ಡಿಜಿಟಲ್ ಪಾವತಿ ಅಳವಡಿಕೆಯಿಂದ ಜಿಡಿಪಿ ಮೌಲ್ಯಮಾಪನ ಸುಧಾರಣೆ

ಡಿಜಿಟಲ್ ಪಾವತಿಯನ್ನು ಅಳವಡಿಸಿಕೊಳ್ಳುತ್ತಿರುವವರ ಪ್ರಮಾಣ ಹೆಚ್ಚಾಗುತ್ತಿರುವುದರಿಂದ ಜಿಡಿಪಿ ಮೌಲ್ಯಮಾಪನವನ್ನು ಸುಧಾರಿಸಲು ಇದರಿಂದ ಸಹಾಯ ಆಗುತ್ತದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಹೇಳಿದ್ದಾರೆ. ಕಾರ್ಯಕ್ರಮವೊಂದರಲ್ಲಿ ಅವರು ಶುಕ್ರವಾರ ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

"ನಾವು ಡಿಜಿಟಲ್ ವ್ಯವಹಾರದ ಕಡೆಗೆ ಸಾಗುತ್ತಿರುವುದರಿಂದ ನಗದಿನ ಮೂಲಕವೇ ವ್ಯವಹಾರ ಮಾಡಬೇಕು ಎಂಬ ಉತ್ಕಟತೆ ಕಡಿಮೆ ಆಗುತ್ತದೆ ಎಂಬುದನ್ನು ನಿರೀಕ್ಷಿಸಬಹುದು. ಮತ್ತು ಈ ಎಲ್ಲ ವ್ಯವಹಾರವೂ ಹಣಕಾಸಿನ ನಿಗಾ ಜಾಲದೊಳಗೆ ಬಂದರೆ ಜಿಡಿಪಿ ಲೆಕ್ಕಾಚಾರವು ಭಾರತದ ವಾಸ್ತವ ಆರ್ಥಿಕತೆಯ ಬಲದ ಸಮೀಪ ಬರುತ್ತದೆ," ಎಂದು ತಿಳಿಸಿದ್ದಾರೆ.

ಹೆಚ್ಚು ವ್ಯವಹಾರಗಳನ್ನು ಆರ್ಥಿಕವಾಗಿ ಗಮನಕ್ಕೆ ಬರುವಂತೆ ಮಾಡಿದಷ್ಟೂ ಒಂದು ದೇಶವಾಗಿ ಉತ್ತಮಗೊಳ್ಳುತ್ತೇವೆ. ಅದರಲ್ಲಿ ತೆರಿಗೆ ಪ್ರಾಕ್ಟೀಷನರ್ ಗಳು ತುಂಬ ಮುಖ್ಯ ಪಾತ್ರ ವಹಿಸಲಿ ಎಂದು ನಿರೀಕ್ಷೆ ಮಾಡುತ್ತೇನೆ ಎಂದಿದ್ದಾರೆ. "ನಿಮ್ಮ ಕ್ಲೈಂಟ್ ಗಳ ಜತೆಗೆ ಮಾತನಾಡಿ. ಸರ್ಕಾರದಿಂದ ಡಿಜಿಟಲ್ ಪಾವತಿಯನ್ನು, ಸರಳ ತೆರಿಗೆ ಪದ್ಧತಿಯನ್ನು ಉತ್ತೇಜಿಸುವಾಗ ಆಗುವ ವಿವಿಧ ಅನುಕೂಲಗಳನ್ನು ತಿಳಿಸಿಕೊಡಿ," ಎಂದು ಮನವಿ ಮಾಡಿದ್ದಾರೆ ನಿರ್ಮಲಾ.