Karnataka Digital Off: 7 ರಿಂದ 9 ಗಂಟೆ ತನಕ ರಾಜ್ಯದ ಈ ಗ್ರಾಮದಲ್ಲಿ ಮೊಬೈಲ್‌, ಟಿವಿ ಬಳಕೆ ನಿಷೇಧ! ಕಾರಣವೇನು ಗೊತ್ತಾ?

ಇದು ಡಿಜಿಟಲ್‌ ಯುಗ (Digital). ಒಂದು ಹೊತ್ತು ಊಟವನ್ನಾದ್ರೂ ಕೆಲವರು ಬಿಡುತ್ತಾರೆ, ಆದ್ರೆ ಮೊಬೈಲ್‌ ಬಿಟ್ಟಿರಲ್ಲ. ಮೊಬೈಲ್‌, ಟಿವಿ, ಲ್ಯಾಪ್‌ಟಾಪ್‌, ವೆಬ್‌ಸೀರಿಸ್‌, ಓಟಿಟಿ (Mobile, TV, OTT) ಹೀಗೆ ಎಲ್ಲವೂ ಅಗತ್ಯ ಸಾಧನವಾಗಿಬಿಟ್ಟಿದೆ. ಈ ಎಲೆಕ್ಟ್ರಾನಿಕ್‌ ಸಾಧನಗಳು ಅದೆಷ್ಟೋ ಬಾಲ್ಯದ ದಿನಗಳನ್ನು ಮರೆಸುವಂತೆ ಮಾಡಿದೆ. ರಜಾ ದಿನಗಳಲ್ಲಿ ಹೋಗುತ್ತಿದ್ದ ಅಜ್ಜಿ ಮನೆ, ಗೆಳೆಯರೆಲ್ಲಾ ಸೇರಿ ಆಡುತ್ತಿದ್ದ ಕ್ರಿಕೆಟ್‌, ಕುಟುಂಬದವರೆಲ್ಲಾ ಸೇರಿ ಮಾಡುತ್ತಿದ್ದ ಮಜಾವನ್ನು, ಇಂದು ಮೊಬೈಲ್‌ ಎಲ್ಲವನ್ನೂ ಕಸಿದುಕೊಂಡುಬಿಟ್ಟಿದೆ. ಆದರೆ ಈ ಎಲ್ಲಾ ಡಿಜಿಟಲ್‌ ಸಾಧನಗಳಿಗೆ ಬ್ರೇಕ್‌ ನೀಡುವ ಉದ್ದೇಶದಲ್ಲಿ ಇಲ್ಲೊಂದು ಜಿಲ್ಲೆ ಮಾದರಿಯಾಗಿಬಿಟ್ಟಿದೆ.

7 ಗಂಟೆಯ ನಂತರ "ನೋ ಸ್ಕ್ರೀನ್‌"
ಬೆಳಗಾವಿಯ ಹಲಗಾ ಗ್ರಾಮವು, ಡಿಜಿಟಲ್ ಸ್ಕ್ರೀನ್‌ ಅತಿಯಾದ ಬಳಕೆಗೆ ಕಡಿವಾಣ ಹಾಕುವ ಉದ್ದೇಶದಿಂದ ಮಹತ್ವದ ಕ್ರಮಕ್ಕೆ ಮುಂದಾಗಿದೆ. ಕುಟುಂಬ ಬಾಂಧವ್ಯ ಗಟ್ಟಿಗೊಳಿಸುವ ಉದ್ದೇಶದಿಂದ ವಿಶಿಷ್ಟ ಉಪಕ್ರಮ ಜಾರಿಗೆ ತಂದಿದೆ. ಆ ಪ್ರಕಾರ, ಬೆಳಗಾವಿಯ ಹಲಗಾ ಗ್ರಾಮವು ಪ್ರತಿ ಸಂಜೆ 7 ರಿಂದ 9 ರವರೆಗೆ 'ನೋ-ಸ್ಕ್ರೀನ್' ನಿಯಮ ಜಾರಿಗೆ ಬಂದಿದೆ. ವಿದ್ಯಾರ್ಥಿಗಳ ಅಧ್ಯಯನಕ್ಕೆ ಉತ್ತಮ ವಾತಾವರಣ ನಿರ್ಮಿಸುವುದು ಹಾಗೂ ಕುಟುಂಬದ ಬಾಂಧವ್ಯವನ್ನು ಗಟ್ಟಿಗೊಳಿಸುವುದೇ ಇದರ ಮುಖ್ಯ ಗುರಿ.

ಯಾವಾಗದಿಂದ ಜಾರಿ?
ದಿನಾಂಕ ಡಿಸೆಂಬರ್ 17, 2025 ರಿಂದ ಜಾರಿಯಲ್ಲಿರುವ ಈ ನಿರ್ಧಾರ, ಗ್ರಾಮಸ್ಥರು ಸ್ವಯಂಪ್ರೇರಿತವಾಗಿ ಟಿವಿ, ಮೊಬೈಲ್, ಲ್ಯಾಪ್‌ಟಾಪ್ ಮತ್ತು ಟ್ಯಾಬ್‌ಗಳನ್ನು ಆಫ್ ಮಾಡುತ್ತಾರೆ. ಗ್ರಾಮ ಪಂಚಾಯತ್ ಕಚೇರಿಯಲ್ಲಿ ಸಂಜೆ 7 ಮತ್ತು 9 ಗಂಟೆಗೆ ಸೈರನ್‌ ಮೊಳಗುತ್ತವೆ. ಆರಂಭದ ಸೈರನ್‌ ಮತ್ತು ಅಂತ್ಯದ ಸೈರನ್‌ 9 ಗಂಟೆಗೆ ಆಗಲಿದೆ.

ಈ ಅವಧಿಯಲ್ಲಿ, "ನೋ ಟಿವಿ, ನೋ ಮೊಬೈಲ್, ಬರೀ ಓದು ಮತ್ತು ಸಂಭಾಷಣೆ" ಎಂಬ ಘೋಷವಾಕ್ಯ ಪಾಲಿಸಲಾಗುತ್ತದೆ. ಇದು ಮಕ್ಕಳ ಅಧ್ಯಯನ ಹಾಗೂ ಸಾಮಾಜಿಕ ಸಂವಾದಕ್ಕೂ ದಾರಿ ಮಾಡಿಕೊಡಲಿದೆ ಎಂದು ಹೇಳಿದ್ದಾರೆ. ಸುಮಾರು 12,000 ಜನಸಂಖ್ಯೆ ಹೊಂದಿರುವ ಹಲಗಾ, ಬೆಳಗಾವಿ ಹೊರವಲಯದ ಸುವರ್ಣ ವಿಧಾನಸೌಧದ ಸಮೀಪದಲ್ಲಿದೆ.

ಗ್ರಾಮ ಪಂಚಾಯತ್ ಈ ಉಪಕ್ರಮ ಮುಂದುವರೆಸಿದ್ದು, ಸದಸ್ಯರು ಮನೆ ಮನೆಗೆ ಭೇಟಿ ನೀಡಿ ಭಾಗವಹಿಸಲು ಪ್ರೇರಣೆ ನೀಡುತ್ತಿದ್ದಾರೆ. ಸಂಪೂರ್ಣ ಸ್ವಯಂಪ್ರೇರಿತ ಹಾಗೂ ಸಂವಾದ ಬೆಂಬಲಕ್ಕಾಗಿ ಈ ಅಭಿಯಾನ ಆರಂಭಿಸಲಾಗಿದೆ. ಇನ್ನು ಕಾನೂನು ಜಾರಿಗಿಂತ ಜಾಗೃತಿ ಮತ್ತು ಸಾರ್ವಜನಿಕ ಬೆಂಬಲದ ಮೂಲಕ ಸದ್ಯ ಈ ಅಭಿಯಾನ ಯಶಸ್ವಿಯಾಗಿದೆ.

ಇದರ ಉದ್ದೇಶ ವಿದ್ಯಾರ್ಥಿಗಳಲ್ಲಿ ಏಕಾಗ್ರತೆ ಹೆಚ್ಚಿಸುವುದು ಹಾಗೂ ಕುಟುಂಬದಲ್ಲಿ ಬಾಂಧವ್ಯ ಹೆಚ್ಚಿಸುವುದು ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಮಹಾರಾಷ್ಟ್ರದಲ್ಲಿ ಆರಂಭವಾದ ಈ ಕ್ರಮ, ಸದ್ಯ ಕರ್ನಾಟಕದಲ್ಲೂ ಸದ್ದು ಮಾಡುತ್ತಿದೆ. ಮಹಾರಾಷ್ಟ್ರದ ಸಾಂಗ್ಲಿ ಬಳಿಯ ಆಗ್ರನ್ ಧುಳಗಾವ್ ಗ್ರಾಮದಿಂದ ಈ ಪರಿಕಲ್ಪನೆ ಪ್ರೇರಣೆಗೊಂಡಿದೆ. ಅಲ್ಲಿನ ಇದೇ ರೀತಿಯ ಕಾರ್ಯಕ್ರಮ ಮಕ್ಕಳ ಅಧ್ಯಯನಕ್ಕೆ ಹೊಸ ದಾರಿ ಮಾಡಿಕೊಟ್ಟಿತ್ತು. ಇದೀಗ ಹಲಗಾ ಕೂಡ ಆ ಕ್ರಮವನ್ನು ಜಾರಿಗೆ ತಂದು, ಆರೋಗ್ಯಕರ ಡಿಜಿಟಲ್ ಅಭ್ಯಾಸಗಳಿಗೆ, ಮಕ್ಕಳ ಅಭಿವೃದ್ಧಿಗೆ ಸಾಕ್ಷಿಯಾಗಲಿದೆ.