Siddhartha Mohanty: ಎಲ್‌ಐಸಿ ಸಿಇಒ ಆಗಿ ಸಿದ್ಧಾರ್ಥ್ ಮೊಹಾಂತಿ ನೇಮಕ

ಭಾರತ ಸರ್ಕಾರವು ಶುಕ್ರವಾರದಂದು ಸಿದ್ಧಾರ್ಥ್ ಮೊಹಾಂತಿರನ್ನು ಮುಂದಿನ ವರ್ಷದ ಜೂನ್‌ವರೆಗೆ ಭಾರತೀಯ ಜೀವ ವಿಮಾ ನಿಗಮದ ಅಧ್ಯಕ್ಷರನ್ನಾಗಿ ಮತ್ತು ಅದರ ನಂತರ ಕನಿಷ್ಠ ಒಂದು ವರ್ಷದವರೆಗೆ ಮುಖ್ಯ ಕಾರ್ಯನಿರ್ವಾಹಕರಾಗಿ (ಸಿಇಒ) ನೇಮಕ ಮಾಡಿದೆ. ಎಲ್‌ಐಸಿಯ ನಾಲ್ವರು ವ್ಯವಸ್ಥಾಪಕ ನಿರ್ದೇಶಕರಲ್ಲಿ ಮೊಹಾಂತಿ ಕೂಡಾ ಒಬ್ಬರಾಗಿದ್ದಾರೆ.

ಸಿದ್ಧಾರ್ಥ್ ಮೊಹಾಂತಿರನ್ನು ಈಗಾಗಲೇ ಮಾರ್ಚ್‌ನಲ್ಲಿ ಮೂರು ತಿಂಗಳ ಕಾಲ ಅಧ್ಯಕ್ಷರಾಗಿ ನೇಮಕ ಮಾಡಲಾಗಿತ್ತು. ಈಗ ಅವರನ್ನು ಅಧ್ಯಕ್ಷರಾಗಿ ಮತ್ತು ಸಿಇಒ ಆಗಿ ನೇಮಿಸಲಾಗಿದೆ. ಸರ್ಕಾರಿ ಸ್ವಾಯತ್ತ ಹಣಕಾಸು ಸಂಸ್ಥೆಗಳ ಉನ್ನತ ವ್ಯವಸ್ಥಾಪಕರು ಮತ್ತು ಸಾಲದಾತರನ್ನು ಆಯ್ಕೆ ಮಾಡುವ ಕಾರ್ಯವನ್ನು ನಿರ್ವಹಿಸುವ ಸಂಸ್ಥೆಯಾದ ಎಫ್‌ಎಸ್‌ಐಬಿ ಈ ಆಯ್ಕೆಯನ್ನು ಮಾಡಿದೆ.

ಎಫ್‌ಎಸ್‌ಐಬಿ ನಾಲ್ವರು ವ್ಯವಸ್ಥಾಪಕ ನಿರ್ದೇಶಕರಲ್ಲಿ ಒಬ್ಬರಾದ ಸಿದ್ಧಾರ್ಥ ಮೊಹಾಂತಿ ಅವರನ್ನು ಭಾರತದ ಅತೀ ದೊಡ್ಡ ವಿಮಾ ಸಂಸ್ಥೆಯಾದ ಎಲ್‌ಐಸಿಯ ಮುಂದಿನ ಅಧ್ಯಕ್ಷರನ್ನಾಗಿ ಶಿಫಾರಸು ಮಾಡಿದೆ. ಈ ಉನ್ನತ ಹುದ್ದೆಗಾಗಿ ಒಟ್ಟು ನಾಲ್ಕು ಅಭ್ಯರ್ಥಿಗಳ ಹೆಸರು ಕೇಳಿ ಬಂದಿತ್ತು. ನಾಲ್ವರ ಬಗ್ಗೆ ಪರಿಶೀಲನೆ ಮಾಡಿದ ಬಳಿಕ ಹಣಕಾಸು ಸೇವೆಗಳ ಸಂಸ್ಥೆಗಳ ಬ್ಯೂರೋ (ಎಫ್‌ಎಸ್‌ಐಬಿ) ಈ ಶಿಫಾರಸು ಮಾಡಿದೆ.

ಸಿದ್ಧಾರ್ಥ್ ಮೊಹಾಂತಿ ಯಾರು ತಿಳಿಯಿರಿ

ಫೆಬ್ರವರಿ 2021 ರಲ್ಲಿ, ಸಿದ್ಧಾರ್ಥ್ ಮೊಹಾಂತಿ ವ್ಯವಸ್ಥಾಪಕ ನಿರ್ದೇಶಕರಾದರು. ಮೊಹಾಂತಿ 1985 ರಲ್ಲಿ ನೇರ ನೇಮಕಾತಿ ಅಧಿಕಾರಿಯಾಗಿ ಎಲ್‌ಐಸಿಯಲ್ಲಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ವಿವಿಧ ವಿಭಾಗಗಳಲ್ಲಿ ಅನುಭವವನ್ನು ಹೊಂದಿದ್ದಾರೆ. ಮಾರ್ಕೆಟಿಂಗ್, ಮಾನವ ಸಂಪನ್ಮೂಲ, ಹೂಡಿಕೆಗಳು, ಕಾನೂನು ಮತ್ತು ಸಿಬ್ಬಂದಿ ಎಲ್ಲ ವಲಯದಲ್ಲಿ ಕಾರ್ಯನಿರ್ವಹಣೆ ಮಾಡಿದ್ದಾರೆ. ಎಲ್‌ಐಸಿಯ ಎಂಡಿಯಾಗಿ ಅಧಿಕಾರ ವಹಿಸಿಕೊಳ್ಳುವ ಮೊದಲು ಅವರು ಎಲ್‌ಐಸಿ ಹೌಸಿಂಗ್ ಫೈನಾನ್ಸ್‌ನ ಎಂಡಿ ಮತ್ತು ಸಿಇಒ ಆಗಿದ್ದರು.

ಭಾರತೀಯ ಜೀವ ವಿಮಾ ನಿಗಮದ ಮೂರನೇ ತ್ರೈಮಾಸಿಕದ ಆದಾಯವು ವರ್ಷದಿಂದ ವರ್ಷಕ್ಕೆ ಶೇಕಡ 14.6ರಷ್ಟು ಏರಿಕೆಯಾಗಿದೆ, 1.12 ಲಕ್ಷ ಕೋಟಿ ರೂಪಾಯಿಗೆ ತಲುಪಿದೆ. ಸಿಂಗಲ್ ಪ್ರೀಮಿಯಂನಲ್ಲಿ ಶೇಕಡ 31.2ರಷ್ಟು ಏರಿಕೆಯಾಗಿದೆ. ಮೊದಲ ವರ್ಷ ಪ್ರೀಮಿಯಂನಲ್ಲಿ ಶೇಕಡ 10.8ರಷ್ಟು ಏರಿಕೆ ಕಂಡು ಬಂದಿದೆ. ರಿನಿವೇಬಲ್ ಪ್ರೀಮಿಯಂನಲ್ಲಿ ಶೇಕಡ 5.9ರಷ್ಟು ಏರಿಕೆಯಾಗಿದೆ.

ಇನ್ನು ಇತ್ತೀಚೆಗೆ ನಾಲ್ಕನೇ ತ್ರೈಮಾಸಿಕದ ನಿವ್ವಳ ಆದಾಯವನ್ನು ಇನ್ಫೋಸಿಸ್ ಘೋಷಣೆ ಮಾಡಿದ ಬೆನ್ನಲ್ಲೇ ಷೇರು ಮಾರುಕಟ್ಟೆಯಲ್ಲಿ ಇನ್ಫೋಸಿಸ್ ಭಾರೀ ನಷ್ಟವನ್ನು ಕಂಡಿದೆ. ಇನ್ಫೋಸಿಸ್ ಷೇರು ಕುಸಿತವಾದ ಬಳಿಕ ಪ್ರಮುಖ ಷೇರುದಾರರು ಆದ ಭಾರತೀಯ ಜೀವ ವಿಮಾ ನಿಗಮ (ಎಲ್‌ಐಸಿ) ಷೇರು ಮಾರುಕಟ್ಟೆಯಲ್ಲಿ ಕೆಲವೇ ಸೆಕೆಂಡುಗಳಲ್ಲಿ ಭಾರೀ ಪ್ರಮಾಣದ ಮೊತ್ತವನ್ನು ಕಳೆದುಕೊಂಡಿದೆ.

ಐಟಿ ಸಂಸ್ಥೆ ಇನ್ಫೋಸಿಸ್‌ನಲ್ಲಿ ಒಟ್ಟು 28,13,85,267 ಷೇರುಗಳನ್ನು ಅಥವಾ ಶೇಕಡ 7.71ರಷ್ಟು ಷೇರುಗಳನ್ನು ಎಲ್‌ಐಸಿ ಹೊಂದಿದೆ. ಗುರುವಾರ ವಹಿವಾಟಿನ ಅಂತ್ಯದಲ್ಲಿ ಎಲ್‌ಐಸಿಯು ಇನ್ಫೋಸಿಸ್‌ನ 39,073 ಕೋಟಿ ರೂಪಾಯಿ ಮೌಲ್ಯದ ಷೇರನ್ನು ಹೊಂದಿದ್ದು, ಸೋಮವಾರ ಆರಂಭಿಕ ವಹಿವಾಟಿನಲ್ಲಿ ಇನ್ಪೋಸಿಸ್ ಷೇರು ದಿಡೀರನ್ನೇ ಶೇಕಡ 10ರಷ್ಟು ಕುಸಿತ ಕಂಡಿದೆ. ಒಟ್ಟು ಮೌಲ್ಯವು ಸೆಕೆಂಡುಗಳಲ್ಲಿ 3,907 ಕೋಟಿ ರೂಪಾಯಿ ಇಳಿಕೆ ಕಂಡು, 35,166 ಕೋಟಿ ರೂಪಾಯಿಗೆ ತಲುಪಿದೆ.