"2021- 2022ರ ತನಕ ಆರ್ಥಿಕ ಚೇತರಿಕೆಗೆ ಕಾಯಬೇಕಾಗಬಹುದು"

ಕೊರೊನಾ ಬಿಕ್ಕಟ್ಟು ಕಾಣಿಸಿಕೊಳ್ಳುವ ಮುಂಚಿನ ಹಂತಕ್ಕೆ ಭಾರತದ ಆರ್ಥಿಕತೆ ತಲುಪಬೇಕು ಅಂದರೆ 2021- 2022ರ ಆರ್ಥಿಕ ವರ್ಷದ ಕೊನೆ ತನಕ ಕಾಯಬೇಕಾಗಬಹುದು. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಜಿಡಿಪಿ 8%ಗಿಂತ ಕಡಿಮೆ ಕುಸಿಯಬಹುದು ಎಂಬ ಅಂದಾಜಿನ ಹಿನ್ನೆಲೆಯಲ್ಲಿ ಈ ಲೆಕ್ಕಾಚಾರ ಮಾಡಲಾಗಿದೆ ಎಂದು ನೀತಿ ಆಯೋಗದ ಅಧ್ಯಕ್ಷ ರಾಜೀವ್ ಕುಮಾರ್ ಭಾನುವಾರ ಹೇಳಿದ್ದಾರೆ.

ಪ್ರಸಕ್ತ ಹಣಕಾಸು ವರ್ಷದಲ್ಲಿ (2020- 21) ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾವು (-) 7.5 ಪರ್ಸೆಂಟ್ ಆರ್ಥಿಕ ಪ್ರಗತಿಯ ಅಂದಾಜು ಮಾಡಿದೆ. ಈ ಹಿಂದೆ (-) 9.5 ಪರ್ಸೆಂಟ್ ಆಗಬಹುದು ಎಂಬ ಅಂದಾಜಿಸಿತ್ತು.

"2021- 22ರ ಆರ್ಥಿಕ ವರ್ಷದ ಕೊನೆಗೆ ಕೋವಿಡ್- 19ರ ಹಿಂದಿನ ಸ್ಥಿತಿಗೆ ಖಂಡಿತಾ ತಲುಪುತ್ತೇವೆ," ಎಂದು ರಾಜೀವ್ ಕುಮಾರ್ ಪಿಟಿಐಗೆ ಮಾಹಿತಿ ನೀಡಿದ್ದಾರೆ. ಈ ಆರ್ಥಿಕ ವರ್ಷದಲ್ಲಿ ಜಿಡಿಪಿ 8 ಪರ್ಸೆಂಟ್ ಗಿಂತ ಕಡಿಮೆ ಪ್ರಮಾಣದಲ್ಲಿ ಕುಗ್ಗಬಹುದು ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.

ಜುಲೈನಿಂದ ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ನಿರೀಕ್ಷೆಗಿಂತ ಶೀಘ್ರವಾಗಿ ಚೇತರಿಕೆ ಕಾಣಿಸಿಕೊಂಡಿದೆ. ಉತ್ಪಾದನಾ ಚಟುವಟಿಕೆಯಲ್ಲಿ ಬೆಳವಣಿಗೆ ಕಂಡಿದ್ದು ಜಿಡಿಪಿ ಕುಸಿತ 7.5% ಆಗಲು ಕಾರಣ ಆಗಿದೆ. ಇದರ ಜತೆಗೆ ಗ್ರಾಹಕರ ಬೇಡಿಕೆ ಹೆಚ್ಚಲು ಸಹ ಸಹಾಯ ಆಗಿದೆ.

ಇನ್ನು ಸರ್ಕಾರವು ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬಂಡವಾಳ ಹಿಂತೆಗೆತದ ಮೂಲಕ 2.10 ಲಕ್ಷ ಕೋಟಿ ರುಪಾಯಿ ಸಂಗ್ರಹಕ್ಕೆ ಮುಂದಾಗಿದೆ. ಇದರಲ್ಲಿ ಸೆಂಟ್ರಲ್ ಪಬ್ಲಿಕ್ ಸೆಕ್ಟರ್ ಎಂಟರ್ ಪ್ರೈಸ್ (ಸಿಪಿಎಸ್ ಇ) ಷೇರು ಮಾರಾಟದ ಮೂಲಕ 1.20 ಲಕ್ಷ ಕೋಟಿ, ಹಣಕಾಸು ಸಂಸ್ಥೆಯಲ್ಲಿ ಇರುವ ಸರ್ಕಾರದ ಷೇರಿನ ಮಾರಾಟ ಮೂಲಕ 90 ಸಾವಿರ ಕೋಟಿ ರುಪಾಯಿ ಸಂಗ್ರಹಕ್ಕೆ ಮುಂದಾಗಿದೆ.