Infosys: ಅತಿದೊಡ್ಡ ಎಐ ಟೆಕ್ ಡೀಲ್ ಕಳೆದುಕೊಂಡ ಇನ್ಫೋಸಿಸ್, ಎಷ್ಟು ಮೌಲ್ಯದ್ದು?

ಭಾರತದ ಐಟಿ ದೈತ್ಯ ಸಂಸ್ಥೆಯಾದ ಇನ್ಫೋಸಿಸ್ ತನ್ನ ಕ್ಲೈಂಟ್ ಜೊತೆಗೆ ಎಐ ಸಂಬಂಧಿತ ಡೀಲ್ ಒಂದನ್ನು ಮಾಡಿಕೊಂಡಿದೆ ಎಂದು ಸೆಪ್ಟೆಂಬರ್‌ನಲ್ಲಿ ಘೋಷನೆಯನ್ನು ಮಾಡಿತ್ತು. ಆದರೆ ಈ ಬರೋಬ್ಬರಿ 1.5 ಬಿಲಿಯನ್ ಡಾಲರ್‌ನ ಎಐ ಒಪ್ಪಂದವನ್ನು ಕೊನೆಗೊಳಿಸಲಾಗಿದೆ ಎಂದು ಇನ್ಫೋಸಿಸ್ ಶನಿವಾರ ತಿಳಿಸಿದೆ.

ಈ ಹಿಂದೆ ಒಪ್ಪಂದ ಆರಂಭವಾದಾಗ ಇನ್ಪೋಸಿಸ್‌ ತನ್ನ ಕ್ಲೈಂಟ್‌ನ ವಿವರಗಳನ್ನು ನೀಡಿರಲಿಲ್ಲ. ಈಗಲೂ ಕ್ಲೈಂಟ್‌ನ ವಿವರಗಳನ್ನು ಮತ್ತು ಒಪ್ಪಂದ ಮುರಿದು ಬೀಳಲು ಕಾರಣಗಳನ್ನು ಬಹಿರಂಗಪಡಿಸಲಿಲ್ಲ. ಇದು ಇಲ್ಲಿಯವರೆಗೆ ಘೋಷಿಸಲಾದ ಇನ್ಫೋಸಿಸ್‌ನ ಅತಿದೊಡ್ಡ ಎಐ ಒಪ್ಪಂದವಾಗಿದೆ ಎಂದು ವರದಿಯಾಗಿದೆ.

"ಇದು ಜಾಗತಿಕ ಕಂಪನಿಯೊಂದಿಗಿನ ಎಂಒಯುಗೆ ಸಂಬಂಧಿಸಿದಂತೆ ಸೆಪ್ಟೆಂಬರ್ 14 ರ ದಿನಾಂಕದ ಇನ್ಫೋಸಿಸ್ ಪತ್ರದ ಮೂಲಕ ಬಹಿರಂಗ ಮಾಡಿದೆ. ಜಾಗತಿಕ ಕಂಪನಿಯು ಈಗ ಎಂಒಯು ಅಂತ್ಯಗೊಳಿಸಲು ಆಯ್ಕೆ ಮಾಡಿದೆ ಮತ್ತು ಉಭಯ ಸಂಸ್ಥೆಗಳು ಮಾಸ್ಟರ್ ಒಪ್ಪಂದವನ್ನು ಅನುಸರಿಸುವುದಿಲ್ಲ," ಎಂದು ಇನ್ಫೋಸಿಸ್ ಶನಿವಾರದ ವಿನಿಮಯ ಫೈಲಿಂಗ್‌ನಲ್ಲಿ ತಿಳಿಸಿದೆ.

ಒಪ್ಪಂದದ ಅವಧಿಯ 15 ವರ್ಷಗಳವರೆಗೆ ವಾರ್ಷಿಕವಾಗಿ ಇನ್ಫೋಸಿಸ್ 100 ಮಿಲಿಯನ್ ಡಾಲರ್ ಗಳಿಸುವ ನಿರೀಕ್ಷೆಯಿದೆ. ಅಂತಹ ರದ್ದತಿಗಳು ವ್ಯಾಪಾರ ಮತ್ತು ಜನರ ಮೇಲೆ ಆಳವಾದ ಪ್ರಭಾವ ಬೀರುವ ಸಾಧ್ಯತೆಯಿದೆ.

ಯುಎಸ್ ಮೂಲದ ಐಟಿ ಕನ್ಸಲ್ಟೆನ್ಸಿ ಕಾನ್‌ಸ್ಟೆಲೇಷನ್ ರಿಸರ್ಚ್‌ನ ಸಿಇಒ ರೇ ವಾಂಗ್, "ನೀವು ಈ ದೊಡ್ಡ ಒಪ್ಪಂದವನ್ನು ಗೆದ್ದಾಗ ಅಥವಾ ಕಳೆದುಕೊಂಡಾಗ, ನೀವು ಸಾಂಪ್ರದಾಯಿಕವಾಗಿ ಸಿಬ್ಬಂದಿಯ ರಾಂಪ್-ಅಪ್ ಅಥವಾ ಕಡಿತವನ್ನು ಪರಿಹರಿಸಬೇಕು. ಎಐ ವ್ಯವಹಾರಗಳಲ್ಲಿ ಕಡಿಮೆ ಪರಿಣಾಮವಿದೆ," ಎಂದಿದ್ದಾರೆ.

"ಈ ಪರಿಣಾಮಕ್ಕೆ ಮುಖ್ಯ ಕಾರಣ ಕಾರಣ ನಾವು ಈಗ ಮನುಷ್ಯರಲ್ಲದ ಬಾಟ್‌ಗಳೊಂದಿಗೆ ಸ್ಪರ್ಧಿಸುತ್ತಿರುವ ಜಗತ್ತಿನಲ್ಲಿರುವುದು. ನಾವು ಹೆಚ್ಚು ಯಾಂತ್ರೀಕೃತಗೊಂಡ ಜೀವನ ನಡೆಸುತ್ತೇವೆ. ಆದ್ದರಿಂದ, ಭವಿಷ್ಯದಲ್ಲಿ, ಕಾರ್ಮಿಕರ ಪ್ರಭಾವವು ಕಡಿಮೆಯಾಗುತ್ತದೆ," ಎಂದು ತಿಳಿಸಿದರು.

ಈ ವರ್ಷದಲ್ಲಿ ಇನ್ಫೋಸಿಸ್ ಡೀಲ್‌ಗಳು

ಈ ವರ್ಷದಲ್ಲಿ ಈಗಾಗಲೇ ಇನ್ಫೋಸಿಸ್ ಎರಡು ಮೆಗಾ ಡೀಲ್‌ಗಳನ್ನು ಘೋಷಣೆ ಮಾಡಿದೆ. ಈ ಹಿಂದೆ ಬ್ರಿಟಿಷ್ ಆಯಿಲ್ ಆಂಡ್ ಗ್ಯಾಸ್ ಕಂಪನಿ ಬಿಪಿ ಜೊತೆ ಸುಮಾರು 1.5 ಬಿಲಿಯನ್ ಡಾಲರ್ ಡೀಲ್ ಅನ್ನು ಘೋಷಣೆ ಮಾಡಿದೆ. ಅದಾದ ಬಳಿಕ ಡಾನ್ಸ್ಕೆ ಬ್ಯಾಂಕ್ ಜೊತೆ 454 ಮಿಲಿಯನ್ ಡಾಲರ್‌ನ ಡೀಲ್ ಅನ್ನು ಇನ್ಫೋಸಿಸ್ ಘೋಷಿಸಿದೆ. ಈಗ ಎಐ ಸಂಬಂಧಿತ ಡೀಲ್ ಅನ್ನು ತನ್ನ ಗ್ರಾಹಕರೊಂದಿಗೆ ಮಾಡಿಕೊಂಡಿರುವುದಾಗಿ ಇನ್ಫೋಸಿಸ್ ಘೋಷಿಸಿದೆ.