ಮದುವೆ ನಂತರ ಮಗಳ ಬೀಳ್ಕೊಡುಗೆಗೆ ಹೆಲಿಕಾಪ್ಟರ್ ಬುಕ್ ಮಾಡಿದ ಕೃಷಿಕ

ಮಗಳ ಆಸೆ ಪೂರೈಸುವ ಸಲುವಾಗಿ ರಾಜಸ್ಥಾನದ ಈ ಕೃಷಿಕ ತಂದೆ ಮಾಡಿದ ಕೆಲಸಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ಕೇಳಿಬರುತ್ತಿದೆ. ಚಿಕ್ಕವಯಸ್ಸಿನಲ್ಲಿ ಮಗಳು ಕೇಳಿದ್ದ ಮಾತನ್ನು ನೆನಪಿನಲ್ಲಿಟ್ಟುಕೊಂಡು, ಆಕೆಯ ಮದುವೆ ದಿನದಂದು ಆ ಆಸೆ ಪೂರೈಸಿದ್ದಾರೆ. ಹೆಲಿಕಾಪ್ಟರ್ ವೊಂದನ್ನು ಬಾಡಿಗೆಗೆ ಪಡೆದು, ಮಗಳನ್ನು ಮಾವನ ಮನೆಗೆ ಕಳುಹಿಸಿದ್ದಾರೆ.

ಆ ಹೆಣ್ಣುಮಗಳ ಹೆಸರು ರೀನಾ. ಆಕೆಯ ತಂದೆ ಹೆಸರು ಮಹೇಂದ್ರ ಸಿಂಗ್. ವೃತ್ತಿಯಿಂದ ಕೃಷಿಕರು. ಝುಂಝುನು ಗ್ರಾಮದಲ್ಲಿ ವಾಸವಿದ್ದಾರೆ. ಅದಕ್ಕೆ ಮುನ್ನ ವಿದೇಶದಲ್ಲಿ ಕೆಲವು ವರ್ಷಗಳ ಕಾಲ ಅವರು ಕೆಲಸ ಮಾಡಿದ್ದರು. "ಅಪ್ಪ, ನೀವು ವಿಮಾನದಲ್ಲಿ ಹೋಗಿಬರ್ತೀರಿ. ಆದರೆ ನಾನು ಯಾವಾಗ ವಿಮಾನದಲ್ಲಿ ಹೋಗುವುದು?" ಎಂದು ಪುಟಾಣಿ ಆಗಾಗ ಕೇಳುತ್ತಿದ್ದಳಂತೆ.

ಮಗಳ ಹಲವು ಆಸೆಗಳನ್ನು ಪೂರೈಸಿದ ತಂದೆಗೆ ಇದೊಂದು ಪೂರ್ಣಗೊಳಿಸಲು ಆಗಿರಲಿಲ್ಲ. ಆದ್ದರಿಂದ ಮದುವೆ ದಿನದಂದು ಗಂಡನ ಮನೆಗೆ ಕಳುಹಿಸುವಾಗ ಆ ಆಸೆ ಪೂರ್ತಿ ಮಾಡಲು ನಿರ್ಧರಿಸಿದ್ದಾರೆ. ಹೆಲಿಕಾಪ್ಟರ್ ಬುಕ್ ಮಾಡಿ, ಅದಕ್ಕೆ ಅಗತ್ಯ ಇರುವ ಎಲ್ಲ ಅನುಮತಿಗಳನ್ನು ಪಡೆದಿದ್ದಾರೆ.

ತಂದೆಯ ಈ ಪ್ರೀತಿಯ ಕೆಲಸದಿಂದ ಹಿಗ್ಗಿದ ರೀನಾ ತನ್ನ ಗೆಳೆಯ- ಗೆಳತಿಯರನ್ನೆಲ್ಲ ಆ ಸಂದರ್ಭದಲ್ಲಿ ಆಹ್ವಾನಿಸಿದ್ದಾರೆ. ಸಾಂಪ್ರಾದಾಯಿಕವಾಗಿ ಬೀಳ್ಕೊಡುಗೆ ಕಾರ್ಯಕ್ರಮ ಪೂರ್ತಿಯಾದ್ ಮೇಲೆ ಅಜೀತ್ ಪುರ್ ನಿಂದ ಹೆಲಿಕಾಪ್ಟರ್ ನಲ್ಲಿ ಹೊರಟ ರೀನಾ ಅವರು ಸುಲ್ತಾನಾದಲ್ಲಿ ಇರುವ ಮಾವನ ಮನೆ ಬಳಿ ಇಳಿದಿದ್ದಾರೆ.