ಮೊದಲ ಜಲ್ಲಿಕಟ್ಟು ಕ್ರೀಡಾಂಗಣ ಉದ್ಘಾಟನೆ, ಇದರ ವಿಶೇಷತೆಗಳೇನು ತಿಳಿಯಿರಿ

ಮಧುರೈ, ಜನವರಿ 24: ಮಾಜಿ ಮುಖ್ಯಮಂತ್ರಿ ಮತ್ತು ಡಿಎಂಕೆ ಮುಖ್ಯಸ್ಥ ಎಂ ಕರುಣಾನಿಧಿ ಅವರ ಹೆಸರಿನಲ್ಲಿ ಹೊಸದಾಗಿ ನಿರ್ಮಿಸಲಾದ ರಾಜ್ಯದ ಮೊದಲ ಜಲ್ಲಿಕಟ್ಟು ಕ್ರೀಡಾಂಗಣವನ್ನು ತಮಿಳುನಾಡು ಮುಖ್ಯಮಂತ್ರಿ ಎಂಕೆ ಸ್ಟಾಲಿನ್ ಬುಧವಾರ ಅನಾವರಣಗೊಳಿಸಿದ್ದಾರೆ.

ಮಧುರೈನಲ್ಲಿ ನೂತನವಾಗಿ ನಿರ್ಮಿಸಲಾಗಿರುವ ಕಲೈಂಜ್ಞರ್ ಶತಮಾನೋತ್ಸವ ಜಲ್ಲಿಕಟ್ಟು ಕ್ರೀಡಾಂಗಣದಲ್ಲಿ ವಿಶೇಷವಾಗಿ ಆಯೋಜಿಸಿದ್ದ ಜಲ್ಲಿಕಟ್ಟು ಕಾರ್ಯಕ್ರಮಕ್ಕೆ ಸಿಎಂ ಸ್ಟಾಲಿನ್ ಚಾಲನೆ ನೀಡಿದರು.

ವಾರ್ಷಿಕವಾಗಿ ಪೊಂಗಲ್ ಸಮಯದಲ್ಲಿ ಜಲ್ಲಿಕಟ್ಟು ನಡೆಸಲು ಹೆಸರುವಾಸಿಯಾಗಿರುವ ಅಲಂಗನಲ್ಲೂರಿನ ಕೀಜಕರೈ ಗ್ರಾಮದಲ್ಲಿ 62.78 ಕೋಟಿ ವೆಚ್ಚದಲ್ಲಿ ಜಲ್ಲಿಕಟ್ಟು ಕ್ರೀಡಾಂಗಣವನ್ನು ನಿರ್ಮಿಸಲಾಗಿದೆ. 83,463 ಚದರ ಅಡಿ ಪ್ರದೇಶದಲ್ಲಿ ನಿರ್ಮಿಸಿರುವ ಜಲ್ಲಿಕಟ್ಟು ಕ್ರೀಡಾಂಗಣವು ಮೂರು ಹಂತದಲ್ಲಿ ಏಕಕಾಲಕ್ಕೆ 5,000 ಪ್ರೇಕ್ಷಕರಿಗೆ ಸೌಕರ್ಯಗಳು, ಪ್ರಮುಖ ಅತಿಥಿಗಳಿಗೆ ಆಸನದ ಸ್ಥಳ ಮತ್ತು ಭಾಗವಹಿಸುವ ಜಲ್ಲಿಕಟ್ಟು ಗೂಳಿಗಳ ಏರಿಕೆಯ ಮಾದರಿಗಳನ್ನು ಪ್ರದರ್ಶಿಸುವ ವಸ್ತುಸಂಗ್ರಹಾಲಯವನ್ನು ಹೊಂದಿದೆ.

ಇದಲ್ಲದೆ, ಕ್ರೀಡಾಂಗಣವು ಶ್ರವಣ-ದೃಶ್ಯ ಗ್ಯಾಲರಿ, ಪಶುವೈದ್ಯಕೀಯ ಔಷಧಾಲಯ, ಗ್ರಂಥಾಲಯ, ಬುಲ್ ಪಳಗಿಸುವವರಿಗೆ ವಿಶ್ರಾಂತಿ ಪ್ರದೇಶ ಮತ್ತು ಹುಲ್ಲುಹಾಸುಗಳೊಂದಿಗೆ ಉದ್ಯಾನವನ್ನು ಹೊಂದಿದೆ. ಪೊಂಗಲ್ ಹಬ್ಬದಂದು ವರ್ಷಗಳಿಂದ ಸಾಂಪ್ರದಾಯಿಕ ಗೂಳಿ ಪಳಗಿಸುವ ಕ್ರೀಡೆಯನ್ನು ಆಯೋಜಿಸಿದ್ದ ರೈತರು ಮತ್ತು ಗ್ರಾಮಸ್ಥರ ಸಹಯೋಗದಲ್ಲಿ ಇದನ್ನು ನಿರ್ಮಿಸಲಾಗಿದೆ.

ಹೊಸ ಜಲ್ಲಿಕಟ್ಟು ಅಖಾಡವು ತಮಿಳುನಾಡಿನ ಪ್ರವಾಸೋದ್ಯಮ ಅಭಿವೃದ್ಧಿಗೆ ಸಹಕಾರಿಯಾಗಲಿದೆ ಎಂದು ರಾಜ್ಯ ಸರ್ಕಾರ ತಿಳಿಸಿದೆ. ಜಲ್ಲಿಕಟ್ಟು ಕಾರ್ಯಕ್ರಮಗಳ ಜತೆಗೆ ನಿತ್ಯವೂ ಸ್ಪರ್ಧೆ ನಡೆಸಲು ಜಿಲ್ಲಾಡಳಿತ ಹಾಗೂ ಕ್ರೀಡಾ ಇಲಾಖೆ ಮುಂದಾಗಿದೆ. ಈ ಬೃಹತ್ ಕ್ರೀಡಾಂಗಣವು ಅಲಂಕಾನಲ್ಲೂರು ಸಮೀಪದ ಬೆಟ್ಟದ ತಪ್ಪಲಿನಲ್ಲಿರುವ ರಮಣೀಯ ಪ್ರದೇಶದಲ್ಲಿ ಜಲ್ಲಿಕಟ್ಟು ಆಟಗಾರರನ್ನು ಮತ್ತು ಪ್ರೇಕ್ಷಕರನ್ನು ಆಕರ್ಷಿಸುತ್ತದೆ.