ಪೆಟ್ರೋಲ್- ಡೀಸೆಲ್ ಮೇಲೆ ಮತ್ತೊಂದು ಸುತ್ತು ಸುಂಕ ಹೇರಬಹುದಂತೆ ಕೇಂದ್ರ

ಕಚ್ಚಾ ತೈಲ ಬೆಲೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರೀ ಪ್ರಮಾಣದಲ್ಲಿ ಕುಸಿದಿದೆಯಲ್ಲಾ, ಇದೇ ಸಂದರ್ಭವನ್ನು ಬಳಸಿಕೊಂಡು ಪೆಟ್ರೋಲ್ ಮತ್ತು ಡೀಸೆಲ್ ಅಬಕಾರಿ ಸುಂಕವನ್ನು ಹೆಚ್ಚಳ ಮಾಡಬಹುದು ಎಂಬ ಸುದ್ದಿ ಚಾಲ್ತಿಯಲ್ಲಿದೆ. ಕಂದ್ರ ಬಜೆಟ್ ನಲ್ಲಿ ಖೋತಾ ಸರಿದೂಗಿಸಲು ಮತ್ತು ಕೊರೊನಾದಿಂದ ಎದ್ದಿರುವ ಸಮಸ್ಯೆಗೆ ಹೆಚ್ಚುವರಿ ಖರ್ಚು ನಿಭಾಯಿಸುವುದಕ್ಕೆ ಈ ಹಣ ಬಳಸಬಹುದು ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ತನ್ನ ವರದಿಯಲ್ಲಿ ಹೇಳಿದೆ.

ಒಂದು ಬ್ಯಾರೆಲ್ ಕಚ್ಚಾ ತೈಲ ಬೆಲೆ $ 30ಕ್ಕೆ ಇಳಿದಲ್ಲಿ ಈಗಿರುವುದಕ್ಕಿಂತ ಪೆಟ್ರೋಲ್- ಡೀಸೆಲ್ ಬೆಲೆಯನ್ನು ಲೀಟರ್ ಗೆ 10-12 ರುಪಾಯಿ ಇಳಿಸಬಹುದು. ಆದರೆ ಅಬಕಾರಿ ಸುಂಕದ ದರ ಈ ಹಿಂದೆ ಇದ್ದ ಪ್ರಮಾಣದಲ್ಲೇ ಇರಬೇಕು. ಆದರೆ ಸರ್ಕಾರದ ಕಡೆಯಿಂದ ದರ ಇಳಿಕೆಗೆ ಮಿತಿ ಹಾಕಬಹುದು. ಪೆಟ್ರೋಲ್- ಡೀಸೆಲ್ ಮೇಲೆ ಮತ್ತೆ ಅಬಕಾರಿ ಸುಂಕ ಏರಿಸಬಹುದು.

ಕೇಂದ್ರ ಸರ್ಕಾರವು ಕಳೆದ ಶನಿವಾರವಷ್ಟೇ ಪೆಟ್ರೋಲ್- ಡೀಸೆಲ್ ಮೇಲಿನ ಅಬಕಾರಿ ಸುಂಕವನ್ನು ಲೀಟರ್ ಗೆ 3 ರುಪಾಯಿಯಂತೆ ಏರಿಕೆ ಮಾಡಿತ್ತು. ಇದರಿಂದ ಸರ್ಕಾರಕ್ಕೆ ಒಂದು ವರ್ಷದಲ್ಲಿ ಹೆಚ್ಚುವರಿಯಾಗಿ 45 ಸಾವಿರ ಕೋಟಿ ರುಪಾಯಿ ಆದಾಯ ಹೆಚ್ಚಾಗಲಿದೆ.

"ಪೆಟ್ರೋಲ್ - ಡೀಸೆಲ್ ಮೇಲಿನ ಅಬಕಾರಿ ಸುಂಕವನ್ನು 3 ರುಪಾಯಿಯಷ್ಟನ್ನು ಕೇಂದ್ರ ಸರ್ಕಾರ ಏರಿಸಿದೆ. ಆ ಕಾರಣಕ್ಕೆ ಪೆಟ್ರೋಲ್ ಸದ್ಯದ ಬೆಲೆಯಿಂದ ಗರಿಷ್ಠ 4.25, ಡೀಸೆಲ್ 3.75 ರುಪಾಯಿ ಇಳಿಕೆ ಆಗಬಹುದು. ಆದ್ದರಿಂದ ಸುಂಕವನ್ನು ಮತ್ತಷ್ಟು ಹೆಚ್ಚಿಸುವ ಮೂಲಕ ರೀಟೇಲ್ ದರ ಇಳಿಕೆಗೆ ಮಿತಿ ಹಾಕಬಹುದು" ಎಂದು ವರದಿಯಲ್ಲಿ ಹೇಳಲಾಗಿದೆ.