ಫ್ಲಿಪ್ ಕಾರ್ಟ್ ನಿಂದ ನೋಕಿಯಾ ಸ್ಮಾರ್ಟ್ ಟಿವಿ ಬಿಡುಗಡೆ

ಫ್ಲಿಪ್ ಕಾರ್ಟ್ ನಿಂದ ಗುರುವಾರ ನೋಕಿಯಾ ಸ್ಮಾರ್ಟ್ ಟಿವಿ ಬಿಡುಗಡೆ ಮಾಡಲಾಗಿದೆ. ಸದ್ಯಕ್ಕೆ ನೋಕಿಯಾದಿಂದ 55 ಇಂಚಿನ ಟಿವಿ ಮಾತ್ರ ತಯಾರಿಸಿದ್ದು, ಬೆಲೆ 41,999 ರುಪಾಯಿ ನಿಗದಿ ಮಾಡಲಾಗಿದೆ. ಡಿಸೆಂಬರ್ ಹತ್ತನೇ ತಾರೀಕಿನಿಂದ ಫ್ಲಿಪ್ ಕಾರ್ಟ್ ನಲ್ಲಿ ಖರೀದಿಗೆ ಲಭ್ಯವಾಗಲಿದೆ.

ನೋಕಿಯಾ ಸ್ಮಾರ್ಟ್ ಟಿವಿಯ ಅಕೌಸ್ಟಿಕ್ಸ್ ಅನ್ನು ಜೆಬಿಎಲ್ ರೂಪಿಸಿದೆ. ಆದ್ದರಿಂದ ಧ್ವನಿಯ ಗುಣಮಟ್ಟ ಅತ್ಯುತ್ತಮವಾಗಿರುತ್ತದೆ ಎನ್ನಲಾಗಿದೆ. ಜೆಬಿಎಲ್ ಇದೇ ಮೊದಲ ಬಾರಿಗೆ ಭಾರತದಲ್ಲಿ ಟಿವಿಯೊಂದರಲ್ಲಿ ಆಡಿಯೋ ವ್ಯವಸ್ಥೆ ಒದಗಿಸಿದೆ ಎಂಬುದು ಇಲ್ಲಿ ಗಮನಿಸಬೇಕಾದ ಅಂಶ.

ಟಿವಿಯಲ್ಲಿ ಇಪ್ಪತ್ನಾಲ್ಕು ವ್ಯಾಟ್ ನ ಬಿಲ್ಟ್ ಇನ್ ಸ್ಪೀಕರ್ ಗಳಿವೆ. ಡಿಟಿಎಸ್ ಟ್ರೂ ಸರೌಂಡ್ ಮತ್ತು ಡಾಲ್ಬಿ ಆಡಿಯೋ ಮೂಲಕ ಒಟ್ಟಾರೆ ಹೊಸ ಆಡಿಯೋ ಅನುಭವವನ್ನು ನೀಡುತ್ತದೆ. ಅಂದ ಹಾಗೆ ಫ್ಲಿಪ್ ಕಾರ್ಟ್ ನಿಂದ ಆರಂಭಿಕ ಕೊಡುಗೆಯಾಗಿ ನೋಕಿಯಾ ಬ್ರ್ಯಾಂಡೆಡ್ ಸ್ಮಾರ್ಟ್ ಟಿವಿಗೆ ಸಂಪೂರ್ಣ ಪ್ರೊಟೆಕ್ಷನ್ ಒದಗಿಸಲಿದ್ದು, ಅದಕ್ಕಾಗಿ 999 ರುಪಾಯಿ ಪಾವತಿಸಬೇಕು.

ಇಷ್ಟು ಮೊತ್ತ ಪಾವತಿಸಿದರೆ ಮೂರು ವರ್ಷದ ಅವಧಿಗೆ ಉತ್ಪಾದನೆ ಲೋಪ- ದೋಷಗಳು, ಆಕ್ಸಿಡೆಂಟಲ್ ಡ್ಯಾಮೇಜ್ ಕವರ್ ಆಗುತ್ತದೆ. ಜತೆಗೆ ಮೂರು ವರ್ಷದ ಕೊನೆಗೆ ಬೈ ಬ್ಯಾಕ್ ಮೌಲ್ಯದ ಖಾತ್ರಿ ನೀಡಲಾಗುತ್ತದೆ. ಆಂಡ್ರಾಯಿಡ್ ಆಪರೇಟಿಂಗ್ ಸಿಸ್ಟಮ್ ಜತೆ ಟಿವಿ ಬರಲಿದೆ.