Game of Growth: ವಿಜ್ಞಾನದಿಂದ ಉದ್ಯಮವರೆಗೆ...ಡಾ. ಫಾತಿಮಾ ಬೆನ್ಜೈರ್ ಮತ್ತು ಅಝೂಕಾ ಲ್ಯಾಬ್ಸ್‌ ಪ್ರೇರಣಾದಾಯಕ ಹಾದಿ!

ವಿಜ್ಞಾನ ಕ್ಷೇತ್ರದಲ್ಲಿ ತನ್ನದೇ ಆದ ಗುರುತನ್ನು ಮೂಡಿಸಿಕೊಂಡಿರುವ ಡಾ. ಫಾತಿಮಾ ಬೆನ್ಜೈರ್ ಇಂದು ಅಝೂಕಾ ಲ್ಯಾಬ್ಸ್‌ನ ಸ್ಥಾಪಕಿ, ಮುಖ್ಯಸ್ಥೆ. ಲ್ಯಾಬ್‌ನಲ್ಲಿ ವಿಜ್ಞಾನಿಯಾಗಿ, ಬೋರ್ಡ್‌ರೂಮ್‌ನಲ್ಲಿ ನಿರ್ಧಾರಾತ್ಮಕ ನಾಯಕಿಯಾಗಿ ಪಾತ್ರ ನಿರ್ವಹಿಸಿರುವ ಅವರ ಹಾದಿ ಪ್ರೇರಣಾದಾಯಕವಾಗಿದೆ. ಆದರೆ, ಈ ಹಾದಿಯ ಆರಂಭವು ಸಂಪೂರ್ಣ ಯಾದೃಚ್ಛಿಕವಾಗಿಯೇ ನಡೆದದ್ದು ವಿಶೇಷ.

ಸಂಶೋಧನೆಯ ಮೇಲಿನ ಅಪ್ರತಿಹತ ಆಸಕ್ತಿ:

ಫಾತಿಮಾ ಅವರಿಗೆ ಬಾಲ್ಯದಿಂದಲೇ ಸಂಶೋಧನೆ, ವಿಜ್ಞಾನ ಕೆಲಸಗಳ ಮೇಲೆ ಅಪಾರ ಅಭಿರುಚಿ. ಅವರು ವಿದೇಶದಲ್ಲಿ ಪೋಸ್ಟ್‌ಡಾಕ್ಟರಲ್ ಸಂಶೋಧನೆ ಮಾಡಲು ಸಿದ್ದತೆ ನಡೆಸುತ್ತಿದ್ದ ಸಂದರ್ಭದಲ್ಲಿ, ಅವರ ಸಹ-ಸ್ಥಾಪಕ ಹಾಗೂ ಆಪ್ತ ಸ್ನೇಹಿತರಾಗಿರುವ ಅಲೆಕ್ಸ್ ಅವರ ಜೀವನದಲ್ಲಿ ಪ್ರಮುಖ ಪಾತ್ರವಹಿಸಿದರು. ಫಾತಿಮಾ ಅವರ ತಾಯಿ ಅಲೆಕ್ಸ್‌ಗೆ "ಈ ಹುಡುಗಿ ಓದು ನಿಲ್ಲಿಸೋದಲ್ಲ, ಏನಾದರೂ ಮಾಡು" ಎಂದು ಹೇಳಿದ ನಂತರ, ಅಲೆಕ್ಸ್ ಮತ್ತು ಫಾತಿಮಾ ನಡುವೆ ವಿಜ್ಞಾನವನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವ ಬಗ್ಗೆ ಗಂಭೀರ ಚರ್ಚೆಗಳು ಆರಂಭವಾದವು.

ಅಲೆಕ್ಸ್ ನೀನು ಸಂಶೋಧನಾ ಲೇಖನ ಪ್ರಕಟಿಸಿದ ಮೇಲೆ ಏನು ಮಾಡುತ್ತೀಯ? ಎಂದು ಪ್ರಶ್ನಿಸಿದಾಗ, ಫಾತಿಮಾ ಅವರಿಗೆ ತಮ್ಮ ಸಂಶೋಧನೆಯಿಂದ ಹೊಸ ಉತ್ಪನ್ನಗಳನ್ನು ರೂಪಿಸುವ ಅಗತ್ಯವನ್ನು ಅರಿವಾಯಿತು. ಆರಂಭದಲ್ಲಿ "ಬ್ಯುಸಿನೆಸ್ ನನಗೆ ಗೊತ್ತಿಲ್ಲ" ಎಂದು ಹಿಂಜರಿದರೂ, ಅಲೆಕ್ಸ್ ಅವರ ಸಹಕಾರದಿಂದ ಫಾತಿಮಾ ಉದ್ಯಮಶೀಲತೆಗೆ ಕಾಲಿಟ್ಟರು.

ಅಝೂಕಾ ಲ್ಯಾಬ್ಸ್‌ನ ಜನನ:

ಕೇವಲ ಆರು ತಿಂಗಳಲ್ಲಿ, ಫಾತಿಮಾ ಅವರು ಪೋಸ್ಟ್‌ಡಾಕ್ಟರಲ್ ಅವಧಿಯಲ್ಲೇ ಕನಿಷ್ಠ ಕಾರ್ಯನಿರ್ವಹಣಾ ಮಾದರಿ (MVP) ತಯಾರಿಸಿದರು. ಅಲೆಕ್ಸ್ ಮಾರುಕಟ್ಟೆ ಅಧ್ಯಯನ ಮಾಡಿದ ನಂತರ ಈ ಆಲೋಚನೆಯ ಬಗ್ಗೆ ಆತ್ಮೀಯವಾಗಿ ತೊಡಗಿಕೊಂಡರು. ನಂತರ 2015ರಲ್ಲಿ ಅಝೂಕಾ ಲ್ಯಾಬ್ಸ್ ಅನೌಪಚಾರಿಕವಾಗಿ ಕಾರ್ಯಾರಂಭ ಮಾಡಿತು.

ಅಝೂಕಾ ಎಂಬ ಹೆಸರಿನ ಹುಟ್ಟು ಕೂಡ ಕುತೂಹಲಕಾರಿ. ತಮಿಳಿನಲ್ಲಿ ಅಸ್ಕಾ ಎಂದರೆ ಸಕ್ಕರೆ, ಅಲ್ಲಿಂದ ಅಝೂಕಾ ಎಂದು ಹೆಸರಿಟ್ಟರು. ಸಿಹಿಯಾದ ಪ್ರಯಾಣ ಎಂಬ ಉದ್ದೇಶದೊಂದಿಗೆ ಅಝೂಕಾ ಲ್ಯಾಬ್ಸ್ ತನ್ನ ಮೊದಲ ಉತ್ಪನ್ನ ಅಝೂಕಾ ಟಿಂಟ್-ಒ-ರಾಂಗ್ ಬಿಡುಗಡೆ ಮಾಡಿತು.

ಆಹಾರ ದರ್ಜೆಯ ಸುರಕ್ಷಿತ ಬಣ್ಣಗಳು:

ಅಝೂಕಾ ಲ್ಯಾಬ್ಸ್‌ನ ಪ್ರಮುಖ ಸಾಧನೆಗಳಲ್ಲಿ ಒಂದೇಂದರೆ, DNA ಹಾಗೂ RNAಗೆ ಬಾಂಧಿಕೊಳ್ಳಬಲ್ಲ, ಆಹಾರ ದರ್ಜೆಯ ಸುರಕ್ಷಿತ ಬಣ್ಣಗಳನ್ನು ಅಭಿವೃದ್ಧಿಪಡಿಸಿದ ಪ್ರಥಮ ಸಂಸ್ಥೆಯಾಗಿ ಹೊರಹೊಮ್ಮಿದದ್ದು. ಸಾಮಾನ್ಯವಾಗಿ ಲ್ಯಾಬ್‌ಗಳಲ್ಲಿ ಬಳಸುವ ಬಣ್ಣಗಳಲ್ಲಿ ಕಾರ್ಸಿನೋಜೆನಿಕ್ (ಕ್ಯಾನ್ಸರ್ ಉಂಟುಮಾಡುವ) ಮತ್ತು ಹಾನಿಕಾರಕ ರಾಸಾಯನಿಕಗಳು ಇರುತ್ತವೆ. ಅವುಗಳಿಗೆ ಪರ್ಯಾಯವಾಗಿ, ಅಝೂಕಾ ಲ್ಯಾಬ್ಸ್ ಸುರಕ್ಷಿತ ಬಣ್ಣಗಳನ್ನು ತಯಾರಿಸಿ ಜಾಗತಿಕ ಗಮನ ಸೆಳೆದಿತು.

ಉದ್ಯಮಿಯ ಹಾದಿಯ ಸವಾಲುಗಳು:

ಫಾತಿಮಾ ಹೇಳುವಂತೆ, ಮಹಿಳೆಯಾಗಿ ಉದ್ಯಮಿಯ ಹಾದಿ ಹಿಡಿಯುವುದು ಸುಲಭವಾದುದಲ್ಲ. ಮನೆ, ಮಕ್ಕಳು, ಕುಟುಂಬದ ಒತ್ತಡಗಳ ನಡುವೆ ಸಂಸ್ಥೆಯನ್ನು ಸ್ಥಾಪಿಸುವುದು ದೊಡ್ಡ ಸವಾಲಾಗಿತ್ತು. ಆರಂಭದಲ್ಲಿ ಗ್ರಾಹಕರು ಜರ್ಮನ್ ಹಾಗೂ ಅಮೆರಿಕನ್ ಉತ್ಪನ್ನಗಳತ್ತ ಹೆಚ್ಚಿನ ವಿಶ್ವಾಸವಿಟ್ಟಿದ್ದರು. ಭಾರತೀಯ ಉತ್ಪನ್ನಗಳತ್ತ ಆ ಮನೋಭಾವವನ್ನು ಬದಲಿಸುವುದು ಅಝೂಕಾ ಎದುರಿಸಿದ ದೊಡ್ಡ ಸವಾಲುಗಳಲ್ಲಿ ಒಂದು.

ಇದಲ್ಲದೆ, ಭಾರತದ ಬಯೋಟೆಕ್ ಪರಿಸರದಲ್ಲಿಯೇ ಹೂಡಿಕೆದಾರರ ಅಪಾಯ ಸ್ವೀಕರಿಸುವ ಮನೋಭಾವ ಕಡಿಮೆ. ಸಂಶೋಧನೆ-ಆಧಾರಿತ ಬಯೋಟೆಕ್ ಕ್ಷೇತ್ರದಲ್ಲಿ ಟ್ರಯಲ್ ಮತ್ತು ಎರರ್ ಪ್ರಕ್ರಿಯೆಗಳು, ದೀರ್ಘಾವಧಿಯ ಫಲಿತಾಂಶದ ಅವಧಿ ಹೂಡಿಕೆದಾರರನ್ನು ಹಿಂಜರಿಯುವಂತೆ ಮಾಡುತ್ತದೆ ಎಂದು ಫಾತಿಮಾ ಅಭಿಪ್ರಾಯಪಟ್ಟಿದ್ದಾರೆ.

ಸಾಧನೆಗಳು ಮತ್ತು ಭವಿಷ್ಯದ ದೃಷ್ಟಿಕೋನ:

ಅಝೂಕಾ ಲ್ಯಾಬ್ಸ್ ದೇಶೀಯ ತಂತ್ರಜ್ಞಾನ ಅಭಿವೃದ್ಧಿಗೆ ನೀಡಿದ ಕೊಡುಗೆಗಾಗಿ ಟೆಕ್ನಾಲಜಿ ಡೆವಲಪ್‌ಮೆಂಟ್ ಬೋರ್ಡ್ ಅವಾರ್ಡ್ ಸೇರಿ ಹಲವಾರು ರಾಷ್ಟ್ರೀಯ ಪ್ರಶಸ್ತಿಗಳನ್ನು ಪಡೆದಿದೆ. ವಿಶೇಷವಾಗಿ ಕೋವಿಡ್-19 ಕಾಲಘಟ್ಟದಲ್ಲಿ ಅಭಿವೃದ್ಧಿಪಡಿಸಿದ ಕಲೆಕ್ಷನ್ ಕಿಟ್ ತಂತ್ರಜ್ಞಾನಕ್ಕೆ ಈ ಗೌರವ ಲಭಿಸಿತು.

ಭವಿಷ್ಯದಲ್ಲಿ ಅಝೂಕಾ ಲ್ಯಾಬ್ಸ್ ಭಾರತದಿಂದಲೇ ಜಾಗತಿಕ ಮಟ್ಟದ ಪ್ರೀಮಿಯಮ್ ಮ್ಯಾಲಿಕ್ಯುಲರ್ ಉತ್ಪನ್ನಗಳನ್ನು, ವಿಶೇಷವಾಗಿ ಜಿನೋಮಿಕ್ಸ್ ಮತ್ತು ವೈಯಕ್ತಿಕ ಆರೋಗ್ಯ ಕ್ಷೇತ್ರಗಳಲ್ಲಿ, ಅಭಿವೃದ್ಧಿಪಡಿಸುವ ಉದ್ದೇಶ ಹೊಂದಿದೆ.