ಜನವರಿಯಲ್ಲಿ 8 ಪ್ರಮುಖ ಕೈಗಾರಿಕಾ ವಲಯಗಳ ಬೆಳವಣಿಗೆ ವೃದ್ಧಿ

ದೇಶದ ಎಂಟು ಪ್ರಮುಖ ಕೈಗಾರಿಕಾ ವಲಯಗಳ ಬೆಳವಣಿಗೆ ದರ ಹಿಂದಿನ ವರ್ಷ ಡಿಸೆಂಬರ್‌ನ 2.1 ಪರ್ಸೆಂಟ್‌ಗೆ ಹೋಲಿಸಿದರೆ ಜನವರಿ ತಿಂಗಳಿನಲ್ಲಿ 2.2 ಪರ್ಸೆಂಟ್ ಏರಿಕೆ ದಾಖಲಿಸಿದೆ. ಕಲ್ಲಿದ್ದಲು, ಸಂಸ್ಕರಣಾ ಘಟಕಗಳು ಮತ್ತು ವಿದ್ಯುತ್ ಉತ್ಪಾದನೆಯಲ್ಲಿ ವಿಸ್ತರಣೆಯಾಗಿದೆ.

ಸರ್ಕಾರ ಶುಕ್ರವಾರ ಬಿಡುಗಡೆ ಮಾಡಿದ ಮಾಹಿತಿ ಪ್ರಕಾರ 2019ರ ಏಪ್ರಿಲ್ ನಿಂದ 2020ರ ಜನವರಿವರೆಗೆ ಸೂಚ್ಯಂಕದ ಸಂಚಿತ ಬೆಳವಣಿಗೆ 0.6 ಪರ್ಸೆಂಟ್ರಷ್ಟಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ತಿಳಿಸಿದೆ.

ಕಳೆದ ವರ್ಷದ ಜನವರಿಗೆ ಹೋಲಿಸಿದರೆ ಕಲ್ಲಿದ್ದಲು ಉತ್ಪಾದನೆ ಜನವರಿಯಲ್ಲಿ 8.0 ಪರ್ಸೆಂಟ್ರಷ್ಟು ವೃದ್ಧಿಸಿದೆ. ಇದರ ಸಂಚಿತ ಸೂಚ್ಯಂಕ 2019-20ರ ಏಪ್ರಿಲ್ ನಿಂದ ಜನವರಿ ಅವಧಿಯಲ್ಲಿ ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ 2.4 ಪರ್ಸೆಂಟ್ರಷ್ಟು ಕುಸಿದಿದೆ.

ಕಚ್ಚಾ ತೈಲ ಉತ್ಪಾದನೆ ಕಳೆದ ವರ್ಷದ ಜನವರಿಗೆ ಹೋಲಿಸಿದರೆ ಈ ವರ್ಷದ ಜನವರಿಯಲ್ಲಿ 5.3 ಪರ್ಸೆಂಟ್ರಷ್ಟು ಕುಸಿದಿದೆ. ಅದರ ಸಂಚಿತ ಸೂಚ್ಯಂಕ 2019-20ರ ಏಪ್ರಿಲ್ ನಿಂದ ಜನವರಿ ಅವಧಿಯಲ್ಲಿ ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ 6.0 ಪರ್ಸೆಂಟ್ರಷ್ಟು ಕುಸಿದಿದೆ.

ನೈಸರ್ಗಿಕ ಅನಿಲ ಉತ್ಪಾದನೆ ಕಳೆದ ಜನವರಿಯಲ್ಲಿ 9.1 ಪರ್ಸೆಂಟ್ರಷ್ಟು ಕುಸಿದಿದೆ. ಪೆಟ್ರೋಲಿಯಂ ಶುದ್ಧೀಕರಣ ಉತ್ಪಾದನೆ ಕಳೆದ ಜನವರಿಯಲ್ಲಿ 1.9 ಪರ್ಸೆಂಟ್ರಷ್ಟು ವೃದ್ಧಿಸಿದ್ದರೆ, ರಸಗೊಬ್ಬರ ಉತ್ಪಾದನೆ 0.1 ಪರ್ಸೆಂಟ್ರಷ್ಟು ಕುಸಿದಿದೆ.