ಯಾವುದೇ ಅನಿಶ್ಚಯತೆಗಳಿಗಾಗಿ ನೀವು ಈ ಬಕೆಟ್‌ನಿಂದ ಹಣವನ್ನು ಹಿಂಪಡೆಯಬಹುದು.

ಎರಡನೇ ಬಕೆಟ್:

(ಸುರಕ್ಷತಾ ಬಕೆಟ್) ಅಂದರೆ ಮಧ್ಯಮ ಅವಧಿಯ ಗುರಿಗಳಿಗೆ ಹಣದ ಅಗತ್ಯವಿದೆ. ಇದು ಪ್ರಯಾಣ ಅಥವಾ ನಿಮ್ಮ ಹವ್ಯಾಸವನ್ನು ಅನುಸರಿಸಲು ಯಾವುದಾದರೂ ಆಗಿರಬಹುದು. ಮುಂದಿನ 5 ರಿಂದ 10 ವರ್ಷಗಳ ಖರ್ಚುಗಳಿಗೆ ಈ ಹಣ ಸಾಕಾಗುತ್ತದೆ. ಅದಕ್ಕಾಗಿ ನೀವು ಅಲ್ಪಾವಧಿಯ FD ಗಳು ಮತ್ತು ಬಾಂಡ್‌ಗಳಲ್ಲಿ, 5 ವರ್ಷಗಳ ಅವಧಿಯ ಸರ್ಕಾರಿ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಬಹುದು.

ಈ ಬಕೆಟ್‌ನಲ್ಲಿರುವ ಕೆಲವು ಹಣಕಾಸು ಹೂಡಿಕೆಗಳು ಲಾಕ್-ಇನ್ ಅವಧಿಯನ್ನು ಹೊಂದಿರಬಹುದು. ಹೀಗಿರುವಾಗ ನೀವು ಅವುಗಳನ್ನು ಾವುಗಳ ಅವಧಿ ಮುಕ್ತಾಯದವರೆಗೆ ಹಿಡಿದಿಟ್ಟುಕೊಳ್ಳಬಹುದು ಮತ್ತು ನಿಮ್ಮ ಅಲ್ಪಾವಧಿಯ ನಗದು ಅಗತ್ಯತೆಗಳನ್ನು ಮೊದಲ ಬಕೆಟ್‌ನಿಂದ ಪೂರೈಸಲಾಗುತ್ತಿರುವುದರಿಂದ. ಎರಡನೇ ಬಕೆಟ್ ನಲ್ಲಿ ಹೂಡಿದ ಹೂಡಿಕೆಗಳನ್ನು ಅವಧಿಗೆ ಮೊದಲೇ ಹಿಂಪಡೆದುಕೊಳ್ಳುವ ಯಾವುದೇ ಒತ್ತಡ ನಿಮ್ಮ ಮೇಲಿರುವುದಿಲ್ಲ. ಸುರಕ್ಷತಾ ಬಕೆಟ್‌ ಗೆ ಮೊದಲ ಬಕೆಟ್ ಗೆ ಮರುಪೂರಣಗೊಳಿಸಲು ಬಳಸಬೇಕು.

ಮೂರನೇ ಬಕೆಟ್:

(ಸಂಪತ್ತು ಸೃಷ್ಟಿ ಬಕೆಟ್) ಇದು ದೀರ್ಘಾವಧಿಯ ಉಳಿತಾಯ ಎಂದು ಅರ್ಥ. ಈ ಬಕೆಟ್ ನಿಮ್ಮ ಹಣವನ್ನು ಬೆಳೆಸುವುದರ ಮೇಲೆ ಕೇಂದ್ರೀಕರಿಸುತ್ತದೆ. ಈ ಬಕೆಟ್ ಅನ್ನು ವ್ಯಕ್ತಿಗಳು ತಮ್ಮ ನಿವೃತ್ತಿಯ ನಂತರ ಸ್ಥಿರ ಆದಾಯವನ್ನು ಗಳಿಸಲು ವಿನ್ಯಾಸಗೊಳಿಸಲಾಗಿದೆ. ಇದಕ್ಕಾಗಿ ದೀರ್ಘಾವಧಿಯ ಮ್ಯೂಚುವಲ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡುವುದು ಮುಖ್ಯ. ನೀವು ರಿಯಲ್ ಎಸ್ಟೇಟ್ ಸ್ಮಾರ್ಟ್ ಬೀಟಾ ಫಂಡ್‌ಗಳು, ಚಿನ್ನ ಇತ್ಯಾದಿಗಳಲ್ಲಿ ಹೂಡಿಕೆ ಮಾಡಬಹುದು.

ಪ್ರತಿಯೊಬ್ಬರ ಅಗತ್ಯಗಳು ವಿಭಿನ್ನವಾಗಿವೆ. ಆದ್ದರಿಂದ, 3-ಬಕೆಟ್ ತಂತ್ರವು ಪ್ರತಿಯೊಬ್ಬರ ಅಗತ್ಯಗಳಿಗೆ ಸರಿಹೊಂದುವುದಿಲ್ಲ. ಆದ್ದರಿಂದ, ಒಬ್ಬ ವ್ಯಕ್ತಿಯು 3-ಬಕೆಟ್ ತಂತ್ರವನ್ನು ಕಸ್ಟಮೈಸ್ ಮಾಡಬಹುದು 3-ಬಕೆಟ್ ತಂತ್ರ ಅಥವಾ ಇನ್ನಾವುದೇ ವಿಧಾನವನ್ನು ಅನುಸರಿಸುವಾಗ, ಒಬ್ಬ ವ್ಯಕ್ತಿಯು ಸಾಕಷ್ಟು ಪ್ರಮಾಣದ ಆರೋಗ್ಯ ವಿಮಾ ರಕ್ಷಣೆಯನ್ನು ಖಚಿತಪಡಿಸಿಕೊಳ್ಳಬೇಕು. ಕೆಲವು ವ್ಯಕ್ತಿಗಳು ಮಧುಮೇಹ, ಅಧಿಕ ಬಿಪಿ ಇತ್ಯಾದಿ ಜೀವನಶೈಲಿ ಕಾಯಿಲೆಯಿಂದ ಬಳಲುತ್ತಿರಬಹುದು, ಇದಕ್ಕೆ ನಿಯಮಿತ ವೈದ್ಯರ ಭೇಟಿಗಳು, ರೋಗನಿರ್ಣಯ ಪರೀಕ್ಷೆಗಳು, ಔಷಧಿಗಳು ಇತ್ಯಾದಿಗಳ ಅಗತ್ಯವಿರುತ್ತದೆ. ಅಂತಹ ಸಂದರ್ಭದಲ್ಲಿ, ಒಬ್ಬ ವ್ಯಕ್ತಿಯು ಮೊದಲ ಬಕೆಟ್‌ನಲ್ಲಿ ಈ ವೆಚ್ಚಗಳನ್ನು ಒದಗಿಸಬೇಕು.