80 ಸಾವಿರ ಸಿಬ್ಬಂದಿಗೆ 8% ತನಕ ವೇತನ ಹೆಚ್ಚಳ ಮಾಡುತ್ತದಂತೆ ಐಸಿಐಸಿಐ ಬ್ಯಾಂಕ್

ದೇಶದ ಎರಡನೇ ಅತಿ ದೊಡ್ಡ ಖಾಸಗಿ ಬ್ಯಾಂಕ್ ಆದ ಐಸಿಐಸಿಐ ಬ್ಯಾಂಕ್ ಮುಂಚೂಣಿಯಲ್ಲಿ ಕೆಲಸ ಮಾಡುವ 80 ಸಾವಿರ ಸಿಬ್ಬಂದಿಗೆ 8 ಪರ್ಸೆಂಟ್ ತನಕ ವೇತನ ಹೆಚ್ಚಳ ಮಾಡುವುದಕ್ಕೆ ನಿರ್ಧಾರ ಮಾಡಿದೆ ಎಂದು ಮೂಲಗಳು ಮಂಗಳವಾರ ತಿಳಿಸಿವೆ. ಬ್ಯಾಂಕ್ ನಲ್ಲಿ ಕೆಲಸ ಮಾಡುವ ಒಟ್ಟು ಸಿಬ್ಬಂದಿ ಸಂಖ್ಯೆಯ ಪೈಕಿ ಮುಂಚೂಣಿಯಲ್ಲಿ ಕೆಲಸ ಮಾಡುವವರ ಪ್ರಮಾಣ ಶೇಕಡಾ 80ರಷ್ಟಿದೆ.

ಕೊರೊನಾ ಅವಧಿಯಲ್ಲಿ ಸಿಬ್ಬಂದಿ ಸಲ್ಲಿಸಿದ ಸೇವೆಯನ್ನು ಗುರುತಿಸಿ, ಈ ಹೆಚ್ಚಳ ಮಾಡಲು ತೀರ್ಮಾನಿಸಲಾಗಿದೆ ಎಂದು ಮೂಲಗಳು ಪಿಟಿಐ ಸುದ್ದಿಸಂಸ್ಥೆಗೆ ತಿಳಿಸಿವೆ. 2020- 21ನೇ ಸಾಲಿಗೆ 8 ಪರ್ಸೆಂಟ್ ತನಕ ವೇತನ ಹೆಚ್ಚಳವು ಜುಲೈನಿಂದ ಅನ್ವಯ ಆಗಲಿದೆ. ಈ ಬಗ್ಗೆ ಪ್ರತಿಕ್ರಿಯೆ ಕೋರಿ ಕಳಿಸಿದ್ದ ಮೇಲ್ ಗೆ ಬ್ಯಾಂಕ್ ನಿಂದ ಸ್ಪಷ್ಟತೆ ಸಿಕ್ಕಿಲ್ಲ.

M1 ಮತ್ತು ಅದಕ್ಕಿಂತ ಕೆಳಗಿನ ಗ್ರೇಡ್ ಸಿಬ್ಬಂದಿ ಇವರು ಎಂದು ಮೂಲಗಳು ತಿಳಿಸಿವೆ. ಇವರ ಜವಾಬ್ದಾರಿ ಮುಂಚೂಣಿಯಲ್ಲಿ ಇದ್ದು, ಗ್ರಾಹಕರ ಜತೆಗೆ ವ್ಯವಹಾರ ನಡೆಸುವುದಾಗಿರುತ್ತದೆ. ಶಾಖೆಗಳು ಹಾಗೂ ಇತರ ಕಾರ್ಯ ನಿರ್ವಹಣೆಯ ಪ್ರಮುಖ ಜವಾಬ್ದಾರಿ ಇವರದೇ ಆಗಿರುತ್ತದೆ.

ವೆಚ್ಚ ಕಡಿತ ಮಾಡುವ ಸಲುವಾಗಿ ಉದ್ಯೋಗ ಕಡಿತ, ವೇತನ ಹೆಚ್ಚಳಕ್ಕೆ ತಡೆ, ಬಡ್ತಿಗೆ ತಡೆ ಎಂದು ನಾನಾ ಸಂಸ್ಥೆಗಳು ವಿವಿಧ ಕ್ರಮಗಳನ್ನು ಕೈಗೊಳ್ಳುತ್ತಿರುವ ಕಾಲಘಟ್ಟದಲ್ಲಿ ಈ ಸುದ್ದಿ ಹೊರಬಿದ್ದಿದೆ. ಮಾರ್ಚ್ ಗೆ ಕೊನೆಗೊಂಡ ತ್ರೈ ಮಾಸಿಕದಲ್ಲಿ ಐಸಿಐಸಿಐ ಬ್ಯಾಂಕ್ 26 ಪರ್ಸೆಂಟ್ ಹೆಚ್ಚಲ ತೋರಿಸಿ, 1,221 ಕೋಟಿ ನಿವ್ವಳ ಲಾಭ ದಾಖಲಿಸಿದೆ.