ಬೆಟ್ಟಿಂಗ್ ಮತ್ತು ಆನ್‌ಲೈನ್ ಗೇಮಿಂಗ್‌ಗೆ ಕಡಿವಾಣ ಹಾಕಲು ಕಾನೂನು ತರಲು ಮುಂದಾದ ಸರ್ಕಾರ

ರಾಜ್ಯದಲ್ಲಿ ಬೆಟ್ಟಿಂಗ್ ನಿಯಂತ್ರಿಸಲು ಮತ್ತು ಆನ್‌ಲೈನ್ ಜೂಜಿನ ಆ್ಯಪ್‌ಗಳಿಗೆ ಕಡಿವಾಣ ಹಾಕಲು ಕಾನೂನು ರೂಪಿಸಲು ಸಾಧ್ಯವಿರುವ ಎಲ್ಲ ಮಾರ್ಗಗಳನ್ನು ಸರ್ಕಾರ ಅನ್ವೇಷಿಸಲಿದೆ ಎಂದು ಗೃಹ ಸಚಿವ ಡಾ.ಜಿ.ಪರಮೇಶ್ವರ ಮಂಗಳವಾರ ಹೇಳಿದ್ದಾರೆ.

ಪರಮೇಶ್ವರ ಅವರು ತಮ್ಮ ಜಿಲ್ಲೆಗಳನ್ನು 'ಡ್ರಗ್ಸ್ ಮುಕ್ತ' ಜಿಲ್ಲೆಗಳೆಂದು ಘೋಷಿಸಲು ಎಸ್‌ಪಿಗಳಿಗೆ ಸೂಚಿಸಲಾಗುವುದು ಎಂದು ಹೇಳಿದರು. ವಿಧಾನಸಭೆಯಲ್ಲಿ ನಡೆದ ಚರ್ಚೆಯಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ರಾಜ್ಯದಲ್ಲಿ ಕ್ರಿಕೆಟ್ ಬೆಟ್ಟಿಂಗ್ ಕುಟುಂಬಗಳನ್ನು ಹಾಳು ಮಾಡುತ್ತಿದೆ ಎಂದರು.

ಬೆಟ್ಟಿಂಗ್‌ಗಳು ಕುಟುಂಬವನ್ನೇ ಹಾಳು ಮಾಡುತ್ತಿದೆ. ಇಂತಹ ಚಟುವಟಿಕೆಗಳಲ್ಲಿ (ಬೆಟ್ಟಿಂಗ್, ಜೂಜಾಟ ಅಥವಾ ಮಾದಕ ದ್ರವ್ಯ ಸೇವನೆ) ತೊಡಗದಂತೆ ಯುವಜನರನ್ನು ನಿರುತ್ಸಾಹಗೊಳಿಸುವುದರ ಮೂಲಕ ರಾಜ್ಯವು ತನ್ನ ಯುವಕರನ್ನು ರಕ್ಷಿಸಲು ಬದ್ಧವಾಗಿದೆ ಎಂದು ಪರಮೇಶ್ವರ ಹೇಳಿದರು.

"ರಾಜ್ಯವು ಮಾತ್ರ ಬೆಟ್ಟಿಂಗ್ ಅಥವಾ ಆನ್‌ಲೈನ್ ಗೇಮಿಂಗ್ ಅನ್ನು ನಿಷೇಧಿಸಲು ಸಾಧ್ಯವಿಲ್ಲ. ಹೆಚ್ಚಿನ ಆನ್‌ಲೈನ್ ಆಟಗಳನ್ನು ದೇಶ ಮತ್ತು ಪ್ರಪಂಚದ ವಿವಿಧ ಭಾಗಗಳಿಂದ ನಿರ್ವಹಿಸಲಾಗುವುದರಿಂದ ಕೇಂದ್ರದ ಬಲವಾದ ಬೆಂಬಲದ ಅಗತ್ಯವಿದೆ. ಆದ್ದರಿಂದ, ನಮಗೆ ಸಮಗ್ರ ನೀತಿಯ ಅಗತ್ಯವಿದೆ ಮತ್ತು ಅದನ್ನು ಕೇಂದ್ರದಿಂದ ಪ್ರಾರಂಭಿಸಬೇಕು," ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಮಧ್ಯಪ್ರವೇಶಿಸಿದ ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ, ರಿಯಲ್ ಮನಿ ಗೇಮಿಂಗ್ ಕ್ಷೇತ್ರವು ದೇಶದಲ್ಲಿ 1.6 ಲಕ್ಷ ಕೋಟಿ ರೂಪಾಯಿ ಮೌಲ್ಯದ ಉದ್ಯಮವಾಗಿದೆ ಎಂದು ಅಂದಾಜಿಸಲಾಗಿದೆ ಮತ್ತು 2024-28 ರ ಕೇಂದ್ರ ಸರ್ಕಾರದ ಯೋಜಿತ ಅಂದಾಜಿನ ಪ್ರಕಾರ, ಟಿಡಿಎಸ್ ವಾರ್ಷಿಕ 7,000 ಕೋಟಿ ರೂಪಾಯಿ ಮಾತ್ರ ನಿಗದಿಪಡಿಸಲಾಗಿದೆ. ಜಿಎಸ್‌ಟಿ ಸಂಗ್ರಹವು 74,000 ಕೋಟಿ ರೂಪಾಯಿ ಆಗಿದೆ ಎಂದು ಹೇಳಿದರು.

"ಆದ್ದರಿಂದ, ಕೇಂದ್ರ ಸರ್ಕಾರವು ರಾಜ್ಯಗಳೊಂದಿಗೆ ಸಮಾಲೋಚಿಸಿ ನೀತಿಯನ್ನು ರೂಪಿಸಲು ಮುಂದೆ ಬರದಿದ್ದರೆ, ದೊಡ್ಡ ಸಮಸ್ಯೆಯನ್ನು ಪರಿಹರಿಸಲಾಗುವುದಿಲ್ಲ," ಎಂದು ಅವರು ಹೇಳಿದರು. "ಇಂತಹ ಆಟಗಳು ದೇಶದೊಳಗೆ ನಡೆಯುತ್ತಿಲ್ಲ ಆದರೆ ಚೀನಾ ಮತ್ತು ಪ್ರಪಂಚದ ಇತರ ಭಾಗಗಳಿಂದ ನಡೆಸಲ್ಪಡುತ್ತವೆ. ಆದ್ದರಿಂದ, ಈ ಸಮಸ್ಯೆಯನ್ನು ನಿಭಾಯಿಸಲು ನಾವು ಕೇಂದ್ರದ ಬೆಂಬಲವನ್ನು ಹೊಂದಿರಬೇಕು," ಎಂದು ವಾದಿಸಿದರು.

ಡ್ರಗ್ಸ್ ಹಾವಳಿ ತಡೆಗೆ ಸಂಬಂಧಿಸಿದಂತೆ ಮಾತನಾಡಿದ ಪರಮೇಶ್ವರ, ಕಾಲಮಿತಿಯಲ್ಲಿ ರಾಜ್ಯವನ್ನು ಡ್ರಗ್ಸ್ ಮುಕ್ತ ರಾಜ್ಯವನ್ನಾಗಿ ಮಾಡಲು ಸರ್ಕಾರ ಬದ್ಧವಾಗಿದೆ ಎಂದು ಹೇಳಿದರು. "ನಾವು ಯಾವುದೇ ಗಡುವನ್ನು ನಿಗದಿಪಡಿಸದಿದ್ದರೂ, ನಾವು ಬಹುಶಃ ಅದನ್ನು ಒಂದು ವರ್ಷದ ಅವಧಿಯಲ್ಲಿ ಸಾಧಿಸುತ್ತೇವೆ," ಎಂದು ಹೇಳಿದರು.