ರಾಜ್ಯಗಳಿಗೆ ಜಿಎಸ್ ಟಿ ಪರಿಹಾರ ಪಾವತಿ ಸಾಧ್ಯ ಆಗದಿರಬಹುದು ಎಂದ ಕೇಂದ್ರ

ರಾಜ್ಯಗಳಿಗೆ ಪಾವತಿ ಮಾಡಬೇಕಿರುವ ಸರಕು ಮತ್ತು ಸೇವಾ ತೆರಿಗೆ (GST) ಪರಿಹಾರವನ್ನು ನೀಡಲು ಸಾಧ್ಯ ಆಗದಿರಬಹುದು ಎಂದು ಕೇಂದ್ರ ಸರ್ಕಾರವು ಸಂಸದೀಯ ಸಮಿತಿಗೆ ಹೇಳಿದೆ. ಹಣಕಾಸು ಸ್ಥಾಯಿ ಸಮಿತಿಯಲ್ಲಿ ಇರುವ ವಿರೋಧ ಪಕ್ಷದ ಸದಸ್ಯರು ಜುಲೈ 28ನೇ ತಾರೀಕಿನಂದು ಸಭೆಯಲ್ಲಿ ರಾಜ್ಯಗಳಿಗೆ ಪಾವತಿ ಮಾಡಬೇಕಿರುವ ಜಿಎಸ್ ಟಿ ಪರಿಹಾರದ ಬಗ್ಗೆ ಧ್ವನಿ ಎತ್ತಿದರು ಎಂದು ಎಕನಾಮಿಕ್ ಟೈಮ್ಸ್ ವರದಿ ಮಾಡಿದೆ.

ಹಣಕಾಸು ಅಜಯ್ ಭೂಷಣ್ ಪಾಂಡೆ, ಕಾರ್ಖಾನೆ ಮತ್ತು ಆಂತರಿಕ ವ್ಯವಹಾರಗಳ ಉತ್ತೇಜನ ಇಲಾಖೆ (DPIIT) ಕಾರ್ಯದರ್ಶಿ ಗುರುಪ್ರಸಾದ್ ಮೋಹಪಾತ್ರ ಮತ್ತಿತರರು ಈ ಸಭೆಯಲ್ಲಿ ಭಾಗವಹಿಸಿದ್ದರು ಎಂದು ವರದಿ ಆಗಿದೆ. ಈ ಸಮಿತಿಯ ಸಭೆಯಲ್ಲಿ ಭಾರತದ ಅಭಿವೃದ್ಧಿ ಆಗುತ್ತಿರುವ ಕಂಪೆನಿಗಳು ಹಾಗೂ ಆವಿಷ್ಕಾರಗಳಿಗೆ ಹಣಕಾಸು ನೆರವು ನೀಡುವ ಬಗ್ಗೆ ಚರ್ಚೆ ನಡೆದಿದೆ.

ಮುಂಬರುವ ದಿನಗಳಲ್ಲಿ ರಾಜ್ಯಗಳಿಗೆ ನೀಡಬೇಕಾಗಿರುವ ಜಿಎಸ್ ಟಿ ಪರಿಹಾರವನ್ನು ಪೂರ್ತಿಯಾಗಿ ಪಾವತಿಸಲು ಕೇಂದ್ರಕ್ಕೆ ಸಾಧ್ಯವಾಗದಿರಬಹುದು. ಕೊರೊನಾ ಬಿಕ್ಕಟ್ಟಿನಿಂದ ಆರ್ಥಿಕ ಚಟುವಟಿಕೆಗಳಿಗೆ ಹಿನ್ನಡೆ ಆಗಿದೆ ಎಂದು ಸರ್ಕಾರದಿಂದ ಹೇಳಿರುವುದಾಗಿ ವರದಿ ಆಗಿದೆ. ಕೊರೊನಾದ ಕಾರಣಕ್ಕೇ ಜಿಎಸ್ ಟಿ ಸಂಗ್ರಹದಲ್ಲೂ ಇಳಿಕೆ ಆಗಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

2019- 20ನೇ ಸಾಲಿಗೆ ಕೇಂದ್ರ ಸರ್ಕಾರವು 1.65 ಲಕ್ಷ ಕೋಟಿ ರುಪಾಯಿಯನ್ನು ಜಿಎಸ್ ಟಿ ಪರಿಹಾರವಾಗಿ ಪಾವತಿಸಿದೆ ಎಂದು ಹಣಕಾಸು ಸಚಿವಾಲಯ ಜುಲೈ 27ರಂದು ತಿಳಿಸಿದೆ. ಹಣಕಾಸು ವರ್ಷಕ್ಕೆ ಒಟ್ಟು ಸೆಸ್ ಸಂಗ್ರಹ 95,444 ಕೋಟಿ ರುಪಾಯಿ ಆಗಿದೆ. ಸರ್ಕಾರವು 2020ರ ಏಪ್ರಿಲ್ ನಿಂದ ಜೂನ್ ವರೆಗೆ 1.85 ಲಕ್ಷ ಕೋಟಿ ಜಿಎಸ್ ಟಿ ಸಂಗ್ರಹಿಸಿದೆ. ಈ ಹಿಂದಿನ ವರ್ಷ ಇದೇ ಅವಧಿಗೆ 3.14 ಲಕ್ಷ ಕೋಟಿ ಸಂಗ್ರಹ ಆಗಿತ್ತು.